ޕީޕީއެމުން 5000 މެމްބަރުން ގެންދިއަކަމަށް ބުނާ ވާހަކައަކީ ހަގީގަތެއްނޫންކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ފުއާދު މިހެން ވިދާޅުވީ, އިދިކޮޅު ޕީޕީއެމްގެ 5،000 މެމްބަރުން (އޮޅުވާލައިގެން) އެހެން ޕާޓީތަކަށް ވައްދާފައިވާކަމުގެ ތުހުމަތު އެޕާޓީން ކުރުމާގުޅިގެންނެވެ. ޕީޕީއެމްގެ ސެކްރެޓަރީ ޖެނަރަލް މުހައްމަދު ތޮލާލް ކުރެއްވި ޓްވީޓްގައި ވިދާޅުވީ, 2021 ވަނަ އަހަރުގެ އޮކްޓޯބަރުން ފެށިގެން އެހެން ޕާޓީތަކަށް މެމްބަރުން ވަގަށް ގެންގޮސްފައިވާ ކަމަށެވެ. އަދި އިލެކްޝަންސް ކޮމިޝަނުން އެކަން ބަލަންޖެހޭކަމަށް ބުނެ އޭނާ ވަނީ މައްސަލަވެސް ހުށަހަޅުއްވާފައެވެ.
ރާއްޖެއެމްވީއަށް މައުލޫމާތު ދެއްވަމުން ފުއާދު ވިދާޅުވީ, އެއީ އެއްވެސް ހަގީގަތެއް އޮތް ވާހަކައެއް ނޫން ކަމަށާއި ވަރަށް ކައިރިން އޮފީހުން ކަންތައްތައް ކުރާ ގޮތް ބަލަމުންދާކަމަށެވެ.
ހުރިހާ ޕާޓީއަކަށްވެސް ނޭނގި އެހެން ޕާޓީތަކަށް މީހުން ވައްދާފައި އެބަހުރިކަން ފާހަގަކުރައްވައި ފުއާދު ވިދާޅުވީ, ޕީޕިއެމުން އެގޮތަށް ކަން ހިންގާފައިވާ މިންވަރު އެހެން ޕާޓީތަކާ އަޅާބަލާއިރު ގިނަކަމަށެވެ.
ވަގު ފޯމުގެ މައްސަލަވެސް ކޮންމެވެސް މިންވަރަކަށް ހުރިހާ ޕާޓީތަކަށްވެސް ދިމާވެފައި އެބަހުރި ކަމަށާއި, ބޮޑު އަދަދެއް ގަނޑުކޮށް އެއްވެސް ދިމާއަކުން ނެތްކަމަށެވެ.
ގިނަ އަދަދެއްގެ މީހުން ޕީޕީއެމުން އުނިވެފައިވާކަން އެއީ ހަގީގަތެއް ކަމަށް ފުއާދު ވިދާޅުވިއެވެ. ވަރަށް ގިނަ އަދަދެއްގެ މީހުންނަކީ ވެރިކަމުގައި އޮންނަ ޕާޓީއަކަށް ބަދަލުވާ މީހުން ކަމަށް ވެސް އޭނާ ވިދާޅުވިއެވެ.
ޕާޓީތަކުން ގެންނަން ފޯމްތައް ވެބްސައިޓުގައި ހަފްތާއެއް ވަންދެން އާންމު ކުރުމަށްފަހު ރަޖިސްޓްރީކޮށްދޭ ގޮތަށް ނިންމުމަށް އީސީން މަޝްވަރާކުރަމުން ދާކަމަށް ފުއާދު ވިދާޅުވިއެވެ.
