ބިން ވިއްކުމަކަށް މަސައްކަތެއް ނުކުރަން، މަސައްކަތްކުރަނީ ޕާކިންގއަށް ދިމާވެފައިވާ މައްސަލަ ހައްލުކުރަން: މޭޔަރު މުއިއްޒު
ޕާކިންގ ބިލްޑިންގ އެޅުމަކީ ބޮޑު ޚަރަދެއް ހިނގާނެ ކަމެއް
މާލޭގެ މޭޔަރު ޑރ. މުހައްމަދު މުއިއްޒު
މާލެސިޓީން ބިން ވިއްކުމަށް މަސައްކަތް ނުކުރާ ކަމަށާއި، މަސައްކަތް ކުރަނީ ޕާކިންގއަށް ދިމާވެފައިވާ މައްސަލަތައް ހައްލު ކުރުމަށް, ކަމަށް މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ބުރާސްފަތި ދުވަހު މާލެސިޓީ ކައުންސިލްގައި ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ, ޕާކިންގ މައްސަލައަކީ މާލެއަށް ދިމާވެފައިވާ އެންމެ ބޮޑު އެއް މައްސަލަ ކަމަށާއި، އެމައްސަލައަށް ހައްލު ހޯދުމަށް މަސައްކަތްކުރަންޖެހޭ ކަމަށެވެ. އެމައްސަލައަށް މަޝްވަރާ ކުރެވި މާލޭގެ ފަސް ސަރަހައްދެއްގައި ޕާކިންގއަށް ޚާއްސަކޮށް މިކްސްޑް ޔޫސް ޕާކިންގ ބިލްޑިންތަކެއް އެޅުމަށް ނިންމާފައިވާ ކަމަށް މޭޔަރު ވިދާޅުވިއެވެ. އަދި އެ ނިންމުން ނިންމާފައިވަނީ ކައުންސިލްގެ ބައްދަލުވުމުގައި އިއްތިފާގުން ފާސްވެގެންކަމަށެވެ.
ޕާކިންގ ބިލްޑިންގ އެޅުމަކީ ބޮޑު ޚަރަދެއް ހިނގާނެ ކަމެއްކަން ފާހަގަކުރައްވައި މޭޔަރު ވިދަޅުވީ އެމަސައްކަތް ކުރުމަށް ދެއަަހަރު ވަރު ނަގާނެ ކަމަށެވެ. އެމަސައްކަތް ކުރުމަށް ފަންޑު ހޯދުމުގެ މަސައްކަތް ކައުންސިލުން ކުރާނެ ކަމަށާއި، އިންވެސްޓަރުންނަށް ފުރުސަތު ހުޅުވާލާނެކަމަށް މޭޔަރު ވިދާޅުވިއެވެ.
މީގެ އިތުރުން, ޕާކިންގ މައްސަލައަކީ ބޮޑު މައްސަލައަކަށްވާތީ ވަގުތީ ހައްލެއް ހޯދަން ޖެހޭ ކަމަށެވެ. އެހެންކަމުން މިހާރު ހުރި ހުސް ބިންތައް ޕާކިންގ ޒޯންތަކަށް ބަދަލުކޮށް، އާއްމުންނަށް ދޫކުރުމަށް ނިންމާފައިވާ ކަމަށެވެ. އަދި ބައެއް ސްލޮޓްތަކަކީ ވަކި އުސޫލެއްގެ ތެރެއިން އާއްމުންނަށް ކުއްޔަށް ދޫކުރުމަށް ނިންމާފައިވާ ސްލޮޓްތަކެއް ކަމަށެވެ.
މާލެސިޓީން ބިން ވިއްކުމަށް މަސައްކަތް ނުކުރާ ކަމަށް މޭޔަރު ވިދާޅުވެފައިވާއިރު، މާލޭގައި ހަތަރު ފުރޮޅުލީ އުޅަނދުތައް ޕާކްކުރުމަށް 1000 ސްލޮޓް ވިއްކަން ސިޓީ ކައުންސިލުން ނިންމި ނިންމުމަށް ވަނީ ގިނަ ބައެއްގެ ފާޑު ކިޔުން އަމާޒުވެފައެވެ. އެމައްސަލަ ބޮޑުވެ، އެ ނިންމުމަށް އަމަލުކުރުން ފަސް ކުރުމަށް ލޯކަލް ގަވަރމެންޓް އޮތޯރިޓީން ވަނީ އަންގާފައެވެ. އަދި ޓްރާސްޕޯޓް މިނިސްޓްރީން ވަނީ ސިޓީ ކައުންސިލަށް ޕާކިން ސްލޮޓުތައް ނުވިއްކޭނެ ކަމަށް ބުނެ ބަޔާނެއް ނެރިފައެވެ. އަދި މިކަމުގެ ސަބަބުން މުސްތަގުބަލަށް ކުރާނެ ނޭދެވޭ އަސަރު ކުރާނެ ކަމަށް ބުނެފައިވެއެވެ.
މީގެ އިތުރުން މުއިއްޒު، ކުރީގެ ރައީސް އަބްދުﷲ ޔާމީންގެ ވެރިކަމުގައި ހައުސިން މިނިސްޓަރު ކަމުގެ މަގާމުގައި ހުންނަވައި, ޕާކިންގއަށް ދިމާވެފައިވާ މައްސަލަ ހައްލު ކުރުމުގެ ގޮތުން މާލޭގެ އިތުރުން ހުޅުމާލޭގައި މެކޭނިކަލް ޕާކިން ނުވަތަ އޮޓޮމޭޓެޑް ޕާކިން ސިސްޓަމްތަކެއް ހަރުކުރިއެވެ.
މިމަޝްރޫއުގެ އަމަލީ މަސައްކަތް ފެށުމުގެ ގޮތުން 21 މާޗް 2016ގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އާއެކު އެބަސްވުމެއްގައި ސޮއިކޮށް މަސައްކަތް ހަވާލުކުރިއެވެ. މިމަޝްރޫއުގެ ދަށުން މާލޭގައި ކާރު ޕާކް ކުރަން 10 ސިސްޓަމް އަދި ސައިކަލް ޕާކް ކުރަން ވެސް 10 ސިސްޓަމް ބަހައްޓަން ނިންމާފައިވެއެވެ. ނަމަވެސް މާލޭގައި ބެހެއްޓީ 4 ޕާކިންގ ސިސްޓަމްއެވެ. ބާކީ ސިސްޓަމްތަކަށް ވީގޮތެއް ނޭނގެއެވެ. އަދި ބެހެއްޓި އެއްވެސް ސިސްޓަމެއް ބޭނުންނުކުރެވި ދަބަރަށްވެ ވަނީ ހަލާކުވެފައެވެ. ނަމަވެސް މި ސިސްޓަމްތައް ހަރުކުރުމަށް އޭރުގެ ސަރުކާރުން ޖުމުލަ 58 މިލިއަން ރުފިޔާ ހޭދަކޮށްފައިވާތީ މިހާރު ހުޅުމާލޭގައި މެކޭނިކަލް ޕާކިންގ ސިސްޓަމްތައް ބޭނުންކުރެވޭ ގޮތް ހެދުމުގެ މަސައްކަތް މިސަރުކާރުން ދަނީ ކުރަމުންނެވެ.
