ރަމަޟާން މަހަށް ޚާއްސަކޮށްގެން ގިނަ ޕްރޮގްރާމްތަކެއް ކުރިއަށް ގެންދަނީ

ރޯދަ މަހަށް ޚާއްސަކޮށްގެން ގިނަ ޕްރޮގްރާމްތަކެއް ކުރިއަށް ގެންދިއުމަށް މާލެ ސިޓީ ކައުންސިލުން ނިންމައިފިއެވެ.

ރަމަޟާން މަހަށް ޚާއްސަކޮށްގެން ކުރިއަށްގެންދާ ކަންތައްތަކުގެ ތެރޭގައި ކުޑަކުދިންނަށް ޚާއްސަ ޕްރޮގްރާމްތަކެއް ހިމަނާފައިވެއެވެ. އޭގެ ތެރޭގައި 6 އަހަރުން ދަށާއި، 9 އަހަރުން ދަށާއި، 12 އަހަރުން ދަށަށް ޚާއްސަކޮށްގެން ސިޓީ ކައުންސިލުން ރާވައިގެން މަދަހަ މުބާރާތެއް ކުރިއަށް ގެންދިއުމާއި، ހެޔޮއެދޭ ފަރާތްތަކާއި މަޝްވަރާކޮށްގެން ޤުރުއާން މުބާރާތެއް ކުރިއަށް ގެންދިއުން ހިމެނެއެވެ. މި ޕްރޮގްރާމްތައް ކުރިއަށް ގެންދަން ނިންމާފައިވަނީ ކައުންސިލުގެ 4 ވަނަ ދައުރުގެ 41 ވަނަ ޖަލްސާގައެވެ.

މިއީ މުޅި މާލެ ސިޓީއަށް ހުޅުވާލައިގެން ކުރިއަށް ގެންދާ މުބާރާތަކެކެވެ.

މީގެ އިތުރުން ރަމަޟާން މަހަކީ އަޅުކަމުގެ މައްސަރު ކަމުން އިސްލާމިކް މިނިސްޓްރީ އާއި މަޝްވަރާކޮށްގެން ޢަޞްރު ނަމާދަށްފަހު މާލޭގެ ހުރިހާ މިސްކިތެއްގައި ދަރުސް ދެވޭނެ އިންތިޒާމްތައް ހަމަޖެއްސުމާއި، އަމިއްލަ ޖަމާއަތްތަކުން މީގެ ކުރިން ކުރިއަށް ގެންދިޔަ ފޯރުންތެރިކަން ނެތް މީހުންނަށް ރޯދަ ވީއްލުމަށް ކާބޯތަކެތި ފޯރުކޮށްދިނުމުގެ ޕްރޮގްރާމް ކުރިއަށް ދޭތޯ ބަލައި، އެކަން ކުރިއަށްދާނަމަ އެ ޕްރޮގްރާމް ކާމިޔާބުކަމާއެކު ކުރިއަށް ގެންދިއުމަށް ކައުންސިލުން ދެވޭނެ އެހީތެރިކަން ފާހަގަކޮށް އެކަމަށް އެހީތެރިކަން ދިނުމަށް ވެސް ނިންމާފައިވެއެވެ. އަދި އެ ޕްރޮގްރާމް ކުރިއަށް ނުދާނަމަ ފުދުންތެރިކަން ނެތް މީހުންނަށް ރޯދަ ވީއްލުމަށް އެހީތެރިކަން ދެވޭނެ ގޮތްތައް ބަލައި އެކަން އިންތިޒާމް ކުރުމަށް މަސައްކަތް ކުރުމާއި، އަމިއްލަ ފަރާތްތަކުން ރޯދަ ވީއްލުމުގެ އިންތިޒާމް ހަމަޖައްސާއިރު ބޭނުންވާ ގޮނޑި މޭޒު ފަދަ ތަކެތި ސިޓީ ކައުންސިލުން ފޯރުކޮށްދިނުމަށް މަސައްކަތް ކުރުމަށްވެސް ނިންމާފައި ވެއެވެ.

މާލޭގެ އެންމެ ބޮޑު އާބާދީއަކީ ޒުވާނުން ކަމަށްވާތީ ޒުވާނުންނާއި ގުޅުންހުރި ބައެއް ހަރަކާތްތައްވެސް ރޭވުމަށް ނިންމާފައިވާކަން ފާހަގަކޮށް ކައުންސިލުން ބުނީ ފުޓްސަލް، އަދި ފޯރ ބައި ފޯރ ވޮލީ މުބާރާތެއްގެ އިތުރުން ދިވެހިވަންތަ ކުޅިވަރެއް ކަމުގައިވާ ތިންމުގޯލި ފަދަ މުބާރާތްތަކެއް ބޭއްވުމަށް މަސައްކަތް ކުރާ ކަމަށެވެ. އަދި އެކަން ކުރެވޭނެ ގޮތްތަކެއް ބަލަމުންދާ ކަމަށް ކައުންސިލުން ބުނެއެވެ.

މީގެ އިތުރުން ކައުންސިލުން ބުނީ ދިވެހިންގެ ސަގާފަތެއްގެ ގޮތުން ރަމަޟާން މަސް އައުމުގެ ކުރިން ބާއްވާ މާހެފުން ބޭއްވުން ތަރުތީބު ކުރުމަށް އިޢުލާންކޮށްގެން އެ ދުވަސްތަކުގައި މާހެފުމަށް މަގުބަންދު ކުރުމުގެ ފުރުޞަތު ދިނުމަށް ނިންމާފައިވާ ކަމަށެވެ. އަދި ރަމަޟާން މަހު ކުޑަކުދިންނާއި އާއިލާތައް ހަވީރު ގަޑީގައި ނިކުމެލާ އުޅޭނެ ފުރުޞަތު ދިނުމުގެ ގޮތުން ކޮންމެ ހަފުތާއަކުވެސް ކަނޑައެޅޭ ދުވަހެއްގައި ބޮޑެތި މަގުތައް ނުހިމެނޭ ގޮތަށް ހަނި ގޯޅިތައް ނުވަތަ ޓްރެފިކް ލުއި ގޯޅިތައް ބަލައި ބަންދުކުރުމަށް ފުރުސަތު ދިނުމަށް ވެސް ނިންމާފައިވާ ކަމަށެވެ.

ރަމަޟާން މަހަށް ތައްޔާރުވުމުގެ ގޮތުން ގިނަ މަސައްކަތްތައް ކުރަމުންދާއިރު، ރޯދަމަހަށް މާލެތެރެ ޒީނަތްތެރި ކުރުމަށާއި، ކުނިމެނޭޖް ކުރެވޭނެ ރަނގަޅު ނިޒާމެއް ހަމަޖެއްސުމުގެ މަސައްކަތްތައް ދަނީ ކުރަމުންނެވެ.