ރަމަޟާން މަހުގެ އިނާޔަތް ހޯމަ ދުވަހު ދޭން އަންގައިފި
ރަމަޟާން އިނާޔަތުގެ ގޮތުގައި ވަޒީފާ އަދާކުރާ ކޮންމެ މުސްލިމު މުވައްޒަފަކަށް 3000 ރުފިޔާ ދޭން ޖެހޭނެ
ވެލާނާގެ
މިއަހަރުގެ ރަމަޟާން މަހުގެ އިނާޔަތު ފައިސާ މުވައްޒަފުންނަށް މާރޗް މަހުގެ 28 ވާ ހޯމަ ދުވަހު ދިނުމަށް ފިނޭންސް މިނިސްޓްރީން އޮފީސްތަކަށް އަންގައިފިއެވެ.
ފިނޭންސް މިނިސްޓްރީން ނެރެފައިވާ ސަރކިޔުލަރެއްގައި ބުނެފައިވަނީ ރަމަޟާން މަހުގެ އިނާޔަތު ފައިސާގެ ގޮތުގައި ދިނުމަށް ހަމަޖެހިފައިވަނީ ވަޒީފާއާއި ބެހޭ ގާނޫނަށް ގެނެވުނު އިސްލާހުގައިވާ ގޮތަށް ވަޒީފާ އަދާކުރާ ކޮންމެ މުސްލިމު މުވައްޒަފަކަށް 3000 ރުފިޔާކަމުގައެވެ.
މުސާރަ ލިބޭގޮތަށް އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތުގެ ފައިސާ ދޭއިރު ހަމައެކަނި އެ މުވައްޒަފެއްގެ އަސާސީ ވަޒީފާ އޮންނަ އޮފީހަކުން އިނާޔަތުގެ ފައިސާ ދިނުމަށާއި އަދި އިތުރު ވަޒީފާ އަދާކުރާ އޮފީހަކުން އިނާޔަތުގެ ފައިސާ ނުދިނުމަށް ވަނީ އެދިފައެވެ.
މީގެއިތުރުން އިނާޔަތްދޭއިރު ރަމަޟާން މަސް ފެށޭއިރު އޮފީހަށް ޚިދުމަތް ނުލިބޭ ގޮތަށް ޕޭ ލީވް އަދި ނޯ ޕޭ ލީވްގައި ތިބޭ މުވައްޒަފުންނަށް އިނާޔަތުގެ ފައިސާ ހަމަޖައްސައި ނުދިނުމަށް ފިނޭންސް މިނިސްޓްރީގެ ސަރކިޔުލާގައި ބުނެފައިވެއެވެ.
މިފަދަ ލީވް އެއްގައި ހުންނަ މުވައްޒަފަކު ރަމަޟާން މަހުގެ ތެރޭގައި އެނބުރި ޚިދުމަތަށް ނުކުމެއްޖެނަމަ އެދުވަހަކުން ފެށިގެން ރަމަޟާން މަހުގެ ނިޔަލަށް ޖެހޭ އަދަދެއް ބަލައި އެ އަދަދަށް އިނާޔަތުގެ ފައިސާ ދިނުމަށްވަނީ އެދިފައެވެ. މީގެއިތުރުން ރަމަޟާން މަހުގެ ތެރޭގައި މިފަދަ ލީވް އެއްގައި ހުރި މުވައްޒަފަކު ޚިދުމަތުން ވަކިވާނަމަ، ވަކިވި ދުވަހާއި ހަމައަށް ފައިސާ ފިޔަވައި އިތުރުވާ ފައިސާ އެމުވައްޒަފެއްގެ އަތުން ހޯދައި އެފައިސާ އަނބުރާ ޖަމާކުރަންވާނެކަމަށްވެސް ސަރކިޔުލާގައި ބުނެފައިވެއެވެ.
ދައުލަތުގެ އެކައުންޓިންގ ސޮފްޓްވެއަރ ގެ އެކައުންޓްސް ޕޭޔަބަލް މޮޑިޔުލް ބޭނުންކުރާ އޮފީސްތަކުން އިނާޔަތު ފައިސާގެ ވައުޗަރުތައް 24 މާރޗްގެ ކުރިން ޕޯސްޓް ކުރުމަށްވެސް ފިނޭންސް މިނިސްޓްރީން ވަނީ އެދިފައެވެ.
