އިންޑިއާގެ ހިލޭ އެހީގެ ދަށުން ގާއިމްކުރި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ހުޅުވައިފި
މިތަނުގައި ފުލުހުންގެ ތަމްރީނުތަކާއި ޕްރޮގްރާމްތައް ކުރިއަށް ގެންދާނެ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު (ވ) އަދި އިންޑިއާގެ އެކްސްޓަރނަލް އެފެއަރޒް މިނިސްޓަރ ޖަޔަރ ޝަންކަރު (ކ) ޕޮލިސް ކޮލެޖް ހުޅުވައިދެއްވަނީ
އިންޑިއާ ސަރުކާރުގެ ހިލޭ އެހީގައި އައްޑޫ ސިޓީގައި ޤާއިމްކުރި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ހުޅުއްވައިދެއްވައިފިއެވެ. މި މުހިންމު އިމާރާތް ހުޅުވާދެއްވުމުގައި އިންޑިއާގެ އެކްސްޓާނަލް އެފެއަރޒް މިނިސްޓަރު ޑރ. ސުބްރަމާނިޔަމް ޖައިޝަންކަރް ވެސް ރައީސްގެ އަރިހުގައި ބައިވެރިވެވަޑައިގެންފައި ވެއެވެ.
ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް ރަސްމީކޮން ހުޅުވުމަށް، އެއިމާރާތުގައި އާދީއްތަ ދުވަހުގެ ހެނދުނު ބޭއްވި ރަސްމިއްޔާތުގައި މިނިިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު އާއި، މިނިސްޓަރ އޮފް ހޯމް އެފެއަރޒް އިމްރާން ޢަބްދުﷲ އާއި ރައްޖޭގައި ހުންނަވާ އިންޑިއާ ސަފީރާ މުނޫ މަހާވަރު އާއި ކޮމިޝަނަރ އޮފް ޕޮލިސް މުޙައްމަދު ޙަމީދު އާއި ރައްޔިތުން މަޖިލިހުގެ އައްޑޫ ސިޓީގެ ބައެއް މެމްބަރުންނާއި އައްޑޫ ސިޓީ މޭޔަރ ގެއިތުރުން ފުލުހުންގެ އެހާރާއި މިހާރުގެ އިސް ބައެއް އޮފިސަރުން ބައިވެރިވެލެއްވިއެވެ.
މިރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ދެއްކެވި ވާހަަކަފުޅުގައި މިއަދު ހުޅުވިގެންދިޔަ ނޭޝަނަލް ކޮލެޖް އޮފް ޕޮލިސިންގ އެންޑްް ލޯ އެންފޯސްމަންޓަކީ ދިވެހި ފުލުހުންގެ ހިދުމަތް ތަރައްގީކުރުމަށް ވަރަށް މުހިންމު ތަނަކަށް ވެގެންދާނެކަން ފާހަގަކުރައްވައި، މިފަދަ ދީލަތި ބޮޑު އެހީއެއް ވެދެއްވިކަމަށްޓަކައި އިންޑިއާ ސަރުކާރަށް ޝުކުރު އަދާކުރައްވާފައި ވެއެވެ.
މި ކޮލެޖާއެކު ފުލުހުންގެ އިތުރުން ގާނޫނު ތަންފީޒުކުރާ އެހެނިހެން މުއައްސަސާތަކަށް ދިމާވާ ދަތިތަކަށް ތައުލީމީ ގޮތުންނާއި ތަމްރީނުގެ ގޮތުން ހައްލު ލިބިގެންދާނެއެވެ. އަދި މި މަރުކަޒަކީ ޕޮލިސިންގ އެންޑް ލޯ އެންފޯސްމަންޓް ދާއިރާއިން އައު ތަމްރީނުތަކާއި ތައުލީމު ފުރުސަތުތަކަށް ހުޅިވެގެންދާ ދޮރެކެވެ. އަދި މި ކޮލެޖާއެކު ފުލުހުންގެ ގާނޫނުގައި ބަޔާންކުރާ ގޮތުގައި ހިދުމަތް ފޯރުކޮށްދިނުމަށް ބޭނުންވާ ތަމްރީނުތަކަށް ބޮޑު ފަސޭހަތަކެއް ލިބިގެންދާނެއެވެ.
މި ކޮލެޖުގައި އޮޑިޓޯރިއަމް އަކާއި، ޕޫލަކާއި، ސިންތެޓިކް ޓްރެކެއްގެ އިތުރުން، އެކަމަޑޭޝަން ބްލޮކާއި ބެރެކްސް އަދި ތަމްރީނަށް ބޭނުންވާ އިތުރު ވަސީލަތްތައް ވަނީ ގާއިމް ކޮށްފައެވެ. މިއީ ސައްތައިން ސައްތަ ރާއްޖޭގެ މިލްކުވެރިތަނެކެވެ. އަދި މިތަނަކީ ކުރިއަށް އޮތްތަނުގައި ފުލުހުންގެ ގިނަ ތަމްރީނުތަކާއި ޕްރޮގްރާމްތައް ކުރިއަށްގެންދާނެ ތަނެވެ. މިއީ އިންޑިއާގެ ހިލޭ އެހީގެ ދަށުން ގާއިމްކޮށްފައިވާ ތަނެކެވެ.
