ތާލިބާނުންގެ އުސޫލުތަކާ ހިލާފުވި މެމްބަރުންތަކެއް ވަކި ކުރަން އެ ޖަމާއަތުން ނިންމައިފިއެވެ.

އެގޮތުން އެ ޖަމާއަތުން 3000 މެމްބަރުން ވަކިކުރަން ނިންމައި ބުނެފައިވަނީ، އެ މީހުން ދިޔައީ އިސްލާމީ ހިލާފަތުގެ ނަން ހުތުރު ކުރަމުން ކަމަަށެވެ. އެ ޖަމާއަތުގެ މެމްބަރުންގެ ކަންކަން މޮނިޓަރ ކުުރުމަށް އެކުލަވާލި ކޮމިޓީން އެ މީހުން ވަކި ކުރަން ނިންމީ ސާފު ފުރިހަމަ ސިފައިންގެ ލަޝްކަރެއް އެކުލަވާލުމަށް ކަމަށް ކޮމިޓީގެ ވެރިޔާ ލަތީފުﷲ ހާކިމީ ބުންޏެވެ.

އޭނާ ބުނީ މިހާތަނަށް 2840 މެމްބަރުން ވަކިކޮށްފައިވާ ކަމަށާއި، އެ މީހުންނަކީ، ކޮރަޕްޝަންގެ އަމަލުތައް ހިންގައި، މަސްތުވާތަކެތީގެ ވިޔަފާރީގައި ބައިވެރިވެ، އާއްމުންގެ ޒާތީ ދިރިއުޅުމަށް ބާރު ފޯރުވި މީހުން ކަމަށެވެ. އޭގެ އިތުރުން ބައެއް މީހުންނަކީ އިސްލާމިކް ސްޓޭޓް (އައިއެސް) އާ ގުޅުން ހުރި މީހުން ކަމަށެވެ.

މިހެން މިކަން ހިނގާފައިވާއިރު، ތާލިބާނުން ވެރިކަމަށް އައުމަށް ފަހު ރޫހާނީ ލީޑަރު ހިބަތުﷲ އަހުންދްޒާދާ ނެރުނު އަމުރެއްގައި ބުނެފައިވަނީ، ކުރީ ސަރުކާރުގެ މުވައްޒަފުންނާއި ސިފައިންނާއި ފުލުހުންނަށް މާފުދީ، އެ މީހުންނާ ދެކޮޅަށް އެއްވެސް އަމަލެއް ނުހިންގާނެ ކަމަށެވެ. އެހެން ނަމަވެސް އެ އަމުރާ ޚިލާފަށް އެތައް ބަޔަކު މަރާފައިވާކަމަށް އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ބުނެފައިވެއެވެ. ތާލިބާނުން ބުނެފައިވަނީ، މެމްބަރުން މޮނިޓަރ ކުރުމުގެ މަސައްކަތް ހުއްޓާ ނުލާނެ ކަމަށާއި، ފިޔަވަޅު އަޅަން ޖެހޭ މީހުންނާމެދު ފިޔަވަޅު އަޅާނެ ކަމަށެވެ.

ވިހި އަހަރަށްފަހު ތާލިބާނުން ވެރިކަމަށް އައީ، 2021ވަނަ އަހަރުގެ އޯގަސްޓު މަހުއެވެ.