އަތޮޅުތެރެ އެއްފަސް ކުރުމުގެ މާބޮޑު ފައިދާއެއް ނެތް ކަމަށާއި، ރަނގަޅުވާނީ މާލެ ސަރަޙައްދު އެއްފަސް ކުރުން ކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމު ވިދާޅުވެއްޖެއެވެ.

އާދިއްތަ ދުވަހުގެރޭ ޗެނަލް13 ގެ ޕްރޮގްރާމެއްގައި ވާހަކަ ދައްކަވަމުން ރައީސް ޔާމީން ވިދާޅުވީ، އެއްފަސް ކުރުމުގެ ސިޔާސަތަކީ އޭގެ ޒާތުގައި ދޫކޮށްލާވަރުގެ ސިޔާތެއް ނޫން ކަމަށެވެ. އެހެންނަމަވެސް، އެ ސިޔާސަތު ރަނގަޅަށް ހިންގޭނީ ޚިދުމަތްތައް ފުރިހަމައަށް ލިބެންހުންނަ ބޮޑެތި އާބާދީތަކުގައި ކަމަށް ރައީސް ޔާމީން ސިފަ ކުރެއްވިއެވެ.

ރައީސް ޔާމީން ވިދާޅުވީ، ރާއްޖެ އެއްފަސްކުރަން ބަލާއިރު މާލޭ ސަރަޙައްދުން މާ ދުރަށް އެއްފަސް ކުރުމުގެ މަސައްކަތް ގެންދެވިދާނެ ކަމަށް ޤަބޫލު ނުކުރައްވާ ކަމަށެވެ.

ރައީސް ޔާމީނު އިތުރަށް ވިދާޅުވީ، އެއްފަސް ކުރުމުގެ ސިޔާސަތުތަކެއް ކަނޑައަޅައިގެން އަތޮޅު ތެރޭގެ ބައެއް ސިޓީތަކަށް މީހުން އެއްކުރަން މަސައްކަތް ކުރި ނަމަވެސް، ބަޔަކު އެތަންތަނަށް ގޮސްދާނެކަމަށް އެމަނިކުފާނަށް ޤަބޫލު ނުކުރެއްވޭ ކަމަށެވެ. އެއީ އެކަމުގެ ފަހަތުގައި ހުރި ދަތިތަކުގެ ސަބަބުންކަމަށް ރައީސް ޔާމީނު ވިދާޅުވިއެވެ. އެގޮތުން މާލެއާ އެއްފެންވަރަށް އެތަންތަނުން ޚިދުމަތް ނުލިބޭކަންވެސް ރައީސް ޔާމީނު ސަބަބެއްގެ ގޮތުގައި ފާހަގަ ކުރެއްވިއެވެ.

"އެއްފަސް ކުރުމުގެ ސިޔާސަތެއް ކަނޑައަޅައިގެން ކުޅުދުއްފުއްޓަށް، ނޫނީ ހިތަދޫގައި ބިން އޮވެގެންނޭ ކިޔާފައި އަޅުގަނޑަކަށް ނުފެނޭ ރާއްޖޭގެ އެކި ހިސާބުން މީހުން އެތަނަށް ދަތުރުކޮށްފާނެ ކަމަކަށް،"ރައީސް ޔާމީނު ވިދާޅުވިއެވެ.

ރައީސް ޔާމީނު ވިދާޅުވީ، އަތޮޅުތެރެއަށް މީހުން އެއްފަސްކުރާނަމަ ޚިދުމަތްތަކެއްވެސް ޤާއިމުކުރަން ޖެހޭ ކަމަށެވެ. އޭގެ ބަދަލުގައި މާލެއަކީ މިހާރުވެސް ރާއްޖޭގެ ހުރިހާ ވަސީލަތެއް ހުރި، އެންމެ ފެންވަރުގެ ޚިދުމަތްތައް ލިބެން އޮތް ތަންކަން ފާހަގަ ކުރައްވައި ރައީސް ޔާމީނު ވިދާޅުވީ، އެ ނޫން ތަންތަން އެއްފަސް ކުރަން ބަލާއިރު ސަރުކާރުން ބޮޑެތި ޚަރަދުތަކެއްވެސް ކުރަންޖެހޭނެ ކަމަށެވެ. އެ ޚަރަދުތަކާއެކުވެސް އަތޮޅުތެރެ އެއްފަސްކުރުމުގެ ސިޔާސަތު ކާމިޔާބުވާނެ ކަމުގެ ޔަޤީންކަމެއް އެއްވެސް މީހަކަށް ނުދެވޭނެ ކަމަށް ރައީސް ޔާމީނު ވިދާޅުވިއެވެ. ޚުދު އެމަނިކުފާނު އަމިއްލަފުޅަށްވެސް އެ ސިޔާސަތު ކާމިޔާބުވެދާނެ ކަމަށް ޤަބޫލު ނުކުރައްވާކަމަށް ރައީސް ޔާމީނު ވިދާޅުވިއެވެ.

ރައީސްކަން ކުރައްވަން 5 އަހަރުގެ ދައުރެއް ލިބިގެންދާއިރު، 10 އަހަރު ނުވަތަ 20 އަހަރުން ކުރެވޭ ވަރުގެ މަޝްރޫއެއް ފެށުމަށް އެއްވެސް މީހަކު ރައީސްކަމަށް ކުރިމަތި ނުލައްވާނެކަމަށް ރައީސް ޔާމީނު ވިދާޅުވިއެވެ. ސަބަބެއްގެ ގޮތުގައި ސިފަ ކުރެއްވީ ކޮންމެ ރައީސަކުވެސް އެ ރައީސަކު ފެއްޓެވި މަސައްކަތެއްގެ ކްރެޑިޓް ލިިބިގަތުމުގެ ހިތްހަމަޖެހުން ބޭނުންފުޅުވުމެވެ.

ރައީސް ޔާމީނު ވިދާޅުވީ، އަތޮޅުތެރެ އެއްފަސް ނުކުރި ނަމަވެސް، މާލެ ސަރަޙައްދުގައި ބޮޑެތި ބިން ހުރިނަމަ، މުޅި ރާއްޖޭގެ އިޤްތިސާދު ބަރޯސާވާ ސަރަޙައްދު އެއްފަސްކުރުން މާ ރަނގަޅުކަމަށެވެ.

ރައީސް ޔާމީނު އެހެން ވިދާޅުވެފައިވާއިރު، މިހިނގާ ސަރުކާރުގެ ސިޔާސަތުތައް ބައްޓަންކޮށްފައިވަނީ ހަމައެކަނި މާލެއަށް ބަރޯސާނުވެ، ލާމަރުކަޒީ ނިޒާމެއްގެ ތެރެއިން އަތޮޅުތެރެވެސް ތަރައްޤީކޮށްގެން ހިންގުމަށެވެ. އެގޮތުން އަތޮޅުތެރޭގެ ގެދޮރުވެރިކަމަށް ކުރިއަށްއޮތް ތިން އަހަރަށް 1.5 ބިލިއަނެއްހާ ރުފިޔާ މިހާރު ވަނީ ބަޖެޓުގައިވެސް ހިމަނާފައެވެ. އަތޮޅު ތެރޭގައިވެސް ހައުސިންގ ޔުނިޓުތައް ގާއިމުކުރުމަކީ ސަރަހައްދީ ތަރައްޤީއަށް މުހިއްމުކަމެއްކަން ފާހަގަކޮށް ސަރުކާރުން ވަނީ މި ހައުސިންގ ޔުނިޓުތަކުގެ މަސައްކަތް ނިމުމުން، ރާއްޖޭގެ ހުރިހާ ކަންކޮޅުތަކުގައި ދިމާވެފައިވާ ބޯހިޔާވަހިކަމުގެ މައްސަލަތަކަށް ބޮޑު ލުޔެއް ލިބޭނެކަމަށް ބުނެފައެވެ.