މާފުށި ޖަލު އާންމު ހާލަތަށް ގެނެސްފި

މާފުށީ ޖަލު އާންމު ހާލަތަށް ގެނެސްފައިވާކަމަށް މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ބުނެފިއެވެ.

ކަރެކްޝަންސްއިން ބުނީ މާފުށީ ޖަލުގައި ކޮވިޑް-19 ފެތުރުން ކޮންޓްރޯލް ކުރެވިފައިވާކަމަށެވެ. އަދި ކޮވިޑަށް ޕޮޒިޓިވްވި ހުރިހާ ގައިދީން ބަލިން ފަސޭހަވެފައިވާކަމަށް ކަރެކްޝަންސްއިން ބުނެފައިވެއެވެ. އެއާއެކު މާފުށީ ޖަލު އާންމު ހާލަތަށް ގެނެސްފައިވާކަމަށް ކަރެކްޝަންސްއިން ބުނެފައިވެއެވެ.

ކަރެކްޝަންސްއިން ބުނީ މިއާއެކު ގައިދީންނާއި، ބަންދުމީހުންގެ އާއިލީ އަދި ވަކީލު ބައްދަލުވުންތަކާއި، ކޯޓުގެ އަޑުއެހުންތައް ކުރިއަށްގެންދާނީ އައު އާންމު ހާލަތާ ގުޅިގެން އެކުލަވާލާފައިވާ އުސޫލާ އެއްގޮތަށް ކަމަށް ކަރެކްޝަންސްއިން ބުނެފައިވެއެވެ.

މާފުށި ޖަލުން ކޮވިޑް ކޭސްތަކެއް ފެނި އެޖަލު ކުއްލި ހާލަތަށް ގެނެސްފައިވަނީ ޖެނުއަރީ 14 ވަނަ ދުވަހުއެވެ. ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ މާފުށީ ޖަލުން 272 ގައިދީއަކު ކޮވިޑަށް ޕޮޒިޓިވްވެފައިވާކަމަށެވެ. އަދި ޕޮޒިޓިވްވި ހުރިހާ ގައިދީންވެސް ބަލިން ރަނގަޅުވެފައިވާކަމަށް ސީޕީ ވިދާޅުވިއެވެ.