ފިހާރަތަކުގައި ހުރި ބުދުތަކުގެ ބޯ ކެނޑުމަށް އެ ފިހާރަތަކުގެ ވެރިންނަށް ތާލިބާނުން އަންގައިފި
ބައެއް ފިހާރަތަކުގެ ވެރިން ވަނީ ޕްލާސްޓިކް ކޮތަޅު ނުވަތަ ފޮތި ބޭނުންކޮށްގެން ބުދުތަކުގެ ބޯ ފޮރުވާފައި
ބުދުތަކުގެ ބޯ ހުރުމުން އެއީ އިސްލާމީ ގާނޫނަށް ފުރައްސާރަކުރުން ކަމަށް ތާލިބާނުން ވަނީ ސިފަކޮށްފައި
ފިހާރަތަކުގައި ހުރި ބުދުތަކުގެ ބޯ ކެނޑުމަށް އެ ފިހާރަތަކުގެ ވެރިންނަށް ތާލިބާނުން އަންގައިފިއެވެ.
ތާލިބާނުން ބުނީ އެގޮތަށް ހުރުމުން އެއީ އިސްލާމީ ގާނޫނަށް ފުރައްސާރަކުރުން ކަމަށެވެ. ފިހާރަތަކުގައި އެގޮތަށް ހުރުމުން ރަހުމަތުގެ މަލާއިކަތުން އެތަންތަނަށް ނުވަންނާނެ ކަމަށެވެ. އަދި ފިހާރަތަކުގައި ހުރި ބުދުތަކުގެ ބޯ ކެނޑުމަށް އެންގުމުން ބައެއް މީހުން އެގޮތަށް އަމަލު ކޮށްފައިވާ ކަމަށާއި އަނެއްބައި މީހުން ޕްލާސްޓިކް ކޮތަޅު ނުވަތަ ފޮތި ބޭނުންކޮށްގެން ބުދުތަކުގެ ބޯ ފޮރުވާފައިވާ ކަމަށް ވެސް އެމީހުން ބުންޏެވެ.
ފިހާރަތަކުގައި ހުރި ބުދުތަކުގެ ބޯ ކެނޑުމަށް އެ ފިހާރަތަކުގެ ވެރިންނަށް ތާލިބާނުން އަންގާފައިވާއިރު، މިދިޔަ ހަފްތާގައި ވަނީ އަންހެނުން އެކަނި ދިގު ދަތުރުތައް ކުރާނަމަ މަހުރަމަކާއެކު ދަތުރު ކުރުމަށް އަންގާފައެވެ. މީގެއިތުރުން ރާ ވިއްކާ ތަންތަން ބަންދުކޮށް، މަސްތުވާތަކެތި ބޭނުންކުރާ މީހުން ހައްޔަރުކޮށް، ލަވަޔާއި މިއުޒިކް އަޑުއެހުން ވެސް ވަނީ އަފްޣާނިސްތާނުގައި މަނާކޮށްފައެވެ.
ތާލިބާން ޖަމާއަތުން އަފްއާނިސްތާނުގައި ސަރުކާރެއް އުފައްދައި އެޖަމާއަތުގެ ވެރިކަމެއް ފެށިފަހުން، އެގައުމަށް ދަނީ ރައްކާތެރިކަމުގެ ގޮތުންނާއި އަދި އިގުތިސާދީ ގޮތުންވެސް ބޮޑެތި ގޮންޖެހުންތަކާ ކުރިމަތިވަމުންނެވެ. އަދި އައިސިސް ހަގުރާމަވެރިންގެ ފަރާތުން ކުރިމަތިވާ ގޮންޖެހުންތަކުގެ ސަބަބުން، ތާލިބާން ޖަމާއަތުން އުފައްދާފައިވާ ސަރުކާރަށް އިތުރުން ދަތިތަކާ ކުރިމަތިވެގެން ދާނެކަމަށް ބޮޑެތި ގައުމުތަކުންދަނީ ބުނަމުންނެވެ.
މީގެ 20 އަހަރުކުރިން، އެގައުމުގައި ތާލިބާން ޖަމާއަތުން ވެރިކަން ކުރިއިރު، އަންހެނުން ތައުލީމު އުނގެނުން މަނާކޮށް، އަދި އާންމު ތަންތަނުގައި އަންހެނުން އުޅުންވެސް އެޖަމާއަތުން އޮތީ މަނާ ކޮށްފައެވެ.
