ހިތަދޫ ހިރާ ސްކޫލަށް ޔޫއޭއީގެ ސަރުކާރުން ދޭ "ޒައިދު ސަސްޓެނައިބިލިޓީ އެވޯރޑް" ލިބިއްޖެއެވެ.
ޒައިދު ސަސްޓެނައިބިލިޓީ އެވޯޑް ދިނުމަށް ބޭއްވި ހަފުލާގައި ރައީސް އިބްރާހީމް މުހައްމަދު ސޯލިހު ވެސް ބައިވެރިވެވަޑައިގަތެވެ. އެވޯރޑް ލިބުމާ ގުޅިގެން ހިރާ ސުކޫލުގެ ދަރިވަރުންނަށް އެމަނިކުފާނު ވަނީ ހޫނު މަރުހަބާއެއް ވިދާޅުވެފައެވެ.
މި އެވޯރޑަކީ، ދެމެހެއްޓެނިވި ހައްލު ހޯދާ ފަރާތްތަކަށް ދުބާއީ ސަރުކާރުން ދޭ ޚާއްސަ އެވޯރޑެކެވެ. އެގޮތުން މި އަހަރުވެސް މި އެވޯރޑަށް ކުރިމަތިލުމަށް ރެކޯޑު އަދަދަކަށް ވަނީ ހުށައެޅުންތައް ލިބިފައެވެ. އެގޮތުން 4000 ޕްރޮޖެކްޓު އެކި ތަންތަނުން ހުށައަޅާފައިވާއިރު، އޭގެ ތެރެއިން ފައިނަލަށް ގޮސްފައިވަނީ 30 ޕްރޮޖެކްޓެކެވެ. އޭގެ ތެރެއިންވެސް އިނާމު ލިބިފައިވަނީ 10 ޕްރޮޖެކްޓަކަށެވެ. އެގޮތުން ހިރާ ސުކޫލަށް ލިބިފައިވަނީ، ގްލޯބަލް ހައިސްކޫލް ކެޓެގަރީން ސައުތު އޭޝިއާ ރީޖަންގެ އެއްވަނައެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ހިރާ ސުކޫލުގެ ޕްރިންސިޕަލް މަރިޔަމް ސިތާރާ ވިދާޅުވީ، އެ ސުކޫލުން ހުށައަޅާފައިވަނީ ރައްކާތެރިކަމާއި ދެމެހެއްޓެނިވި ގޮތެއްގައި ފެން ބޭނުން ކުރުމާގުޅޭ ޕްރޮޖެކްޓެއް ކަމަށެވެ. އެގޮތުން ވާރޭފެން ޖަމާކޮށް، ސާފުކުރުމަށްފަހު، ބޭކާރު ނުވާގޮތަށް އެކި ބޭނުންތަކަށް ބޭނުން ކުރެވޭނެ ގޮތްތައް މި ޕްރޮޖެކްޓުގެ ދަށުން ވަނީ ނިޒާމީ ގޮތެއްގައި ދައްކުވައިދީފައެވެ. އެގޮތުން ފެން އަލުން ސާފުކޮށްގެން އެހެނިހެން ބޭނުންތަކަށް ބޭނުން ކުރެވޭނެ މޮޑެލްއެއް މި ޕްރޮޖެކްޓުގެ ދަށުން ވަނީ ދައްކުވައިދީފައެވެ.
މި މޮޑެލް އެކަށީގެންވާ ގޮތެއްގައި މަސައްކަތްކޮށް، ބޭނުންކުރަން ފެށުމަކީ ކުރިއަށް އޮތް ތަނުގައި އެހެން އިދާރާތަކުންވެސް އޭގެ ބޭނުން ހިފައި، ދެމެހެއްޓެނިވި ގޮތެއްގައި ފެން ރައްކާތެރިކޮށް ބޭނުން ކުރެވޭނެ ނިޒާމެއް ގާއިމުކުރުމަށް މަގުފަހިވެގެންދާނެ ފަދަ މޮޑެލްއެއް ކަމަށް އޭނާ ވިދާޅުވިއެވެ. ރާއްޖޭގެ ރަށްތަކުގެ ނާޒުކު ފެން ފަށަލައިން ފެން ނެގުމުގެ ބަދަލުގައި މި ނިޒާމުގެ ބޭނުން ކުރެވޭނެ ގޮތް ހެދިދާނެކަން އޭނާ ފާހަގަކުރެއްވިއެވެ.
ހިރާ ސްކޫލްގައި މި މޮޑެލް ތައްޔާރު ކުރުމުގައި އިސްކޮށް ހަރަކާތްތެރި ވެފައިވަނީ އެ ސްކޫލްގެ ސެކަންޑަރީ ދަރިވަރުންތަކެކެވެ. އެގޮތުން މި މޮޑެލް އިނާމަށް ޝޯޓު ލިސްޓު ވުމުން، ސުކޫލުގައި ހިންގާ އެފަދަ މަސައްކަތްތަކާގުޅޭ މައުލޫމާތުތައްވެސް އިނާމު ދިން ފަރާތްތަކުން ސާފުކޮށް އޮޅުން ފިލުވާފައިވާކަމަށް ހިރާ ސުކޫލުގެ ޕްރިންސިޕަލް ވިދާޅުވިއެވެ.
ސިތާރާ ވިދާޅުވާ ގޮތުގައި، އުއްމީދަކީ ސްކޫލަށް ލިބެމުންދާ ކާމިޔާބީތަކާއެކު ކުރިއަށް އޮތް ތަނުގައި އެ ސްކޫލްގައި އޭލެވެލްއަށްވެސް ކިޔަވައިދޭން ފެށުމެވެ. އެގޮތުން ހިރާ ސްކޫލަކީ ނޭޝަނަލް ކަރިކިއުލަމްއަށް ކިޔަވައިދޭ ސްކޫލެއްކަން އޭނާ ފާހަގަ ކުރެއްވިއެވެ.
