އިންސާނީ ހައްޤުތަކާއި ބެހޭގޮތުން ތާލިބާނުން ހުޅަނގާއެކު ވާހަކަތައް ބާއްވަނީ

އަފްޣާނިސްތާނުގެ ވެރިކަމަށް ތާލިބާނުން އައުމަށްފަހު ފުރަތަމަ ފަހަރަށް ޔޫރަޕަށް ކުރާ ދަތުރުގައި އިންސާނީ ހައްގުތަކާއި އިންސާނީ އެހީތެރިކަން ފޯރުކޮށްދިނުމާއި ގުޅޭގޮތުން ހުޅަނގުގެ ގައުމުތަކާއެކު ވާހަކަތައް ބާއްވާނެކަމަށް ތާލިބާނުން ބުނެފިއެވެ.

އަންނަ ހަފްތާގައި މިވާހަކަތައް ބޭއްވުމަށް ހަމަޖެހިފައިވަނީ ނޯވޭގެ ވެރިރަށް އޮސްލޯގައެވެ. ވާހަކަތައް ކުރިޔަށް ގެންދިޔުމަށް ހަމަޖެހިފައިވާކަން ތާލިބާން ސަރުކާރުގެ އިތުރުން ނޯވޭ ސަރުކާރުންވެސް ވަނީ ބުނެފައެވެ. އެކަމާއި ގުޅިގެން ނޯވޭގެ ފޮރިން މިނިސްޓްރީން ބުނީ އެގައުމުން ތާލިބާން ސަރުކާރުގެ އޮފިޝަލުން ޖެނުއަރީ މަހުގެ 23ން 25ށް އެގައުމަށް އައުމަށް ދައުވަތު ދީފައިވާކަމަށެވެ.

ނޯވޭގެ ނޫހެއްކަމުގައިވާ ވީޖީގައި ބުނެފައިވަނީ މިބައްދަލުވުމުގައި އެމެރިކާ، ޖަރމަނީ، އިނގިރޭސިވިލާތް، ފްރާންސް، އިޓަލީ އަދި ޔޫރަޕިއަން ޔޫނިއަން (އީޔޫ)ން ޚާއްސަ މަންދޫބުން ބައިވެރިވާނެއެވެ. ނަމަވެސް މިޚަބަރާއި ގުޅޭގޮތުން ނޯވޭގެ ފޮރިން މިނިސްޓްރީން ބަހެއް ބުނެފައިނުވާކަމަށް އަލްޖަޒީރާއިން ބުނެއެވެ.

ތާލިބާނުންނާއެކު ކުރިޔަށްގެންދާ މިބައްދަލުވުމާއި ގުޅޭ ގޮތުން ނޯވޭގެ ފޮރިން މިނިސްޓަރ ވިދާޅުވީ މިއީ ތާލިބާން ސަރުކާރު ގަބޫލުކުރުމާއި ގަބޫލުނުކުރުމާއި ގުޅޭ ބައްދަލުވުމެއް ނޫންކަމަށެވެ. ނަމަވެސް މިއަދު އަފްޣާން ސަރުކާރު ހިންގަން ތިބި ބަޔަކާއި ވާހަކަދައްކަންޖެހޭކަމަށް މިނިސްޓަރ ވިދާޅުވިއެވެ.

އަދި އަފްޣާނިސްތާނުގެ މިހާރުގެ ހާލަތާއި ގުޅިގެން ވަރަށް ބޮޑަށް ކަންބޮޑުވާކަމަށް ފޮރިން މިނިސްޓަރ ވިދާޅުވިއެވެ. އެގައުމުގެ އިގްތިޞާދީ އަދި ސިޔާސީ ކަންތައްތަކުގެ ސަބަބުން އެތައް މިލިއަން ބަޔެއް ބަނޑުހައި ހޫނުކަން ތަހައްމަލުކުރަން ޖެހިފައިވާއިރު އިންސާނީ މުސީބާތަކާ ކުރިމަތިވެފައިވާކަމަށް މިނިސްޓަރ ވިދާޅުވިއެވެ.

މިބައްދަލުވުމުގައި ތާލިބާންގެ ފަރާތުން އެންމެ އިސްކޮށް ބައިވެރިވެވަޑައިގަންނަވާނީ އަފްޣާނިސްތާނުގެ ފޮރިން މިނިސްޓަރ އާމިރް ޚާން މުއްތަޤީއެވެ. މިދަތުރުވެގެންދާނީ ތާލިބާނުން ޔޫރަޕަށް ކުރާ ފުރަތަމަ ދަތުރުކަމުގައިވިޔަސް މީގެކުރިން ތާލިބާނުން ވަނީ ރަޝިޔާ، އިރާން، ގަތަރު، ޕާކިސްތާން، ޗައިނާ އަދި ތުރުކުމެނިސްތާނަށް ދަތުރުކޮށްފައެވެ.

އަފްޣާން ސަރުކާރުގެ ޑެޕިިޔުޓީ ކަލްޗަރ އެންޑް ކޮމިޔުނިކޭޝަން މިނިސްޓަރ ޒަބީހުﷲ މުޖާހިދު ވިދާޅުވީ އެމެރިކާގެ ވަފުދާއި ޔޫރަޕުން ދެން ބައިވެރިވާ އެހެން މަންދޫބުންނާއެކު ބާއްވާނީ ވަކި ބައްދަލުވުމެއް ކަމަށެވެ. މިވާހަކަތަކުގައި އެންމެ އިސް ކަމެއްގެ ގޮތުގައި ފާހަގަކުރާނެކަމަށް ބެލެވެނީ އަންހެނުންނާއި އަންހެން ކުދިންގެ ހައްގުތަކާއި ގުޅޭގޮތުންނެވެ. އަދި އަފްޣާނިސްތާނުގައި ދިރިއުޅޭ މީސްކޮޅު މަދު ނަސްލުތަކުގެ މީހުންގެ ހައްގުތަކާއި މީސްކޮޅު މަދު ދީންތަކަށް އުޅޭ މީހުންގެ ހައްގުތަކާއި ގުޅޭގޮތުންނެވެ.

ތާލިބާނުން އަފްޣާން ސަރުކާރާ ހަވާލުވިފަހުން ހުޅަނގުވެސް ހިމެނޭގޮތުން މުޅި ދުނިޔޭގެވެސް ކަންބޮޑުވުމެއްގެ ގޮތުގައި ފާހަގަކުރަމުން އަންނަނީ މިފަރާތްތަކުގެ އިންސާނީ ހައްގުތަކުގެ ވާހަކައެވެ.

ޒަބީހުﷲ މުޖާހިދު ދަ އެސޯސިއޭޓެޑް ޕްރެސް ނިއުސް އެޖެންސީއަށް މައުލޫމާތު ދެއްވަމުން ދާދިފަހުން ވިދާޅުވީ މިއަހަރުގެ މަރޗް މަހުގެ ފަހުކޮޅު އަންހެން ކުދިންނަށާއި އަންހެނުންނަށް އަފްޣާންގެ ސްކޫލްތައް ހުޅުވާލާނެކަމަށެވެ.

ގްރޭޑް 7ން މައްޗަށް އަންހެން ކުދިންނަށް ކިޔަވައިދެމުން އަންނަނީ އަފްޣާނިސްތާނުގެ 10 ޕްރޮވިންސެއްގައެވެ. ވެރިރަށް ކާބުލްގައި އަމިއްލަ ޔުނިވަރސިޓީތަކާއި ހައި ސްކޫލްތަކުގައި ކިޔެވުން މެދުނުކެނޑި ކުރިޔަށްދެއެވެ.

ނޯވޭގެ ވަފުދެއް ވަނީ މިދިޔަ ހަފްތާގައި އަފްޣާނިސްތާނަށް ގޮސްފައެވެ. އަދި އެގައުމުގެ ހާލަތު ބަލާފައެވެ.