ފައިނޭންސްގެ ދާއިރާގެ ކޯސްތައް ހިންގުމަށް، އިސްލާމިކް ޔުނިވަރސިޓީން މެލޭޝިޔާގެ 2 ޔުނިވަރސިޓީއަކާއެކު އެމްއޯޔޫއެއްގައި ސޮއިކޮށްފި
އިސްލާމިކް ފައިނޭންސް ދާއިރާގެ ކޯސްތައް ހިންގައި، އެ ކޯސްތަކުން ލިބޭ ނަފާ 3 މުއައްސަސާގެ މައްޗަށް އެއް އުސޫލެއްގެ ދަށުން ބެހިގެންދާނެ
އައިޔޫއެމްއިން، މެލޭޝިޔާގެ އިންޓަރނޭޝަނަލް ސެންޓަރ ފޯރ އެޑިޔުކޭޝަން އިން އިސްލާމިކް ފައިނޭންސް އަދި އިސްރާ އިންޓަރނޭޝަނަލް ކޮންސަލްޓިންގ އެސް.ޑީ.އެން ބީ.އެޗް.ޑީއާއެކު އެއްބަސްވުމެއްގައި ސޮއިކުރުން
ދިވެހިރާއްޖޭގެ އިސްލާމީ ޔުނިވަރސިޓީއާއި މެލޭޝިޔާގެ އިންޓަރނޭޝަނަލް ސެންޓަރ ފޯރ އެޑިޔުކޭޝަން އިން އިސްލާމިކް ފައިނޭންސްއާއި އިސްރާ އިންޓަރނޭޝަނަލް ކޮންސަލްޓިންގ އެސް.ޑީ.އެން ބީ.އެޗް.ޑީއާއެކު އެމް.އޯ.ޔޫއެއްގައި ސޮއިކޮށްފިއެވެ.
މި އެއްބަސްވުމުގެ މައިގަނޑު މަގުސަދަކީ އިސްލާމިކް ފައިނޭންސްގެ ދާއިރާ އިތުރަށް ފުޅާކޮށް ހަރުދަނާކުރުމަށްޓަކައި ދިވެހިރާއްޖޭގެ އިސްލާމީ ޔުނިވަރސިޓީއާއި މެލޭޝިޔާގެ އިންޓަރނޭޝަނަލް ސެންޓަރ ފޯރ އެޑިޔުކޭޝަން އިން އިސްލާމިކް ފައިނޭންސް އަދި އިސްރާ އިންޓަރނޭޝަނަލް ކޮންސަލްޓިންގ އެސް..ޑީ.އެން ބީ.އެޗް.ޑީ ގުޅިގެން މަސައްކަތްކުރުމަށްޓަކައި އެކުލަވާލެވޭ އެމް.އޯ.ޔޫ އެކެވެ.
މި އެއްބަސްވުމުގެ ދަށުން އިސްލާމިކް ފައިނޭންސް ދާއިރާގެ ކޯސްތައް ހިންގައި، އެ ކޯސްތަކުން ލިބޭ ނަފާ 3 މުއައްސަސާގެ މައްޗަށް އެއް އުސޫލެއްގެ ދަށުން ބެހިގެންދާނެއެވެ.
މި އެމް.އޯ.ޔޫގައި ސޮއިކުރުމަށް ޒޫމް ޕްލެޓްފޯމް މެދުވެރިކޮށް ބޭއްވުނު ރަސްމިއްޔާތުގައި ދިވެހިރާއްޖޭގެ އިސްލާމީ ޔުނިވަރސިޓީގެ ފަރާތުން އެމް.އޯ.ޔޫގައި ސޮއިކުރެއްވީ ވައިސް ޗާންސެލަރ ޑރ. އިބްރާހީމް ޒަކަރިއްޔާ މޫސާ އެވެ. އަދި އިސްރާ އިންޓަރނޭޝަނަލް ކޮންސަލްޓިންގ އެސް.ޑީ.އެން ބީ.އެޗް.ޑީގެ ފަރާތުން ސޮއިކުރެއްވީ އެ ޔުނިވަރސިޓީގެ ރައީސް އަދި ސީ.އީ.އޯ ޕްރޮފެސަރ ޑާޓޯ ޑރ. އާޒްމީ އުމަރެވެ. މި ރަސްމިއްޔާތުގައި ދެ ޔުނިވަރސިޓީގެ މެނޭޖްމެންޓް ލެވެލްގެ ބޭފުޅުން ބައިވެރިވެވަޑައިގަތެވެ.
