އެކުންފުނީގެ ދެވަނަ ބޯޓު މެއި ނުވަތަ ޖޫން މަހުގެ 15 ވަނަ ދުވަހު މާލެ އަންނާނެ ކަމަށް އެސްޓީއޯގެ ސަބްސިޑަރީ ކުންފުނި، މޯލްޑިވްސް ސްޓޭޓް ޝިޕިން (އެމްއެސްއެސް) އިން ބުނެފިއެވެ.
އާދިއްތަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އެމްއެސްއެސްގެ ޖެނެރަލް މެނޭޖަރ ކެޕްޓަން މުހައްމަދު ނާޒިމް ވިދާޅުވީ ދެވަނަ އުޅަނދު މެއި ނުވަތަ ޖޫން މަހުގެ 15 ވަނަ ދުވަހު މާލެ އަންނާނެ ކަމަށާއި މީގެ ސަބަބުން ޚިދުމަތް އަވަސްވެގެންދާނެ ކަމަށެވެ.
މިހާރު ވެސް އެމް.އެސް.އެސްގެ ފުރަތަމަ އުޅަނދު ދަތުރުކުރާތާ ދެ މަހަށް ވުރެން ގިނަ ދުވަސްވެފައިވާ ކަމަށާއި މުދާ ނުގެނެވިގެން ބަހައްޓާފައި އަންނަ ކަމަށް ވިދާޅުވިއެވެ. އޯވަރ ފްލޯވާ ކާގޯ ގެންނަން އިތުރު އެހެން އުޅަނދެއް ބޭނުންކުރަމުންދާ ކަމަށް ނާޒިމް ވިދާޅުވިއެވެ.
އެމް.އެސް.އެސް އިން މިހާރު ގެންގުޅޭ ބޯޓާއި އަދި ގެންނަން ހަމަޖެހިފައިވާ ބޯޓަކީ ރާއްޖޭގެ މާކެޓަށް އެންމެ އެކަށީގެންވާ ދެބޯޓު ކަމަށް ނާޒިމް ވިދާޅުވިއެވެ. އެއީ މިހާތަނަށް ބެލި ބެލުމުން ބޮޑު ބޯޓެއް އޮޕަރޭޓް ކުރުމަށްވުރެ ކުޑަ ދެ ބޯޓް އޮޕަރޭޓް ކުރުން ރަނގަޅު ކަމަށް ފެންނާތީ ކަމަށް ވިދާޅުވިއެވެ.
އަދި ދެވަނަ އުޅަނދުގައި އެހެން ބޯޓުތަކެކޭ އެއްގޮތަށް 60 ޓަނުގެ ކެޕޭސިޓީ ހުންނާނެ ކަމަށާއި ބަރު މުދާ އުފުލޭނެ ކަމަށް ނާޒިމް ވިދާޅުވިއެވެ.
އެމް.އެސް.އެސްގެ ޙިދުމަތް ނުހުއްޓި ކުރިއަށްދާނެ ކަމުގެ ހެއްކަކީ، އަމިއްލަ ބޯޓެއް ހޯދުންކަން ފާހަގަކުރައްވާ ނާޒިމް ވިދާޅުވީ ދެ އަހަރު ތެރޭގައި އަމިއްލަ ބޯޓެއް ގެނެވި އަމިއްލަ ފައި މައްޗަށް ތެދުވުމަކީ ކުންފުންޏަށް ލިބުނު އެންމެ ބޮޑު އެއް ކާމިޔާބީ ކަމަށެވެ.
މީގެއިތުރުން ޑިސެމްބަރު މަހު ކޮލަމްބޯއިން އެތެރެކުރި މުދަލުގެ 30 އިންސައްތަ އެތެރެ ކުރީ އެމް.އެސް.އެސް އިން ކަން ނާޒިމް ފާހަގަކުރެއްވިއެވެ.
އެމް.އެސް.އެސް އިން މުދާ އެކްސްޕޯޓް ކުރުމުގައި ވެސް ބައިވެރިވާ ކަމަށާއި ބާ ދަނގަޑާއި މަސް އެކްސްޕޯޓް ކުރުމުގައި ހަރަކާތްތެރިވާ ކަމަށް ނާޒިމް ވިދާޅުވިއެވެ.
ރާއްޖެއަށް ގެންނަ މުދަލުން ފްރައިޓްގެ އިތުރަށް މިހާރު ނަގަނީ 50 ޑޮލަރު ކަމަށާއި ކުރިން ކޮންޓެއިނަރަކަށް 400 ވަރަކަށް ޑޮލަރު ނަގަމުން ދިޔަ ކަމަށް ނާޒިމް ފާހަގަކުރެއްވިއެވެ.
މާދުރު ނޫން މުސްތަގްބަލެއްގައި އެމް.އެސް.އެސްއިން ރާއްޖެއަށް މުދާ އެތެރެކުރުމުގައި އިސް ދައުރެއް އަދާކުރާނެ ކަމަށާއި އިންޓަރނޭޝަނަލް އެރީނާގައި ބޯޓުތައް މުދާ އުފުލުމުގައި އުޅުމަކީ ކުންފުނީގެ އެއް އަމާޒު ކަމަށް ނާޒިމް ވިދާޅުވިއެވެ.
