100 ކިލޯ ޑްރަގް ކޭސް: ނޫސްވެރިން ވަނުމުން އަދުލު އިންސާފަށް ހުރަސްއެޅޭނެކަމަށް ބަލައި އެއް ގަޒިއްޔާ ސިއްރު
ޗިޓާއި ޙަވާލުވުމަށްފަހުވެސް އަޑުއެހުމަށް ޖުމާން ހާޒިރުވެފައެއް ނުވޭ
ކްރިމިނަލް ކޯޓް
100 ކިލޯގެ ޑްރަގް މައްސަލައިގައި ހިމެނޭ މީހުންގެ މައްޗަށް އުފުލާފައިވާ ދައުވާތަކުގެ ތެރެއިން އެއް ގަޒިއްޔާ ސިއްރު ކޮށްފިއެވެ.
މި މައްސަލައިގައި 10 މީހަކު ހައްޔަރު ކޮށްފައިވާއިރު، ކްރިމިނަލް ކޯޓުގައި މި މައްސަލައިގެ 3 ދައުވާއަކާއި ގުޅޭ ގަޒިއްޔާތަކެއް ކުރިއަށް ދެއެވެ. އެއީ ޑައިމޯފިންޓްރެފިކް ކުރުމުގެދައުވާތަކަކާއި، ޑައިމޯފިން ބޭނުން ކުރުމުގެ ދައުވާތަކެއްގެ އިތުރުން، ކެނެބިސް ބޭނުން ކުރުމުގެ ދައުވާތަކެކެވެ. އޭގެ ތެރެއިން ކެނެބިސް ބޭނުން ކުރުމުގެ ކުށުގެ ދައުވާ އުފުލާފައިވަނީ ނ. ވެލިދޫ، ބީޗްހެވެން، ޖުމާން މުސްތަފާ، ލ. ކަލައިދޫ، ޖަނަވަރީމާގެ، މުހައްމަދު އަހްމަދު، ގއ ދެެއްވަދޫ ދޭލިޔާގޭ މިދުހަތު އިބްރާހިމް، މ ކޮޅުފުށި ޒަހީރާ މަންޒިލް، އަހުމަދު ޝިރުހާން ޝަމީމް އަދި ބަންގްލަދޭޝްގެ ރައްޔިތެއްކަމަށްވާ އެމްޑީ ރަފީޤުލް އިސްލާމެވެ.
މި މައްސަލައިގެ އަޑުއެހުން ބުދަ ދުވަހު ކުރިއަށް ގެންގޮސްފައިވާއިރު، ދައުވާލިބޭ ޖުމާން މުސްތަފާ ޗިޓާއި ޙަވާލުވުމަށްފަހުވެސް އަޑުއެހުމަށް ހާޒިރުވެފައި ނުވާކަމަށް މައްސަލަ ބައްލަވާ ގާޒީ ވިދާޅުވިއެވެ. ދެން އޮންނަ އަޑުއެހުމެއްގައި އެކަމާއި ގުޅިގެން ނިންމަވާ ގޮތެއް ގާޒީ އަންގަވާނެއެވެ.
ބުދަ ދުވަހު ފުރަތަމަ ކުރިއަށްދިޔަ ޑައިމޯފިންޓްރެފިކް ކުރުމުގެދައުވާގެ އަޑުއެހުމުގައި މުޙައްމަދު އަހުމަދާއި، ރަފީޤުލް އިސްލާމް ވަނީ އަމިއްލައަށް ވަކީލަކު އައްޔަނު ކުރުމަށް ފުރުސަތަކަށް އެދިފައެވެ. އަދި ކެނެބިސް ބޭނުން ކުރުމުގެ ދައުވާގެ އަޑުއެހުން ކުރިއަށްދިޔައިރު މިދުހަތު އިބްރާހިމްއާއި އަހުމަދު ޝިރުހާން ޝަމީމް ހާޒިރުވެފައިވަނީ ވަކީލަކާއެކުއެވެ. އަދި މި އަޑުއެހުން ކުރިއަށް ދިޔައިރު ދިފާއީ ވަކީލު ވަނީ މައްސަލަ ކުރިއަށް ގެންދަވާނެ ގޮތް ހިއްސާ ކޮށްދެއްވުމަށް އެދިފައެވެ.
މި އަޑުއެހުން ފެށިގެން ކުރިއަށް ދަނިކޮށް މައްސަލައިގައި ދައުވާލިބޭ ޝިރުހާން ވަނީ މިއީ ކުޑަ މައްސަލައެއްކަން ފާހަގަކޮށް، މީޑިއާތަކުން މައްސަލަ ކަވަރ ކުރުމަށް ދެކޮޅު ހަދާފައެވެ. ޝިރުހާން އެހެން ބުނުމާއި ގުޅިގެން ދިފާއީ ވަކީލުވެސް ވަނީ ޙަޤީޤަތް ބެލުމެއް ނެތި މީޑިއާތަކުން ވާހަކަ ފަތުރާ ކަމަށާއި، ނޫސްވެރިން ޒިންމާދާރު ކަމަށް ނުފެންނަކަަމަށް ވިދާޅުވެފައެވެ. އެގޮތުން 100 ކިލޯގެ މަސްތުވާތަކެތީގެ މައްސަލައިގައި ހިމެނޭ ފަރާތްތައް ދޫވުމުންވެސް މީޑިއާތަކުން އެ ވާހަކަތައް ދައްކާފައިވާކަމަށް ވަކީލު ވިދާޅުވިއެވެ.
"ކުޑަކުޑަ މައްސަލައަކަށްވެފައި، މީޑިއާއިން ވަދެ އިނީމަ، ޒާތީވާހެން ހީވޭ"ޝިރުހާން ބުނެފައިވެއެވެ.
އަދި ނޫސްވެރިން ޒިންމާދާރު ކުރެވޭނެ ގޮތެއްވެސް ނޯންނަކަން ފާހަގަ ކުރައްވައި ދިފާއީ ވަކީލު ނޫރުއްސަލާމް ވަނީ މި މައްސަލަ މީޑިއާތަކުން ކަވަރ ކުރުމުން އަދުލު އިންސާފު ލިބުމަށް އޮވެދާނެ ހުރަހަކަށް ބަލައި، މައްސަލަ ސިއްރު ކޮށްދިނުމަށް އެދިލައްވާފައެވެ.
އެކަމާއި ގުޅިގެން މައްސަލަ ބައްލަވާ ގާޒީ ދީބާނާޒް ފަހުމީ ވަނީ އަދުލު އިންސާފު ޤާއިމު ކުރުމަށް ހުރަސް އެޅިދާނެ ކަމަށް ބައްލަވައި، މައްސަލަ ސިއްރު ކުރެއްވުމަށް ނިންމަވާފައެވެ. އަދި ނޫސްވެރިން ޝަރީއަތުގެ މަޖިލީހުން ނުކުތުމަށް ގާޒީ ވަނީ އަންގަވާފައެވެ.
އަޑުއެހުންތައް ސިއްރު ކުރެވިދާނެ ޙާލަތްތައް ބަޔާންކޮށްފައިވަނީ ޤާނޫނު އަސާސީގެ 42 ވަނަ މާއްދާގައެވެ. އެގޮތުން މުޖުތަމައުގެ އަހުލާޤީ އުސޫލުތައް ހިފެހެއްޓުމާއި، މުޖުތަމައުގެ އަމަންއަމާންކަން ޤާއިމު ކުރުމާއި، ރާއްޖޭގެ ޤައުމީ ސަލާމަތަށް ބުރޫ އެރިޔަ ނުދިނުމާއި، ކުޑަކުދިންގެ މަސްލަޙަތު ހިމާޔަތް ކުރުމާއި، މީހަކު ކުރި ކުށެއްގެ ސަބަބުން އަނިޔާ ލިބިފައިވާ ފަރާތެއްގެ މަސްލަޙަތު ރައްކާތެރި ކުރުމާއި، އާންމުކޮށް ހުޅުވާލައިގެން ކުރިއަށް ގެންގޮސްފިނަމަ، އަދުލު އިންސާފަށް އެޅިދާނެ ހުރަހަކުން މިންޖުވުން ހިމެނެއެވެ.
