މޯލްޑިވްސް ވޮލީބޯލް ވެޓަރެންސްގެ ދެޓީމަށްވެސް މޮޅެއް

މާލޭ ސިޓީ ކައުންސިލުން ބާއްވާ ޕާކް ވޮލީބޯޅަ މުބާރާތުގައި ބުދަ ދުވަހު މޯލްޑިވްސް ވޮލީބޯލް ވެޓަރެންސްގެ އަންހެން އަދި ފިރިހެން ޓީމު ކުޅުނު މެޗުވެސް ކާމިޔާބުކޮށްފިއެވެ.

ފިރިހެން ޑިވިޝަންގައި ސްޕޯޓްސް ކްލަބް ސިޓީ އާއި ވާދަކޮށް މޯލްޑިވްސް ވޮލީބޯލް ވެޓަރެންސް ޓީމުން މެޗު ކާމިޔާބުކުރީ ސީދާ ދެސެޓުންނެވެ. އަންހެން ޑިވިޝަންގައި މޯލްޑިވްސް ވޮލީބޯލް ވެޓަރެންސް ވާދަކުރީ ޖީޖީ ސްޕޯޓްސް ކްލަބް ޕާކް ވިމަންސްއާއެވެ. މި މެޗުވެސް މޯލްޑިވްސް ވޮލީބޯލް ވެޓަރެންސްއިން ކާމިޔާބުކުރީ ސީދާ ދެސެޓުންނެވެ.

މުބާރާތުގައި ބުދަ ދުވަހު ކުޅުނު ފިރިހެން ޑިވިޝަންގެ އެހެން މެޗުތަކަށް ބަލާއިރު، ކްލަބް ޔޫތު ސިޓީއާއި ޕޮލިސް ކްލަބް ސީ ބައްދަލުކުރި މެޗު ތިން ސެޓަށް ގޮސްގެން ކާމިޔާބުކުރީ ކްލަބް ޔޫތު ސިޓީއިންނެވެ. ޖީޖީ ސްޕޯޓްސް ކްލަބް ޕާކް ބޯއީސް ޖޭއާރު ކައިރިން ޕޮލިސް ކްލަބް އޭ މޮޅުވީ ސީދާ ދެސެޓުންނެވެ. ޑީވީވީއޭ ޝޫޓާސްގެ މައްޗަށް ގުޑީސް ސްޕޯޓްސް ކްލަބުން ކުރިހޯދީ ވެސް ދެސެޓުންނެވެ. އަދި ޑީވީވިއޭ ބުލްސް ވަނީ ޑީވީވީއޭ ސުޕަ ސްޓާސް ކައިރިން ކުރި ހޯދާފައެވެ.

ބުދަ ދުވަހު ކުޅުނު އަންހެން ޑިވިޝަންގެ މެޗުތަކަށް ބަލާއިރު، އެލްކިއުސީ ސްޕޯޓްސް ކްލަބުން ޑީވީވީއޭ ނިއު ސްޓާސް ބަލިކުރީ ތިން ސެޓަށް ގޮސްގެންނެވެ. އެސްޕިރޭޝަން ފޯރ އޯލް އިނީޝިއޭޓިވް ސްޕޯޓްސް ކްލަބު ޑީވީވީއޭ ސްޓާސްއާއި ވާދަކޮށް މޮޅުވީ ސީދާ ދެސެޓުންނެވެ. ވޮލީބޯލް އެކަޑަމީއިން ޕޮލިސް ކްލަބް ސީ ބަލިކުރީ ސީދާ ތިން ސެޓުންނެވެ.