މާލޭގެ މިސްކިތްތަކުގައި ސީސީޓީވީ ކެމެރާ ހަރުކުރުމުގެ މަސައްކަތް ރޯދަމަސް ފެށެންވާއިރަށް ނިމޭނެ ކަމަށް މާލެސިޓީގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ބުދަ ދުވަހު މުއިއްޒު ކުރެއްވި ޓުވީޓެއްގައި ވިދާޅުވީ މާލެ އާއި ވިލިމާލޭގެ ހުރިހާ މިސްކިތެއްގައި ސީސީޓީވީ ހަރުކުރުމަށް ކުރިއަށްދާ މަޝްރޫއުގެ ދަށުން މިސްކިތްތަކުގެ އެތެރޭގައި އަދި ބޭރުގައި ވެސް ކެމެރާ ހަރުކުރެވިގެންދާނެ ކަމަށެވެ.
މާލެ ސިޓީގައި ހުރި މިސްކިތްތަކުގައި ކެމެރާ ހަރުކުރުމަށް ސިޓީ ކައުންސިލުން ކުރަމުންދާ މަސައްކަތުގެ ދަށުން ކެމެރާ ހަރުކުރުމުގެ މަސައްކަތް ކުރުމަށް 3 ބަޔަކާ ހަވާލުކޮށްފައިވާ ކަމަށް މާލެ ސިޓީގެ މޭޔަރ ޑރ މުހައްމަދު މުއިއްޒު ވަނީ ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.
މުއިއްޒު ވިދާޅުވީ އެމަޝްރޫޢުގެ އެކި ކޮމްޕޮނެންޓްސްތައް ކުރިޔަށް ގެންދިޔުމަށް ތިން ޕާޓީއަކާއި ހަވާލުކޮށްފައިވާކަމަށެވެ. މަޝްރޫޢު ނިމޭއިރު ހުރިހާ މިސްކިތްތަކެއް ހުންނާނީ ހުރިހާ ދިމާލަކުން ކަވަރ ވާގޮތަށް ކެމެރާ ހަރުކުރެވިފައިކަމަށް މުއިއްޒު ވިދާޅުވިއެވެ.
މާލޭގެ 42 މިސްކިތެއް ބެލެހެއްޓުމުގެ މަސައްކަތް ކުރަމުން އަންނަނީ ސިޓީ ކައުންސިލުންނެވެ. މާލެ ސިޓީގެ މިސްކިތްތަކުގެ އާބާތުރަ ރަމަޟާން މަހަށް ފިލުވުމުގެ މަސައްކަތްވެސް ސިޓީ ކައުންސިލުން އަންނަނީ ކުރަމުންނެވެ.
މާލެ ސިޓީގައި ސީސީޓީވީ ކެމެރާ ހަރުކުރުމަށް ހުޅުވާލީ ނޮވެމްބަރ މަހުއެވެ.
މާލޭގެ މިސްކިތްތަކުގައި ކެމެރާ ހަރުކުރުމަށް ނިންމާފައިވަނީ މިސްކިތުގެ ހުރުމަތް ކެނޑޭފަދަ ޢަމަލުތައް ހިންގަމުންދާކަން ފާހަގަކުރެވޭތީ އާއި އަދި މިސްކިތުގައި ހުންނަ ސަމާނު ވަގަށްނެގުންފަދަ ކަންކަން ބައެއް މީހުން ކުރަމުންދާތީއެވެ.
