ސީޕީއާއި ވަޒީރު ޤައިދީންނާއެކު ރޯދަވީއްލުން: ޤައިދީން އެދުނީ ޔާޑުގައި ކުޅެވޭނެ އިންތިޒާމު ހަމަޖައްސައިދޭން
މިއީ މިނިސްޓަރުގެ އިސްނެންގެވުމުގެ މަތިން ކުރިއަށްގެންދިޔަ ޙަރަކާތެއް
ހޯމް މިނިސްޓަރު އިމްރާން އާއި ކޮމިޝަނަރ އޮފް ޕޮރިޒަންސް ޤައިދާންނާއެކު ރޯދަ ވީއްލަނީ
ހޯމް މިނިސްޓަރ ޝެއިޙް އިމްރާން އަބްދުﷲ އާއި، ކޮމިޝަނަރ އޮފް ޕްރިޒަންސް (ސީޕީ) އަހުމަދު މުޙައްމަދުފުޅު މާފުށީ ޖަލުގެ ބައެއް ޤައިދީންނާއެކު ރޯދަވީއްލުމަކަށް އިންސާފު ކުރައްވާފައިވާއިރު، ޤައިދީންގެ ފަރާތުން ހުށައެޅި ކަންބޮޑުވުންތަކަށް ޙައްލު ހޯދަވައިދެއްވާނެކަމަށް ސީޕީ ވިދާޅުވެއްޖެއެވެ.
ރަމަޟާން މަހުގެ ފުރަތަމަ ދުވަހު މިނިސްޓަރު ޢިމްރާންގެ އިތުރުން ސީޕީ ވަނީ މާފުށީ ޖަލަށް ވަޑައިގެން, ޤައިދީންނާ އެއް ސުފުރާއެއްގައި ރޯދަވީއްލުމުގައި ބައިވެރިވެވަޑައިގެންފައެވެ. އަދި އެމީހުންގެ ކަންބޮޑުވުންތައް އަޑު އައްސަވާފައިވާއިރު، މިއީ ރޯދަމަހު ޤައިދީންގެ ހާލަތު އިތުރަށް ރަނގަޅުކުރުމަށް ކުރެވޭނީ ކޮން ކަންތައްތަކެއްތޯ ދެނެވަޑައިގަތުމަށް ޤައިދީންނާއެކު ބޭއްވެވި ބައްދަލުކުރެއްވުމެއްކަމަށް އެ އިދާރާތަކުން މައުލޫމާތުދެއެވެ.
މިކަމާއި ގުޅޭގޮތުން ރާއްޖެއެމްވީން ސުވާލު ކުރުމުން ސީޕީ ވިދާޅުވީ، މާފުށީ ޖަލުގެ ޔުނިޓެއްގެ ޤައިދީންނާއެކު ބޭއްވި މި ރޯދަވީއްލުމުގައި އެ ޔުނިޓުގެ ޤައިދީންގެ ފަރާތުން މައިގަނޑު ގޮތެއްގައި ފާހަގަކުރި އެއް ކަމަކީ ރޭގަނޑު ގަޑީގައި ޔާޑުގައި ކަސްރަތުކޮށްލަން ނުކުމެ އުޅެވޭނެ އިންތިޒާމު ހަމަޖެއްސުން ކަމަށެވެ. އެކަން މިހާރު ކުރިއަށްދާކަން ފާހަގަކުރައްވައި ސީޕީ ވިދާޅުވީ، އެތަނުގައި މާކަރީ ލައިޓެއް ހަރުކޮށްގެން އެ އިންތިޒާމު ހަމަޖެއްސުމުގެ މަސައްކަތް މިހާރު ކުރިއަށްދާ ކަމަށެވެ.
ސީޕީ ވިދާޅުވީ، ފިނިފެން ނުލިބުމުގެ ޝަކުވާއާއި، ޔުނިޓުގައި ހުރި މަރާމާތު ކުރަން ޖެހިފައިވާ ގޮޅިތަކާއި ގުޅޭ ކަންބޮޑުވުންތައްވެސް ބައެއް ޤައިދީންގެ ފަރާތުން ފާހަގަކުރި ކަމަށެވެ. އެ ކަންކަމަށްވެސް ޙައްލު ހޯދުމަށް މަސައްކަތްތަކެއް ކުރުމަށް މަޝްވަރާ ކުރެވިފައިވާކަމަށް ސީޕީ ވިދާޅުވިއެވެ. އަދި ވަކިވަކި ޤައިދީންގެ ފަރާތުންވެސް ވަނީ ބައެއް ކަންބޮޑުވުންތައް ހިއްސާ ކޮށްފައެވެ.
މިއީ މިނިސްޓަރުގެ އިސްނެންގެވުމުގެ މަތިން ޖަލުގައި ދޭ ކޮއްތުގެ ޙާލަތު ބެލުމަށާއި، ޖަލުގެ ޙާލަތު ގާތުން ބެއްލެވުމަށް ނިންމެވި ނިންމެވުމެއްކަން ސީޕީ ފާހަގަކުރެއްވިއެވެ. ސީޕީ ވިދާޅުވި ގޮތުގައި ޤައިދީންނަށް ރަމަަޟާން މަހުވެސް އެކަށީގެންވާ ގޮތެއްގައި ރޯދަ ވީއްލާނެ އިންތިޒާމު ވަނީ ހަމަޖެހިފައެވެ.
ޤައިދީން ރަނގަޅު ބައެއްގެ ގޮތުގައި އަނބުރައި މުޖުތަމަޢަށް ނެރުމަށް ސަރުކާރުން ބޮޑު އިސްކަމެއް ދެއްވާ ކަމަށާއި، އެ މަސައްކަތް ހުއްޓާނުލައްވައި ކުރައްވަމުން ގެންދަވާނެކަމަށް ހޯމް މިނިސްޓަރު ވަނީ ވިދާޅުވެފައެވެ. އަދި ޤައިދީންނާއެކު ހޮނިހިރު ދުވަހު ރޯދަވީއްލުމުގެ ތެރެއިން ހޭދަކުރެއްވި ވަގުތުތަކަކީ އެކަންކަން ދެނެވަޑައިގަތުމަށް ބޭއްވެވި ބައްދަލުކުރެއްވުމެއް ކަމަށް މިނިސްޓަރު ވިދާޅުވިއެވެ.
ރޯދަމަހުގެ ތެރޭގައި ޖަލުގެ އެކި ޔުނިޓްތަކުގައި ތިބި ޤައިދީންނާއެކު މިފަދަ ބައްދަލުވުންތައް ކުރިއަށް ގެންދަވަން މިނިސްޓަރު ވަނީ ނިންމަވާފައެވެ. މީގެކުރިންވެސް މިނިސްޓަރު ގެންދެވީ ޖަލަށްވަޑައިގެން ޤައިދީންނާ ބައްދަލުކުރައްވައި, ޤައިދީންގެ ހާލަތު ގާތުން އޮޅުންފިލުއްވަމުންނެވެ.
