ޑީކޯޑަރަކާއި ނުލައި ސްމާޓް ޓީވީތަކުން މީޑިއާނެޓުގެ ޗެނަލްތަކާއި ވީޑިއޯ ބެލޭނެ މުޅިން އައު ޚިދުމަތެއް!

އެންޑްރޮއިޑް އެޗް ޑީ، ސެމްސަންގް އަދި އެލް ޖީ ސްމާޓް ޓީވީތަކުން ޑީކޯޑަރަކާއި ނުލައި ޗެނަލްތަކުގެ އިތުރުން ވީއޯޑީ ބެލޭނެ މުޅިން އައު ޚިދުމަތެއް 'އެމް އެސް ލައިޓް' ނަމުގައި މީޑިއާނެޓުން ތައާރަފް ކޮށްފިއެވެ.

ކަސްޓަމަރުންގެ މަގުބޫލް ޗެނަލްތައް ހިމަނައިގެން ތައާރަފްކުރި މި ޚިދުމަތުގައި ޕެކޭޖް ތަކަށްވެސް ވަނީ ހެޔޮ ބަދަލުތަކެއް ގެނެސްފައެވެ. އެގޮތުން އެކި ކަހަލަ ފިލްމާއި ސީރީޒްތައް މިހާރު 630 ރުފިޔާ އަށް ބަލައިލެވޭނެއެވެ.

މީލާދީ އާއަހަރާއި ދިމާކޮށް މީޑިއާނެޓުން ތައާރަފް ކުރި މި ޚިދުމަތުން +70 ލައިވް ޗެނަލް ގެ އިތުރުން ތަފާތު އެކި ފިލްްމު ތަކާއި ސީރީޒް އެކަށޭނަ އަގެއްގައި ބަލާލެވޭނެއެވެ. މީގެ ތެރޭގައި ސޮނީ،  ސްޓާރ، ޒީގެ ޗެނަލްތަކުގެ އިތުރުން ސީ.އެން.އެން ހިމެނެއެވެ. އަދި ދުނިޔޭގެ އެންމެ މަގުބޫލު 2 ފުޓްބޯޅަ ލީގު ކަމަށްވާ އިނގިރޭސި ޕުރިމިއަރ ލީގާއި ސްޕެނިޝް ލަލީގާ މުޅި ރާއްޖެއަށް ދައްކަމުންދާ ހަމަ އެކަނި  ޗެނަލްތަކަކީ އައިސް ޓީވީ އަދި އައިސް ސްޕޯރޓްސްއެވެ. އެގޮތުން މި ތައާރަފް ކުރި ޚިދުމަތުން މި ޗެނަލްތައް ބަލާލެވޭނެއެވެ.

މި ޚިދުމަތަކީ ކަސްޓަމަރުންނަށް ވީހާވެސް ލުއިފަސޭހަގޮތަކަށް ޚިދުމަތް ހޯދޭނެހެން ފަރުމާ ކުރެވިފައިވާ ޚިދުމަތެއް ކަމަށް މީޑިއާނެޓުން ބުނެއެވެ. އަދި ބަލާލަން ބޭނުންވާ ޝޯވއެއް ނުވަތަ އިވެންޓެއްގެ ގަޑީގައި ނުބެލިއްޖެ ހާލަތެއްގައި، މި ޚިދުމަތުގައި ހިމެނޭ ކެޗަޕް ފީޗާރ މެދުވެރިކޮށް އެޝޯވ އެއް ނުވަތަ އިވެންޓެއް ބަލައިލެވޭނެއެވެ. މީގެ އިތުރުން "ފޭވަރިޓް ޗެނަލް ލިސްޓް" ހެދުމާއި އެމީހެއްގެ ބޭނުންތަކާއި އެއްގޮތްވާ ގޮތުގެ މަތީން ޗެނަލް ލިސްޓު އަތުރާލުމާއި "ޔޫޒާރ ޕްރޮފައިލް" ހެދުންވެސް ހިމެނެއެވެ.

އެމް.އެސް. ލައިޓް މެދުވެރިކޮށް މީޑިއާނެޓުގެ އަމިއްލަ އުފެއްދުންތައްް ކަމުގައިވާ ނަފްސު، ގިރިދާ ފަދަ ސީރީޒް ތަކުގެ އިތުރުން މަޝްހޫރު ދިވެހި/ ހިންދީ ފިލްމުތައްވެސް ވީޑިއޯ އޮން ޑިމާންޑް ފީޗާރ މެދުވެރިކޮށް ބަލައިލެވޭނެއެވެ. އަދި ބެލުންތެރިން ޝައުގުވެރިވާ ފަދަ އިތުރު ކޮންޓެންޓްތައް މިފީޗާރ މެދުވެރިކޮށް ކުރިއަށް އޮތްތާނގައި ބަލާލެވޭނެ ކަމަށް މީޑިއާނެޓުން ބުނެއެވެ.

މި ޚިދުމަތް މިވަގުތު ބޭނުން ކުރެވޭނީ މާލެ އަދި ހުޅުމާލޭގައެވެ. ނަމަވެސް ކުރިއަށް އޮތްތަނުގައި މި ޚިދުމަތް އިތުރަށް ފުޅާ ކުރުމުގެ ގޮތުން ރާއްޖޭގެ އެހެން ރަށްތަކަށްވެސް މި ޚިދުމަތް ތަޢާރަފް ކުރުމުގެ މަސައްކަތް ކުރަމުން ދާކަމަށް އެ ކުންފުނިން ބުނެއެވެ. މިޚިދުމަތަށް ރަޖިސްޓަރީ ކުރުމަށް ޓީވީ އަށް އެޕްލިކޭޝަން ޑައުންލޯޑު ކުރެއްވުމުން ރަޖިސްޓްރީ ކުރުމަށް ބޭނުންވާ ލިންކު ލިބޭނެއެވެ.