ކުއްލި މައްސަލަ މަޖިލީހަށް ހުށައެޅުމުގެ ފުރުސަތު ނުދިނުމަކީ ރައްޔިތުންގެ މަޖިލިސް ހިންގުމަށް އެމަނިކުފާނު ބޭނުންވެވަޑައިގަންނަވާ ގޮތް ނޫންކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެެއެވެ.

ރައީސް ނަޝީދު މިހެން ވިދާޅުވީ، ހޯމަ ދުވަހުގެ ޖަލްސާއަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ކުއްލި މައްސަލަ ހުށައެޅުއްވުމުގެ ކުރިންނެވެ. ރައީސް ނަޝީދު ވިދާޅުވީ، ކުއްލި މައްސަލަ ހުށައެޅުމުގެ ފުރުސަތު ނުދިނުމަށް ބައެއް މެމްބަރުން އެމަނިކުފާނަށް ބާރު އަޅުއްވާ ކަމަށެވެ. އެހެންނަމަވެސް އެއީ އެމަނިކުފާނު އެދިވަޑައިގަންނަވާ ގޮތް ނޫން ކަމަށާއި، ހުށައަޅާ މައްސަލައަކީ ކިހާވަރެއްގެ މައްސަލައެއްކަން ނިންމާނީ މެމްބަރުންގެ ވޯޓުން ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، ކުއްލި މައްސަލަ ހުށައެޅުމުން ބަހުސް ކުރުން ހުއްޓުވުމަށް ސަރުކާރަށް ތާއީދު ކުރާ ބައެއް މެމްބަރުން ބޭނުންވާ ހާލަތްތަކުގައި، އެ މެމްބަރުން ގަބޫލުކުރައްވާ ގޮތުގައި އެ މައްސަލައެއް އެއީ ގަވާއިދަށް ނުފެތޭ މައްސަލައެއް ކަމަށް ބުނެ ހުއްޓުވުމަކީ ރިޔާސަތުގެ ޒިންމާއެއް ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ، އެއީ އެފަދަ މައްސަލައަކަށް ވާނަމަ ވޯޓުން އެކަން ނިންމުމަކީ އެމަނިކުފާނު ދެކިވަޑައިގަންނަވާ އެންމެ ރަނގަޅު ގޮތް ކަމުގައެވެ.

ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގައި ބުނެފައިވަނީ، ރައްޔިތުންގެ ނުވަތަ ޤައުމުގެ މަޞްލަޙަތު ހިމެނިގެންވާ މުހިންމު ކަމެއް، ކުއްލި މައްސަލައެއްގެ ގޮތުގައި، ޖަލްސާއަކަށް ހުށަހެޅުމުގެ ފުރުޞަތު ކޮންމެ މެންބަރަކަށްވެސް ލިބިގެންވާކަމަށެވެ. އަދި ހުށަހެޅޭ ކުއްލި މައްސަލައަކީ، ރައްޔިތުންގެ ނުވަތަ ޤައުމުގެ މަޞްލަޙަތަށް ސީދާ އަސަރުކުރާފަދަ ބޮޑުކަމެއް ކުއްލިއަކަށް ދިމާވުމުން، އެކަމެއް ސަރުކާރުގެ ސަމާލުކަމަށް ގެނައުމަށާއި، ސަރުކާރުން އެކަމާމެދު އަޅާފައިވާ ނުވަތަ އަޅާފައިނުވާ ފިޔަވަޅަކަށް ފާޑުކިޔުމުގެ ގޮތުން އަދި މައްސަލަ ހުށަހެޅުމަށް މި ގަވާއިދުގައި އޮންނަ އުސޫލުން ހުށަހަޅައިފިނަމަ، އެކަމުގެ މުއާލާތް ކެނޑިދާނެތީ، ނުވަތަ ވަގުތު ފާއިތުވެދާނެތީ، ހުށަހަޅާ މައްސަލައެއް ކަމަށެވެ.