އާޒިމާގެ ފަރާތުން ހައިކޯޓަށް ހުށައެޅި އިސްތިއުނާފު: އޭނާގެ ވަކީލާއި ގުޅޭގޮތުން ދައުލަތުގެ އިއުތިރާޒެއް
އާޒިމާގެ ވަކީލެއްގެ ގޮތުގައި އިންނެވި އެއް ފަރާތަކީ ކުރީގެ ޑެޕިއުޓީ ޕީޖީ މަރިޔަމް ނިހާޔަތު
އައިޝަތު އާޒިމާ ޝަކޫރުގެ ފަރާތުން ހައިކޯޓުގައި އިސްތިއުނާފު ކުރި މައްސަލައިގެ ފުރަތަމަ އަޑުއެހުން
ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީ ލޯންޑަރުކުރުމާއި ގުޅޭ ދެ ދައުވާ މަދަނީ މިންގަނޑުން ކުރިއަށް ގެންދެވޭނެކަމަށް ކްރިމިނަލް ކޯޓުން ނިންމުމުން، އޭނާގެ ފަރާތުން ހައިކޯޓުގައި އިސްތިއުނާފު ކުރި މައްސަލައިގެ ފުރަތަމަ އަޑުއެހުން ހައިކޯޓުގައި ކުރިއަށް ގެންގޮސްފިއެވެ.
ބުދަ ދުވަހު ހައިކޯޓުގައި ކުރިއަށް ދިޔަ މި އަޑުއެހުމުގައި މައްސަލައިގެ ރިޔާސަތު ބަލަހައްޓަވާފައިވަނީ ފަނޑިޔާރު ފާތިމަތު ފަރުހީޒާއެވެ.
އަޑުއެހުން ފައްޓަވަމުން ދައުލަތުގެ ވަކީލުން ވަނީ އާޒިމާ ޝަކޫރުގެ ވަކީލަކީ މި މައްސަލަ އޭރު ޕީޖީ އޮފީހަށް ހުށައަޅައި، ދައުވާ ކުރިއިރުވެސް، ޕީޖީ އޮފީހުގައި އުޅުއްވި ފަރާތެއްކަމަށް ވިދާޅުވެފައެވެ. ވުމާއެކު ޝަރީއަތް ކުރުމާބެހޭ ޖިނާއީ އިޖުރާއަތުގެ ޤަވާއިދުގެ ދަށުން އޭނާއަށް މި މައްސަލައިގައި ވަކީލެއްގެ ގޮތުން ތަމްސީލު ނުކުރެވޭނެކަމަށް ދައުލަތުގެ ވަކީލު ވިދާޅުވިއެވެ.
މި މައްސަލައިގައި އާޒިމާގެ ވަކީލެއްގެ ގޮތުގައި އިންނެވި އެއް ފަރާތަކީ ކުރީގެ ޑެޕިއުޓީ ޕީޖީ މަރިޔަމް ނިހާޔަތުއެވެ. އޭނާ މަޤާމުން އިސްތިއުފާ ދެއްވާފައިވަނީ 12 މާރޗު 2019 ގައެވެ. އަދި މި މައްސަލަ ހުށައެޅިފައިވަނީ އެ އަހަރުގެ ފެބްރުއަރީ މަހުގެ 10 ވަނަ ދުވަހުއެވެ.
އެކަމާއި ގުޅިގެން ނިހާޔަތު ވިދާޅުވީ، މި މައްސަލަ އާއި ގުޅުންހުރި އެއްވެސް ކަމެއްގައި އޭނާ ބައިވެރިވެފައި ނުވާނެ ކަމަށެވެ.
ވަކީލާ ވިދާޅުވީ، ޝަރީއަތް ކުރުމާއި ބެހޭ ޖިނާއީ އިޖުރާއަތުގެ ޤަވާއިދުގެ 146 ވަނަ މާއްދާގެ (ނ) ގެ ދަށުން ބަލާއިރު، އެ މުއްދަތުގައި އިދާރާއަށް ހުށައެޅިފައިވާ ނުވަތަ އިދާރާއިން މަޝްވަރާ ކުރެވިފައިވާ މައްސަަލައެއްނަމަ، ވަކާލާތު ނުކުރެވޭނެ ކަމަށެވެ. އެ މުއްދަތުގައި މައްސަލަ އާއި ގުޅޭގޮތުން މަޝްވަރާއެއްކޮށް ނުވަތަ ބައިވެރިވެފައިވުން ލާޒިމު ނޫންކަމަށް ދައުލަތުގެ ވަކީލާ ވިދާޅުވިއެވެ.
ކުރީގެ ފިރިމީހާ މަރާލިކަމުގެ ކުށުގައި އުމުރަށް ޖަލަށްލުމަށް ކުރި ހުކުމާއި ގުޅިގެން ހެންވޭރު ބައިކެނޑިގޭ މަރިޔަމް ނަޒާހާގެ ފަރާތުން ސުޕްރީމް ކޯޓުގައި އިސްތިއުނާފު ކުރި މައްސަލައިގައިވެސް މިފަދަ ކަމެއް ހިނގާފައިވެއެވެ. އެ މައްސަލައިގައި ދައުލަތުގެ ވަކީލުން ވަނީ ނަޒާހާގެ ވަކީލަކީ އެ މުއްދަތުގައި ޕީޖީ އޮފީހުގައި މަސައްކަތް ކުރައްވާފައިވާ ފަރާތެއްކަން ފާހަގަކުރައްވައި، މި މައްސަލަ އޭރު ކުރިއަށް ދިޔައިރުވެސް އޭނާ ޕީޖީ އޮފީހުގައި އުޅުއްވިކަމަށް ވިދާޅުވެފައެވެ.
ވުމާއެކު ޝަރީއަތް ކުރުމާއި ބެހޭ ޖިނާއީ އިޖުރާއަތުގެ ޤަވާއިދުގެ ދަށުން އޭނާއަށް މި މައްސަލައިގައި ވަކީލެއްގެ ގޮތުން ތަމްސީލު ނުކުރެވޭނެކަމަށް ދައުލަތުގެ ވަކީލު ވިދާޅުވިއެވެ. ނަމަވެސް ނިހާޔަތު ޕިޖީ އޮފީހުގެ މަޤާމަށް ވަޑައިގެންފައިވަނީ މި މައްސަލަ ހައިކޯޓުން ނިންމިފަހުން ކަމަށްވާތީ އޭނާއަށް ސުޕްރީމް ކޯޓުން އޭރު ވަނީ ފުރުސަތު ދެއްވާފައެވެ.
ދިފާއީ ވަކީލު ފަޒްނާ ވިދާޅުވީ، އެ މައްސަލައިގައި ސުޕްރީމް ކޯޓުން ޝަރީއަތް ކުރުމާއި ބެހޭ ޖިނާއީ އިޖުރާއަތުގެ ޤަވާއިދުގެ 146 ވަނަ މާއްދާގެ (ނ) ތަތުބީޤު ކޮށްދީފައިވާ ކަމަށެވެ. އެހެންނަމަވެސް ދައުލަތުގެ ވަކީލާ ވިދާޅުވީ، ސުޕްރީމް ކޯޓުގައި ކުރިއަށްދިޔަ މައްސަލައާއި މި މައްސަލައަކީ މުޅިން ތަފާތު 2 މައްސަލަ ކަމަށެވެ. މައިގަނޑު ގޮތެއްގައި އެ މުއްދަތުގައި އިދާރާއަށް ހުށައެޅިފައިވާ ނުވަތަ އިދާރާއިން މަޝްވަރާ ކުރެވިފައިވާ މައްސަަލައެއްނަމަ، ވަކާލާތު ނުކުރެވޭނެ ކަމަށް ބަޔާންކޮށްފައިވާކަމަށް ދައުލަތުގެ ވަކީލާ ވިދާޅުވިއެވެ.
މީގެއިތުރުން، ގއ ވިލިނގިލީގައި ހިނގާ ދިޔަ މަރުގެ މައްސަލައަކާއި ގުޅިގެން ހައިކޯޓުންވެސް މިފަދަ މައްސަލައެއް ނިންމާފައިވާކަމަށް ވަކީލާ ވިދާޅުވިއެވެ. މި ދެ މައްސަލައިގެ ނިންމުން އައީ ދައުލަތާއި ދެކޮޅަށެވެ. އެހެންނަމަވެސް، މިއީ މުޅިން ތަފާތު ދެ މައްސަލަކަަމަށް ދައުލަތުގެ ވަކީލާ ފާހަގަކުރެއްވިއެވެ.
އެ އިއުތިރާޒާއި ގުޅިގެން ކޯޓުން ނިންމާ ގޮތެއް ދެފަރާތަށް އަންގަވާނެކަމަށް ފަނޑިޔާރު ފަރުހީޒާ ވިދާޅުވިއެވެ. މިއީ 7 ދުވަސްތެރޭ ނިންމަން ޖެހޭ މައްސަލައަކަށްވުމާއެކު، ބުރާސްފަތި ދުވަހުވެސް މައްސަލައިގެ އަޑުއެހުމެއް ބާއްވަވާނެކަމަށް ފަނޑިޔާރު ވިދާޅުވިއެވެ.
