އެހެން ރަށްރަށަށް ގުރުއާން ކިޔަވައިދޭން ދާން އެއްބަސްވާ ޓީޗަރުންނަށް އިތުރު އެލަވަންސެއް!
މާލެ ފަދަ ބޮޑެތި ސިޓީތަކުން ގުރުއާން ޓީޗަރުން ލިބޭ، އަތޮޅުތެރެއަށް ދާނެ ޓީޗަރުން ނުލިބޭ
ތިން މަހަށްވުރެ ގިނަ ދުވަހަށްފަހު ސްކޫލްތައް ހުޅުވާލުން
އެހެން ރަށަކަށް ގޮސް ގުރުއާން ކިޔަވައިދޭން އެއްބަސްވާ މުދައްރިސުންނަށް އިތުރު އެލަވަންސެއް ދޭން ނިންމާފައިވާކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
އަންގާރަ ދުވަހު ސްކޫލްތަކުގެ ކިޔެވުން ފެށުމަށް ވެފައިވާ ތައްޔާރީތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރު އައިޝަތު އަލީ ވިދާޅުވީ ރާއްޖޭގެ 5 ސްކޫލެއްގައި ގުރުއާން ކިޔަވައިދިނުމަށް ބޭރުން ގުރުއާން ޓީޗަރުން ގެންނަންޖެހުނީ ތަކުރާރުކޮށް އިއުލާނުކުރުމުން ވެސް އެ ރަށްރަށަށް ދާނެ ގުރުއާން ޓީޗަރުން ރާއްޖެއިން ނުލިބިގެން ކަމަށެވެ. މިނިސްޓަރު ވިދާޅުވީ ރާއްޖެއިން ބޭރުން ވިޔަސް ގުރުއާން ޓީޗަރުން ގެންނަންޖެހެނީ ކުދިންގެ ކިޔެވުން ނުހުއްޓި ކުރިއަށްގެންދިއުމަށް ކަމަށެވެ.
މާލެ ފަދަ ބޮޑެތި ސިޓީތަކުން ގުރުއާން ޓީޗަރުން ލިބޭ ކަމަށާއި، އެހެންނަމަވެސް އަތޮޅުތެރެއަށް ކިޔަވައިދޭން ދާނެ ޓީޗަރުން ނުވާކަމަށް މިނިސްޓަރު ވިދާޅުވިއެވެ. އެހެންކަމުން އެހެން ރަށަކަށް ގޮސް ގުރުއާން ކިޔަވައިދޭން އެއްބަސްވާ ޓީޗަރުންނަށް އިތުރު އެލަވަންސެއް ދޭން ރައީސުލްޖުމްހޫރިއްޔާ އެއްބަސްވެވަޑައިގެންފައިވާކަމަށް ޑރ. އައިޝަތު އަލީ ވިދާޅުވިއެވެ. މިހާރު އެކަން ހަމަޖެހިފައިވާކަމަަށް މިނިސްޓަރު ވިދާޅުވިއެވެ.
މީގެ އިތުރުން ރާއްޖޭގައި ތިބި ގުރުއާން މުދައްރިސުން އިތުރުކުރުމަށް ގުރުއާން މުދައްރިސުން ތަމްރީނުކުރުމުގެ ޕްރޮގްރާމެއް މި އޮގަސްޓު މަހުގެތެރޭގައި ފަށަން ނިންމާފައިވާކަމަށް މިނިސްޓަރު ވިދާޅުވިއެވެ. މި ޕްރޮގްރާމުތައް ކުރިއަށްގެންދާނީ އިސްލާމިކް ޔުނިވާސިޓީއާއި، ކީރިތި ގުރުއާނާބެހޭ މަރުކަޒާ ގުޅިގެން ކަމަށް މިނިސްޓަރު ޑރ. އައިޝަތު އަލީ ވިދާޅުވިއެވެ. މި ޕްރޮގްރާމް ކުރިއަށްގެންދާނީ ގުރުއާން މުދައްރިސުން ބޭނުންވާ ރަށްތަކަށް ޚާއްސަ އިސްކަމެއް ދީގެން ކަމަށާއި، އެ ރަށްތަކުގައި މި ޕްރޮގްރާމް ހިންގިގެންދާނެ ކަމަށް މިނިސްޓަރު ވިދާޅުވިއެވެ. މި ޕްރޮގްރާމުގެ ތެރެއިން 200 ވަރަކަށް ގުރުއާން މުދައްރިސުން ތަމްރީނުކުރެވިގެންދާނެ ކަމަށް މިނިސްޓަރު ވަނީ ވިދާޅުވެފައެވެ.
މި ޕްރޮގްރާމުގެ އިތުރުން ކުރިއަށް އޮތް 10 އަހަރަށް އެކި ދާއިރާތަކުން މުދައްރިސުން ތަމްރީނުކުރުމުގެ މަސައްކަތް މިފަދަ ކަންކަމަށް ޚާއްސަ ފަރާތްތަކާ ގުޅިގެން މިހާރު ވެސް ކުރިއަށްދާކަމަށް މިނިސްޓަރު ވަނީ ވިދާޅުވެފައެވެ.
