މިދިޔަ އަހަރު 600ށް ވުރެ ގިނަ މީހުން ޓީބީ ބައްޔަށް ފަރުވާ ހޯދަން ފަށާފައިވޭ
މިއަހަރުގެ މިހާތަނަށް 20 މީހުން ޓީބީއަށް ޕޮޒިޓިވްވެފައިވޭ
ރާއްޖެޓީވީގެ ފަލަސުރުހީ ޕްރޮގްރާމްގައި އައިޖީއެމްއެޗުގެ އެތެރެހަށީގެ ޑރ. މުހައްމަދު އަލީ ވާހަކަދައްކަވަނީ
މިދިޔަ އަހަރު 600އަށް ވުރެ ގިނަ މީހުން ޓީބީ ބައްޔަށް ފަރުވާ ހޯދަން ފަށާފައިވާ ކަމަށް އައިޖީއެމްއެޗުގެ އެތެރެހަށީގެ ޑރ. މުހައްމަދު އަލީ ވިދާޅުވެއްޖެއެވެ.
ޓީބީއާ ބެހޭ ގޮތުން ރާއްޖެޓީވީގައި ވާހަކަދައްކަވަމުން ޑރ.މުހައްމަދު ވިދާޅުވީ ޓީބީ އަކީ ބެކްޓީރިއާގެ ސަބަބުން ޖެހޭ ބައްޔެއް ކަމަށާއި، ފަރުވާ ހޯދަންޖެހޭ ބައްޔެއް ކަމަށެވެ. އަދި ފަރުވާ ނުހޯދިއްޖެނަމަ ފުރާނައަށް ނުރައްކާތެރި ބައްޔެއްގެ ގޮތުގައި ޑރ.މުހައްމަދު ސިފަކުރެއްވިއެވެ.
ޓީބީއަށް ފަރުވާ ހޯދަމުންދާ ގިނަ ބަޔަކު ތިބިކަން ފާހަގަކުރައްވައި ޑރ.މުހައްމަދު ވިދާޅުވީ މިދިޔަ އަހަރު އެކަނި ވެސް 600އަށް ވުރެ ގިނަ މީހުން ޓީބީއަށް ފަރުވާ ހޯދަން ފަށާފައިވާ ކަމަށެވެ. މީގެ ތެރޭގައި އަލަށް ޕޮޒިޓިވްވި މީހުންނާއި، ފަރުވާ ހޯދަމުން އައި މީހުން ހިމެނޭ ކަމަށް ޑރ.މުހައްމަދު އަލީ ވިދާޅުވިއެވެ. އަދި ވިދާޅުވީ މިއަހަރުގެ މިހާތަނަށް 20 މީހުން ޓީބީއަށް ޕޮޒިޓިވްވެފައިވާ ކަމަށެވެ.
ޑޮކްޓަރ މުހައްމަދު އަލީ ވިދާޅުވީ ޓީބީ ޖެހުމުން ކާހިތްނުވުމާއި، ބަރުދަން ލުއިވުމާއި، ޚާއްސަކޮށް ރޭގަނޑަށް ހުން އައުން ފަދަ އަލާމަތްތައް ފެންނާނެ ކަމަށެވެ. ފުއްޕާމެއަށް ޖެހިއްޖެނަމަ ކެއްސުމާއި، އަދި ކުޅުގައި ލޭ ހުންނާނެ ކަމަށް ޑރ.މުހައްމަދު އަލީ ވިދާޅުވިއެވެ. އަދި ވިދާޅުވީ ހައެއް ނުވަތަ އަށް ހަފްތާއަށް ކެއްސުން ދިގުދެމިގެންދާނަމަ ޑޮކްޓަރަށް ދައްކައި ޓެސްޓު ކުރަންޖެހޭ ކަމަށެވެ. އާއްމުކޮށް ފެންނަ ޓީބީގެ ވައްތަރުތަކަށް އިޝާރަތްކުރައްވައި ޑރ.މުހައްމަދު ވިދާޅުވީ ލިންފްނޯޑަށް ޖެހޭ ޓީބީ، އުރަމައްޗަށް ޖެހޭ ޓީބީ، ކިޑްނީއަށް ނުވަތަ ކުޑަ ކަމުދާ ނިޒާމަށް ޖެހޭ ޓީބީ އަދި ކައްޓާއި ހަމައަށް ޖެހޭ ޓީބީ އާއްމުކޮށް ފެންނަ ކަމަށެވެ. ނަމަވެސް ރާއްޖޭގައި ބޮޑަށް ފެންނަނީ ފުއްޕާމެއަށް ޖެހޭ ޓީބީ އާއި ލިންފްނޯޑަށް ޖެހޭ ޓީބީ ކަމަށް ޑރ. މުހައްމަދު ވިދާޅުވިއެވެ. އަދި ވިދާޅުވީ ބައެއްފަހަރު އުރަމައްޗަށް ޖެހޭ ޓީބީއާ މަދުން ނަމަވެސް ކުޑަކަމުދާ ނިޒާމުގެ ޓީބީ ފެންނަ ކަމަށެވެ.
މީގެ އިތުރުން ޑރ.މުހައްމަދު އަލީ ވިދާޅުވީ ރާއްޖޭގައި ޓީބީ ނައްތާލުމުގެ މަސައްކަތް ފުރަތަމަ ފެށިގެން އައީ ޅ.އަތޮޅުން ކަމަށާއި، އެދުވަސްވަރު ޅ.އަތޮޅާއި ށ.އަތޮޅުން ވަރަށް ގިނަ ޓީބީގެ ކޭސްތައް ފެނުނު ކަމަށެވެ. ނަމަވެސް މިހާރު ޓީބީގެ އެންމެ ގިނަ ކޭސް ފެންނަނީ މާލެ ސަރަހައްދުން ކަމަށް ޑރ.މުހައްމަދު ވިދާޅުވިއެވެ.
ޓީބީ ޖެހުމުން ހަށިގަނޑުގެ ގިނަގުނަވަންތަކަށް އަސަރުކުރެއެވެ. އަދި މިއީ ފަސޭހައިން ފެތުރޭ ބައްޔެއް ވެސް މެއެވެ.
2030 އާއި ހަމައަށް ދުނިޔެއިން ޓީބީ ނައްތާލުމަކީ ދެމެހެއްޓެނިވި ތަރައްގީގެ އެޖެންޑާގެ ފުރިހަމަ ސިއްހަތާއި ދުޅަހެޔޮކަން ހާސިލްކުރުމުގެ ލަނޑުދަނޑީގައި ހިމެނޭ ކަމެކެވެ. ރާއްޖެއިން ޓީބީ ނައްތާލުމަށް ކަނޑައަޅާފައިވާ ލަނޑުދަނޑީގެ ދަށުން ދުނިޔޭގެ ސިއްހަތު ޖަމްއިއްޔާގެ ލަފަޔާއެކު، ސްޓްރެޓެޖިކް ޕްލޭނެއްވެސް ވަނީ އެކުލަވާލާފައެވެ.
