އަފްޣާނިސްތާނުގެ ހުޅަނގު ސިޓީއެއްގައި ބޮމެއް ގޮއްވާލާ 7 މީހުން މަރާލައިފި
މަރުވި މީހުންގެ ތެރޭގައި 4 އަންހެނުން ހިމެނޭ
އަފްޣާނިސްތާނުގެ ހޭރަތު ސިޓީގައި ތާލިބާނުން ސަލާމަތީ ކަންކަން ބަލަހައްޓަނީ
އަފްޣާނިސްތާނުގެ ހުޅަނގުގެ ސިޓީއެއް ކަމުގައިވާ ހޭރަތުގައި މިނީ ބަހެއްގައި ބޮމެއް ގޮއްވާލަ 7 މީހުން މަރާލައިފިއެވެ.
ހޭރަތު ޕްރޮވިންޝަން ހޮސްޕިޓަލްގެ ހެޑް އާރިފް ޖަލާލީ އޭއެފްޕީއަށް މައުލޫމާތުދެއްވަމުން ވިދާޅުވީ މަރުވި މީހުންގެ ތެރޭގައި 4 އަންހެނުން ހިމެނޭކަމަށެވެ. ހޭރަތުގެ ތާލިބާން ކޮމާންޑަރ މަވްލާވީ އަންސާރީ ވިދާޅުވީ ބޮމުގެ ހަމަލާގައި 9 މީހުން ޒަޚަމްވެފައިވާކަމަށެވެ.
ހޭރަތުގެ އިންޓެލިޖެންސް އޮފީހުގެ ސްޕޯކްސްމަން ސާބިތު ހަރްވީ ވިދާޅުވީ މިހާތަނަށް ބެލިބެލުމުން އެނގިފައިވަނީ ބޮން ހަރުކޮށްފައިވަނީ ބަހުގެ ފިޔުލް ޓޭންކުގައި ކަމަށެވެ. ހަމަލާގެ ޒިންމާ އެއްވެސް ފަރާތަކުން ނަގާފައެއްނުވެއެވެ.
މިދިޔަ އަހަރުގެ އޮގަސްޓް މަހު ތާލިބާނުން އަފްޣާނިސްތާނުގެ ވެރިކަމާއި ހަވާލުވި ފަހުން އަފްޣާނިސްތާނުގެ އެކި ސަރަހައްދުތަކުގައި ސަލާމަތީ ކަންކަން ތާލިބާނުން އަންނަނީ ކުރިޔަށްވުރެ ބޮޑަށް ބަލަހައްޓަމުންނެވެ. ނަމަވެސް އަފްޣާނިސްތާނުގެ ކޮންމެވެސް ހިސާބެއްގައި ކޮންމެ ހަފްތާއަކުވެސް މިފަދަ ހަމަލާތައް ދެމުންގެންދެއެވެ.
އެގޮތުން ޚުރާސަން ޕްރޮވިންސްގައި އުޅޭ އިސްލާމިކް ސްޓޭޓުން ދޭތެރެ ދޭތެރެއިން ގެންދަނީ ހަމަލާތައް ދެމުންނެވެ. ވަކިން ޚާއްސަކޮށް އަފްޣާނިސްތާނުގައި އުޅޭ މީސްކޮޅު މަދު ޝީޢީ ހަޒާރާއިންނަށް އަމާޒުކޮށްގެން ހަމަލާތައްދެމުން އަންނައިރު ހޮނިހިރު ދުވަހު ދިން ހަމަލާއަކީވެސް ޝީޢީން އުޅޭ ސަރަހައްދާ ކައިރި ހިސާބެއްގައި ދިން ހަމަލާއެކެވެ.
ހޭރަތަކީ އަފްޣާނިސްތާނުގައި ތިން ވަނައަށް އެންމެ ބޮޑު ސިޓީއެވެ. އަދި އިރާނުގެ ބޯޑަރު ސަރަހައްދާ ކައިރީގައި އޮންނަ ސިޓީއެކެވެ. ފާއިތުވި މަސްތަކުގައި އެސިޓީ ފެނިފައިވަނީ އަމާންތަނެއްގެ ގޮތުގައެވެ.
އަފްޣާނިސްތާނުގެ ސަލާމަތާއި ރައްކާތެރިކަމުގެ މައްސަލައިގެ އިތުރުން އެގައުމު މިވަގުތު ވަނީ އިގްތިޞާދީ ފުން ވަޅުގަނޑަކަށް ވެއްޓިފައެވެ.
އދ. އިން އަންދާޒާކުރާ ގޮތުގައި އަފްޣާނިސްތާނުގެ އާބާދީގެ 23 މިލިއަން މީހުން އަންނަނީ އިންތިހާ ދަރަޖައިގެ ބަނޑުހައި ހޫނުކަން ތަހައްމަލުކުރަމުންނެވެ. އެއީ އާބާދީގެ 55 އިންސައްތަ މީހުންނެވެ.
