ސަރުކާރުން އެންމެ ބޮޑު އިސްކަމެއް ދެނީ ތައުލީމީ ގޮތުން ހަރުދަނާ ދަރިންތަކެއް ބިނާކުރަން – ރައީސް

ސަރުކާރާ ހަވާލުވިފަހުން އެންމެ ބޮޑު އިސްކަމެއް ދެއްވަނީ މީހުން ބިނާކުރައްވަން ކަމަށާއި، ވަކިން ޚާއްސަކޮށް ތައުލީމީ ގޮތުން ހަރުދަނާ ދަރިންތަކެއް ބިނާކުރުމަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އަހުމަދިއްޔާ އިންޓަރނޭޝަނަލް ސްކޫލަށް 40 އަހަރު ފުރުން ފާހަގަކުރުމުގެ ގޮތުން ހޯމަ ދުވަހުގެރޭ އެ ސްކޫލުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

Advertisement

ރައީސް ވިދާޅުވީ, ސަރުކާރުން ރައްޔިތުންނަށް ޚިދުމަތް ކުރުމަށް، މީގެ ތިން އަހަރު ކުރިން ފެށިގެންވެސް، އެންމެ ބޮޑު އިސްކަމެއްދީގެން ކުރާ އެއްކަމަކީ މީހުން ބިނާކުރުން ކަމަށެވެ. އޭގެ ތެރެއިންވެސް އެންމެ ޚާއްސަ ސަމާލުކަމެއް ދެނީ، ތައުލީމީ ގޮތުން ހަރުދަނާ ދަރިންތަކެއް ބިނާކުރުމަށް ކަމަށެވެ. އަދި ރާއްޖެއާއި ރާއްޖެއިން ބޭރުން މަތީ ތައުލީމުގެ އިތުރު ފުރުސަތުތައް ފަހިކޮށްދިނީ ހަމަ މި ބޭނުމުގައި ކަމަށެވެ.

ރައީސް ވިދާޅުވީ މިއަދު ރާއްޖޭގެ އެކި ކަންކޮޅުތަކުގައި ތަރައްގީގެ ވަރަށް ގިނަ މަޝްރޫއުތައް އެބަ ހިނގާ ކަމަށެވެ. އޭގެ ތެރެއިން ބައެއް މަޝްރޫއުތައް ފުރިހަމަވާއިރު، ފަންނީ ހުނަރުވެރިންނަށް ބޭނުންވާނެ ވަރަށް ގިނަ ވަޒީފާތައް އުފެދިގެންދާނެ ކަމަށެވެ. މިސާލެއްގެ ގޮތުން އެމަނިކުފާނު ވިދާޅުވީ ފަސް ސަރަހައްދުގައި ތަރައްގީކުރާ ޓާޝަރީ ހޮސްޕިޓަލްތަކެވެ.

ރައީސް ވިދާޅުވީ ދަރިންނަށް ކިޔަވައިދޭ ވާހަކަ މިވަރަށް ދައްކަވަން ޖެހެނީ، ގައުމުގެ ހަގީގީ ތަރައްގީއަކީ އެއީ ކަމަށްވާތީ ކަމަށެވެ. އަދި ގައުމު ތަރައްގީވާނީ، އެ ޒިންމާ އަދާކުރަން ތިބި ދަރިންގެ ސިކުނޑީގައި، އުފެއްދުންތެރި އީޖާދީ ވިސްނުންތަކެއް އުފެދިގެން ކަމަށާއި، ދަރިންގެ ކިބައިގައި ތަރައްގީގެ ވިސްނުން އުފެއްދޭނީ، ޒަމާނީ ކުރިއެރުމާ އެއްވަރަށް ތައުލީމެއް ދަރިންނަށް ދީގެން ކަމަށެވެ.

އަހުމަދިއްޔާއަށްވެސް ދިމާވެފައިވާ އެންމެ ބޮޑު މައްސަލައަކީ ޖާގައިގެ ދަތިކަން ކަމުގައި ފާހަގަކުރައްވައި ރައީސް ވިދާޅުވީ, ދަރިވަރުން އިތުރު ހަރަކާތެއް ބާއްވާނެ ބިންކޮޅެއް އެ ސްކޫލްގައި ނެތް ކަމަށެވެ. އަދި ތުއްތުކުދިން ކުޅެން ނުކުމެލާނެ ބިންކޮޅެއްވެސް ނެތް ކަމަށާއި، އެ މައްސަލަ ސްކޫލްގެ ފަރާތުން ސަރުކާރަށް ހުށަހަޅާފައިވާކަމަށެވެ. ރައީސް ވިދާޅުވީ އެކަމުގައި ސަރުކާރުން ވެދެވެން އޮތް އެންމެ ފުރިހަމަ އެހީތެރިކަމެއް ވެދިނުމަށް މަސައްކަތް ކުރަމުން އަންނަ ކަމަށާއި، މާގިނަ ދުވަސްތަކެއްނުވެ ޢަމަލީ ސިފަ އަންނާނެކަމުގެ ޔަގީންކަން ދެއްވާ ކަމަށެވެ.

ސްކޫލްގެ ކާމިޔާބަށް ބަލާއިރު، އެމަނިކުފާނަށް ފާހަގަކުރެވޭ އެންމެ ބޮޑު ކާމިޔާބަކީ، ގައުމަށް ބޭނުންތެރި ދަރިންތަކެއް، އަހުމަދިއްޔާ ސްކޫލުން ބިނާކޮށްދީފައިވާކަން ކަމަށް ރައީސް ވިދާޅުވިއެވެ. އަދި އަހުމަދިއްޔާ ސްކޫލުން ތައުލީމު ހާސިލުކުރި ދަރިވަރުންގެ ތެރޭގައި، ރައްޔިތުންގެ މަޖިލީހުގެ މެންބަރުންގެ ގޮތުގައިވެސް، އަދި ސަރުކާރުގެ އެހެން މަތީ މަގާމުތަކުގައިވެސް މިހާރު އެބަ ތިއްބެވި ކަމަށް ރައީސް ވިދާޅުވިއެވެ.