އެމްޑީޕީގެ ރިޔާސީ ޕްރައިމަރީއެއް ބޭއްވުމަށް މިރޭ ޤައުމީ މަޖިލީހަށް ހުށައަޅަނީ
ޤައުމީ މަޖިލީހުގެ ބައްދަލުވުމުން އޮންނާނީ މިރޭ 08:30 ގައި
އެމްޑީޕީގެ ޤައުމީ ހިންގާ ކޮމިޓީގެ ބައްދަލުވުމުގެ ތެރެއިން
އެމްޑީޕީގެ ރިޔާސީ ޕްރައިމަރީއެއް ބޭއްވުމަށް ބުރާސްފަތި ދުވަހުގެ ޤައުމީ މަޖިލީހަށް ހުށައެޅުމަށް ނިންމައިފިއެވެ.
ބުރާސްފަތި ދުވަހުގެ ރޭ 08:30 ގައި އިސްކަންދަރު ސްކޫލުގައި އެމްޑީޕީގެ ޤައުމީ މަޖިލީހުގެ ބައްދަލުވުމެއް އޮންނާނެ ކަމަށް އެމްޑީޕީގެ ޗެއަރޕާސަން ހަސަން ލަތީފް ވަނީ ވިދާޅުވެފައެވެ.
އިތުބާރު ހުރި މަސްދަރަކުން ރާއްޖެއެމްވީއަށް ވިދާޅުވީ މި ބައްދަލުވުމުގައި 5 ހުށައެޅުމެއް ހުށައެޅިގެންދާއިރު، އެއީ އެމްޑީޕީގެ އެތެރޭގެ 5 އިންތިޚާބެއްގެ ތާރީޚުތައް ކަނޑައެޅިގެންދާނެ ކަމަށެވެ.
ފުރަތަމަ އިންތިޚާބަކީ އެމްޑީޕީގެ ޗެއަރޕަރސަންގެ މަޤާމުގެ އިންތިޚާބެވެ. އެގޮތުން މިހާރު ހުންނެވި ޗެއަރޕަރސަން ހަސަން ލަތީފުގެ މަޤާމުގެ މުއްދަތު ހަމަވަނީ މިހިނގާ ފެބްރުއަރީ މަހުގެ ތެރޭގައެވެ.
ދެވަނަ އިންތިޚާބަކީ އެމްޑީޕީ ޕާލިމެންޓަރީ ގްރޫޕުގެ ލީޑަރުކަމުގެ މަގާމުގެ އިންތިޚާބެވެ. އެއީ ދެއަހަރާއި ބައިގެ މުއްދަތަކަށް އިންތިޚާބު ކުރެވޭ މަގާމެކެވެ. އެމްޑީޕީގެ ޕާލިމެންޓްރީ ގްރޫޕުގެ ލީޑަރަކަށް މެދު ހެންވޭރު ދާއިރާގެ މެންބަރު އަލީ އާޒިމް ހޮވިވަޑައިގެންފައިވަނީ 2 ޖުލައި 2019 ގައެވެ. އޭގެ އިތުރުން 3 ވަނަ ހުށައެޅުމަކީ އެމްޑީޕީގެ ރިޔާސީ ޕްރައިމަރީއެއް ބޭއްވުމަށް ތާރީޚެއް ކަނޑައެޅުމަށް ބޭއްވޭ ހުށައެޅުމެކެވެ.
މީގެއިތުރުން 4 ވަނަ އަދި ފަސްވަނަ ހުށަހެޅުމަކީ އަންހެނުންގެ ރޫހުގެ އިންތިޚާބާއި ޒުވާނުންގެ ހިތްވަރުގެ އިންތިޚާބު ބާއްވާނެ ތާރީޚެއް ކަނޑައެޅުމެވެ.
