އިންތިޚާބު ލަސްކުރުމަކީ ޕީޕީއެމްގެ ގޮތެއް - އީވާ
އީވާ ތާއީދު ކުރައްވަނީ ޗެއާޕަރސަން ކަމަށް ކުރިމަތިލައްވަފައިވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީއަށް
އީވާ އަބްދުﷲ - ގަލޮޅު އުތުރު ދާއިރާގެ މެމްބަރު
އިންތިޚާބު ލަސްކުރުމަކީ ޕީޕީއެމްގެ ގޮތެއް ކަމަށް ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވިއެވެ.
އީވާ މިހެން ވިދާޅުވީ، އެމްޑީޕީގެ ޗެއާޕާސަންގެ އިންތިޚާބު ބާއްވާ ތާރީޚު ކަނޑައެޅުމުގެ މައްސަލާގައި އަންގާރަ ދުވަހުގެ ރޭ އޮތް އެމްޑީޕީގެ ގައުމީ މަޖިލީހުގެ ޖަލްސާގައި ވަހަކަފުޅު ދައްކަވަމުންނެވެ. އީވާ ވިދާޅުވީ، ހަނދާނަށް އަންނަނީ، 2013ގެ އިންތިޚާބު ކަމަށާއި، އެ އިންތިޚާބު ރައީސް ނަޝީދަށް ކާމިިޔާބު ނުވާނެ ގޮތަށް ޕީޕީއެމުން އިންތިޚާބުގެ ތާރީޚު ބަދަލުކުރަމުން ދިޔަ ކަމަށެވެ. އެމްޑީޕީން އަބަދުވެސް ގޮވަމުން ދިޔައީ އިންތިޚާބު ގަޑިއަށް ބޭއްވުމަށް ކަަމަށެވެ. އެކަމަކީ ރައްޔިތުންގެ އިތުބާރު އެ އިންތިޚާބާއި ދެތެރޭ އުފެދޭނެކަމެއް ކަމަށް އީވާ ވިދާޅުވިއެވެ.
އެހެންކަމުން އިންތިޚާބު ބޭއްވުމަށް ގައުމީ މަޖިލީހުން ފާސްކުރި ތާރީޚުގައި އިންތިޚާބު ބޭއްވުމަށް ތާއީދު ކުރައްވާ ކަމަށެވެ. މީގެ ކުރިންވެސް އެމްޑީޕީން ރަމަޟާން މަހު ކެމްޕެއިންކޮށް އިންތިޚާބުތައް ބޭއްވިކަމަށް ވިދާޅުވިއެވެ.
އިންތިޚާބު ލަސްުކުރުމަކީ މުޑުދާރުކަމެއް ކަމަށް ސިފަ ކުރައްްވައި އީވާ ވިދާޅުވީ، އިންތިޚާބު ލަސްުކުރުމަކީ އަނެއް ކެންޑިޑޭޓަށް އޮތް ޔަގީންކަން ގެއްލުުމުން ކުރާކަމެއް ކަމަށެވެ.
އީވާ ތާއީދު ކުރައްވަނީ ޗެއާޕަރސަން ކަމަށް ކުރިމަތިލައްވަފައިވާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އަށެވެ. ދެން އެ މަގާމަށް ކުރިމަތިލައްވާފައިވަނީ، އިކޮނޮމިކް މިނިސްޓަރު ފައްޔާޒު އިސްމާއީލެވެ.
އިވާގެ ވަހަކައަށް ރައްދުދެއްވައި ހުޅުމީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ގައުމީ މަޖިލީހުން ކަމެއް ނިންމަން ޖެހެނީ ވަކި ބަޔަކު ކަމެއް ބޭނުންވުމުން އެކަނި ނޫން ކަމަށެވެ. ރޮޒައިނާ ވަނީ، 2018 ވަނަ އަހަރުގެ ރިޔާސީ އިންތިޚާބުގައި ރައީސް ނަޝީދު ވާދަ ނުކުރެއްވުމުން އެ މަނިކުފާނަށް ތާއީދުކުރައްވާ މެމްބަރުން އެމްޑީޕީން އޭރު ރިޔާސީ ކެންޑިޑޭޓަކު ނުނެރެން ވަކާލާތުކުރީ ޑިމޮކްރަޓިކް އުސޫލަކުންތޯ ސުވާލު އުފައްދަވާފައެވެ.
ޖަލްސާގައި ގައުމީ މަޖިލީހުގެ މެމްބަރުންވަނީ އެއް ބޭފުޅަކު އަނެއް ބޭފުޅަކަށް ހޫނުގަދަ ރައްދުތަކެއް ދެއްވާފައެވެ.
ފައްޔާޒު ހުށައެޅުއްވި ގޮތަށް، މެއި މަހުގެ 14 ވަނަ ދުވަހު އިންތިޚާބު ބޭއްވުމަށް ފާސްކުރަން 100 މެމްބަރުން ވޯޓު ދެއްވިއެވެ. ދެކޮޅަށް ވޯޓު ދެއްވީ 15 މެމްބަރުންނެވެ. ޖަލްސާގައި ބައިވެރިވެވަޑައިގެންނެވީ 115 މެމްބަރުންނެވެ.
