ރައީސް ޞާލިހުގެ 4 ވަނަ ރިޔާސީ ބަޔާން - ފާހަގަކޮށްލެވޭ އުސްއަލިތައް
ދީނީ ޢިލްމުވެރިންގެ އެހީގައި މިއަހަރު "ނޭޝަނަލް މޮޑެރޭޝަން ކެމްޕޭން" ކުރިއަށް ގެންދެވޭނެ
މިއަހަރަށް ރައީސުލްޖުމްހޫރިއްޔާ ރިޔާސީ ބަޔާން އިއްވަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ހަތަރު ވަނަ ރިޔާސީ ބަޔާން މިވަނީ ބުރާސްފަތި ދުވަހު އިއްވަވާފައެވެ. 56 މިނެޓްގެ ރިޔާސީ ބަޔާނުގައި ސަރުކާރަށް މިހާތަނަށް ހާސިލުކުރެވުނު މުހިންމު ކަންތައްތަކުގެ މައްޗަށް އަލިއަޅުވާލައްވާފައިވާއިރު ސަރުކާރުން ވައުދުވެފައިވާ ރައްޔިތުންނާއި ގުޅުންހުރި މުހިންމު ކަންތައްތަކެއް ފުއްދަވައިދެއްވާނެ ތާރީޚުތައްވެސް ވަނީ ވިދާޅުވެފައެވެ. އޭގެކުރީ އަހަރުގެ ރިޔާސީ ބަޔާނުގައި މިދިޔަ އަހަރު ތެރޭގައި ކުރައްވާނެކަމަށް ވިދާޅުވި ކަންކަން މިހާރު ކުރަމުންދާކަން ރައީސް ވަނީ ފާހަގަކުރައްވާފައެވެ. ރައީސް ވިދާޅުވީ ސަރުކާރުން ހިންގާ އެންމެ ބޮޑު މަޝްރޫޢަކީ އުފެއްދުންތެރި އައު ޖީލެއް ބިނާކުރުންކަމަށެވެ. އަދި ޒަމާނާ ގުޅޭ ބަދަލުތައް ގެނައުމަށް ވީވައުދުގެ ފެށުމަކީ ލާމަރުކަޒީ ނިޒާމު ގެނައުންކަމަށް ރައީސް ވިދާޅުވިއެވެ.
ރައީސް ވިދާޅުވީ މިހާތަނަށް ހޯދުނު ކާމިޔާބީ އާއި މާދަމާ ހޯދަން އޮތް ކާމިޔާބީއެއްގެ ސިއްރަކަށް ވާނީ ހެޔޮވެރިކަންކަމަށެވެ. ރައީސް ވިދާޅުވީ ހެޔޮވެރިކަމަކީ، އެވެރިކަމުގެ ހިޔާވަހިކަން އިންސާފުވެރިކަމާއި ހަމަހަމަ ކަމާއެކު، ހުރިހާ ރައްޔިތުންނަށް ފޯރުކޮށްދިނުންކަމަށެވެ.
