މީޑީއާނެޓްގެ ޗެނަލްތައް ހުއްދަނެތި ދޫކުރާނަމަ ފިޔަވަޅު އަޅާނެކަމުގެ އިންޒާރު

މީޑީއާނެޓްގެ ޗެނަލްތައް އެކުންފުނީގެ ހުއްދަނެތި ދޫކުރުނާނަމަ އެބަޔަކާ މެދު ފިޔަވަޅު އަޅާނެކަމަށް އެކުންފުނިން ބުނެފިއެވެ.

މީޑިއާނެޓުން ބުނީ ރާއްޖޭގައި ދޫކުރުމަށް, އެކުންފުންޏަށް އެކްސްކްލޫސިވް ރައިޓްސް ލިބިފައިވާ ޗެނަލްތައް، ކުންފުނީގެ ހުއްދަ ނެތި، އެހެން ފަރާތްތައް މެދުވެރިކޮށް ހޯދަމުން އަންނަކަން ފާހަގަކުރެވިފައިވާކަމަށެވެ. އަދި މިއީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށް މީޑިއާނެޓުން ބުނެއެވެ.

ކުންފުނިން ހުއްދަ ލިބިގެން ދޫކުރާ ޗެނަލްތައް ހޯދުމަށް ކުންފުނީގައި އެދުމުން އެކަން ހަމަޖައްސައިދޭނެ ކަމަށާއި ނަމަވެސް ހުއްދަ ނެތި ޗެނަލްތައް ދައްކާ ނަމަ ބްރޯޑްކާސްޓްކުރުމުގެ ގާނޫނާއި ކޮޕީރައިޓާ ގުޅޭ އެހެނިހެން ގާނޫނުތަކުގެ ދަށުން ފިޔަވަޅު އަޅަން ނިންމައިފައިވާކަމަށް މީޑިއާނެޓުން ބުނެއެވެ.

މީޑިއާ ނެޓަކީ ރާއްޖޭގައި އެންމެ ފުޅާ ދާއިރާއެއްގައި ކޭބަލް ޓީވީ އޮޕަރޭޓްކުރާ, އަދި ގިނަ އަދަދެއްގެ ޗެނަލްތައް ރާއްޖޭގައި ރީބްރޯޑްކާސްޓްކުރުމަށް ހައްގު ލިބިފައިވާ ކުންފުންޏެވެ.