ކޮންމެ ކަމަކުންވެސް ބަލަނީ ނާޖާއިޒު ފައިދާ ނެގޭނެ ގޮތެއް!

ދުނިޔެއަކީ ބަދަލުވާ އެއްޗެކެވެ. މި ބަދަލުތަކާ އެއްވަރަށް އިންސާނާގެ އުޅުންވެސް ބަދަލުކުރާން ޖެހެއެވެ. އެގޮތުގެ މަތީން، ހެދިފައިވާ ގާނޫނުތަކާއި ގަވާއިދުތައްވެސް މިހާރު ވަނީ ބަދަލުކުރާން ފަށާފައެވެ. ނުވަތަ އިތުރަށް ހަރުދަނާ ކޮށްފައެވެ. މި ބަދަލުތަކާއެކު, އުންމީދަކަށް ވެގެންދާނީ އިންސާނާގެ އުޅުމަށްވެސް މި ހެޔޮ ބަދަލުތައް އައުމެވެ. އޭގެ ހެޔޮ އަސަރު ކުރުމުވެ.

ދާދިފަހުން ޓްރާންސްޕޯޓް މިނިސްޓްރީން ހެދި ގަވައިދެކެވެ. އެ ގަވައިދާއެކު އެއްގަމު އުޅަނދުފަހަރު ދުއްވުމުގެ ލައިސަންސް ދެން ލިބޭނީ ވަކި މުއްދަތަކަށް ޑްރައިވިންގ ސްކޫލެއްގައި ތަމްރީނު ފުރިހަމަކުރުމަށްފަހުއެވެ. އެކި ގިންތިކަކުގެ ލައިސަންސް ނެގުމަށް އެކި މުއްދަތު ކަނޑައަޅާފައިވާ މި ގަވާއިދުގައި ބުނެފައިވަނީ, މިމުއްދަތަށް, ދުއްވަން ދަސްކުރާ ފަރާތުން އުޅަނދު ދުއްވިކަމުގެ ރިކޯޑާއި ޓްރެއިނިންގ ލޮގު ޑްރައިވިންގ ސްކޫލުން ނުވަތަ ޑްރައިވިންގ އިންސްޓްރަކްޓަރ ބަލަހައްޓަންވާނެއެވެ. އަދި ރިކޯޑާއި ޓްރެއިނިންގ ލޮގުގައި، ޑްރައިވިންގ ސްކޫލުން ނުވަތަ ޑްރައިވިންގ އިންސްޓްރަކްޓަރ ސޮއިކޮށްފައި، އެއްގަމު އުޅަނދު ދުއްވުމުގެ ލައިސަންސަށް އެދި ހުށަހަޅާއިރު، އެ ލޮގު ހުށަހަޅަންވާނެކަމަށްވެސް ގަވާއިދުގައި ބުނެފައިވެއެވެ.

ޓްރާންސްޕޯޓުގެ މި ގަވައިދާއެކު އުންމީދު ކުރެވިގެންދިޔައީ މީގެ ފަހުން ލައިސަންސް ނަގައިގެން އެއްގަމު އުޅަނދުތައް ދުއްވާ ފަރާތްތަކަކީ މަގަށް ފަރިތަ ބަޔަކަށް ވެގެންދާނެ ކަމަށެވެ. އަދި ގަވައިދުތަކާ އެއްގޮތަށް ދުއްވާނެ ބަޔަކަށެވެ. މީގެ ސަބަބުން މިހާރު ރާއްޖޭގައި އާންމުވެފައިވާ އެކްސިޑެންޓުތަކުގެ މައްސަލަވެސް ވަރަށް ބޮޑަށް ހައްލު ވެގެންދާނެކަމަށް ބެލެވުނެވެ. ނަމަވެސް މިކަމުންވެސް ބަޔަކު މިހާރު މިވަނީ ނާޖާއިޒު ފައިދާ ނަގަންފަށާފައެވެ.

ޑްރައިވިންގ ސްކޫލުތަކުގެ މުއައްޒަފުންނާ ގުޅިގެން ބައެއް ފަރާތްތަކުން އަންނަނީ އުޅަނދު ދުއްވިކަމުގެ ފޭކު ރިކޯޑާއި ޓްރެއިނިންގ ލޮގު ހަދަމުންނެވެ. މަދު ރުފިޔާކޮޅެއް މި މުއައްޒަފުންނަށް ދިނުމުން މިކަމަށްޓަކާ ހޭދަވާ ރުފިޔާއާ ވަގުތުވެސް ސަލާމަތްވީއެވެ. ނަމަވެސް ހަމަ މިއާއެކު މަދު ފައިސާކޮޅަކަށްޓަކައި މުއައްޒަފުން ވިކުމުގެ ސަބަބުން ގަވައިދުގެ ހަގީގީ މަގުސަދު ހާސިލުނުވީއެވެ.

މިފަަދަ އެހެން ކަމަކަށް ނަޒަރު ހިންގާލަމާތޯއެވެ. މިއަދު މުޅި ދުނިޔެއަށްވެސް ކުރިމަތިވެފައިވާ އެންމެ ބޮޑު ވަބާއަކީ ކޮވިޑް-19ގެ ބަލިމަޑުކަމެވެ. އޮމިކްރޯން ވޭރިއެންޓާއެކު މި ބަލިމަޑުކަން ފެތުރޭ މިންވަރު އަނެއްކާވެސް މިވަނީ އިންތިހާއަށް އިތުރުވެފައެވެ. މި ބަލިމަޑުކަމުން ރައްޔިތުން ސަލާމަތް ކުރުމަށްވެސް ސަރުކާރުން ވަނީ ހަރުދަނާ ފިޔަވަޅުތަކެއް އަޅާފައެވެ. މީގެ ތެރޭގައި ވެކްސިން ޖެހުމާއި، ރަށްރަށަށް ދަތުރުކުރާއިރު ސާމްޕަލް ނެގުމުގެ އިތުރުން, ގިނަ މީހުން އެއްވެ ނޫޅުމަށް އެންގުންފަދަ ގިނަ ފިޔަވަޅުތަކެއް ސަރުކާރުން ވަނީ އަޅާފައެވެ.

ނަމަވެސް ކުރާނީ ކީއްހެއްޔެވެ. ފޮތެއް އޮތަކަސް އެދުރެއް ނުވާނޭ ބުނާ ބީދައިން، ކިތަންމެ ރަނގަޅު ގާނޫނުތަކާއި ގަވައިދުތަކެއް ހެދި ނަމަވެސް އެއަށް އަމަލު ނުކުރާނަމަ އޭގެ ބޭނުމެއް ނުހިފޭނެއެވެ. ކޮވިޑުގެ ހާލަތުގައިވެސް ކަންތައްވަމުން އަންނަނީ ހަމަ މިހެންނެވެ. ފޭކު ވެކްސިން ކާޑު ހެދުން މިހާރު ވަނީ އާންމު ކަމަކަށްވެފައެވެ. ސާމްޕަލްތަކުގެ ހާލަކީވެސް ހަމަ މިއީއެވެ. ސިއްހީ ދާއިރާގައި މަސައްކަތްކުރާ މުއައްޒަފުންގެ ހާލަތު މިހާ ހިސާބުގައި ހުރިއިރު, ބަލި ޖެހިފައިވާ މީހުން މަގުތަކަށް ނިކުމެ އުޅެނީ ބިރެއްވެސް ނެތިއެވެ. ކޮންމެ މީހަކުވެސް ބަލަނީ އެމީހެއްގެ އަމިއްލަ ފައިދާއަށެވެ. ޖީބަށް ބަރުކުރެވޭނެ ގޮތަކަށެވެ.

ވަކިވަކި ފަރުދުންގެ ޒާތީ މަންފާއަށްޓަކައި މިފަދަ މުޑުދާރު އަމަލުތައް ހިންގަމުން އައުމަކީ ގައުމު ހިންގުމާ ހަވާލުވެތިބި ވެރީންނަށް މިއަދު ކުރިމަތިވެފައިވާ ވަރަށްވެސް ބޮޑު ދައްޗެއްކަން ކަށަވަރެވެ. މިކަންތައް ހުއްޓުވޭނީ ހުރިހާ އެންމެންވެސް އަތުގުޅާލައިގެން އިޚްލާސްތެރިކަމާއެކު އެއް މިސްރާބަކަށް ދަތުރު ކޮށްގެންނެވެ. އަމިއްލަ ފައިދާގެ ކުރިއަށް ގައުމީ މަސްލަހަތު އިސްކޮށްގެންނެވެ. އެހެން ނޫންނަމަ ކިތަންމެ ހަރުދަނާ ގާނޫނުތަކާއި ގަވައިދުތައް ހެދިކަމުގައިވިޔަސް މިފަދަ ކުށްތައް މަދު ކުރުމަކީ ނާދިރުކަމެކެވެ.