ހޮނިހިރު ދުވަހުގެ ރޭ ލަންޑަންގައި ދިން ޓެރެރިސްޓް ހަމަލާ ދިވެހި ސަރުކާރުން ކުށްވެރިކޮށްފި އެވެ.
މި ހަލާގައި ހަ މީހުން މަރުވެ މަދުވެގެން 48 މީހުން ޒަޚަމްވެފައިވާއިރު ރާއްޖޭގެ ފޮރިން މިނިސްޓްރީން ކުރި ޓުވީޓުގައި ވިދާޅުވެފައިވަނީ ކުށެއް ނެތް ފަރާތްތާއި ދެކޮޅަށްދޭ މިފަދަ ހަމަލާތައް ކުށްވެރިކުރާ ކަމަށެވެ.
މިޙާދިސާގައި އެއްވެސް ދިވެއްސަކަށް އަނިޔާވެފައިވޭތޯ ސަރުކާރުން ވަރަށް ގާތުން ބަލަމުންދާ ކަމަށާއި އަދި މިހާތަނަށް އެއްވެސް މީހަކަށް އަނިޔާވެފައިވާ ކަން އެނގިފައި ނުވާ ކަމަށް ފޮރިން މިނިސްޓްރީން ބުންޏެވެ.
މިހަމަލާދިނުމުގައި ބައިވެރިވި ތިން ފިރެހެނަކު ފުލުހުންވަނީ ބަޑިޖަހާ މަރާލާފައެވެ.
ހުދު ކުލައިގެ ވޭނެއްވަނީ ހޮނިހިރު ދުވަހު ލަންޑަނުގަޑިން 22:00 ހާއިރު ލަންޑަން ބްރިޖްގައި ހިނގާފައިދިޔަ ބައެއްގެ ގައިގައި ޖައްސާފައެވެ. އޭގެ ކުރިން އެ ވޭނުން ނުކުތް ތިން މީހަކުވަނީ ބޮރޯ މާކެޓް ކައިރީ މީހުންގެ ގަޔަށް ތޫނު އެއްޗެހިން ހަމަލާދީފައެވެ. ފުލުހުން ބުނީ ތިން ފިރެހެނުންވެސް ތިބީ ފޭކް ބޮމްވެސްޓް ލައިގެން ކަމަށެވެ.
ޒަޚަމްވި މީހުންގެ ތެރޭގައި ފުލުހަކު ހިމެނޭއިރު އޭނާގެ ގަޔަށް ހަމަލާދީފައިވަނީ މީހުނަށް އެހީވުމަށްދިޔަ ވަގުތުއެވެ.
މިހަމަލާއަކީ ހިތްދަތި ހަމަލާއެއްކަމަށް ބޮޑުވަޒީރު ތެރީސާ މޭ ސިފަ ކުރައްވާފައިވާއިރު ލޭބަރ ޕާޓީގެ ލީޑަރ ޖެރެމީ ކޯބީން ވަނީ އެ ހަމަލާއަކީ އަނިޔާވެރި އަދި ސިއްސައިގެންދާވަރުގެ ހަމަލާއެއްކަމަށެވެ.
