އިންދިރާގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ކުޑަކުދިންގެ ވޯޑު ފުރިއްޖެއެވެ.
އައިޖީއެމްއެޗްގެ ކުޑަކުދިންގެ ޑޮކްޓަރު މުހައްމަދު ފައިސަލް ވިދާޅުވީ ކުޑަކުދިންގެ ވޯޑުގައި ހުރި 32 އެނދު ފުރި މިހާރު ބައެއް ކުދިންނަށް ފަރުވާ ދެނީ އެމަޖެންސީ ރޫމުގައި ކަމަށެވެ. އަދި މިކަން ހައްލުވާނީ ރަށްރަށުގެ އިތުރުން މާލޭ ސަރަހައްދުގެ ސަރުކާރުގެ އެހެނިހެންތަންތަނުގައި ބަލިތަކަށް ފަރުވާދެވިގެން ކަމަށް ޑރ. ފައިސަލް ވިދާޅުވިއެވެ.
އައިޖީއެމްއެޗްގެ އިތުރުން ހުޅުމާލެ ހޮސްޕިޓަލަކީ މާލެ ސަރަހައްދުން 100 އިންސައްތަ އާސަންދަ ހިއްސާކުރާ ހޮސްޕިޓަލެކެވެ. ނަމަވެސް ހުޅުމާލެ ހޮސްޕިޓަލްގައި ކުޑަ ކުދިންގެ ޚާއްސަ ޑޮކްޓަރެއް ނެތް ކަމުގެ ދަތިތައް ދަނީ ކުރިމަތިވަމުންނެވެ. އައިޖީއެމްއެޗްގެ އޮފިޝަލެއް ވިދާޅުވީ ކުޑަކުދިންގެ ވޯޑު ފުރިފައިވަނީ ޚާއްސަ ހާލަތެއް ކުރިމަތިވިގެން ނޫން ކަމަށާއި، ޗުއްޓީ ދުވަސްވަރަށް ވުމާއެކު ގިނަ ބަޔަކު ޑޮކްޓަރަށް ދެއްކުމަށް ގިނަ ބަޔަކު އަންނަ ކަމަށެވެ.
އައިޖީއެމްއެޗްގެ ހާލަތާ ގުޅޭ ގޮތުން ދާދިފަހުން އެހޮސްޕިޓަލްގެ ސީއީއޯ އިބްރާހިމް ސަލީމް ވިދާޅުވީ ޚިދުމަތްތައް ފުޅާކުރުމަށް ގިނަ މަސައްކަތްތައް ކުރަމުންދާ ކަމަށާއި، ކުރިއަށް އޮތްތަނުގައި އައު ޚިދުމަތްތަކެއް ތައާރަފް ކުރެވިގެންދާނެ ކަމަށެވެ. އެގޮތުން މިއަންނަ އަހަރުގެ ތެރޭގައި ''ސެންޓަރ ފޯ މެންޓަލް ހެލްތް އިންޕޭޝަންޓްގެ ވޯޑް'' ހުޅުވި ބޭނުން ކުރަން ފެށޭނެ ކަަމަށް ސަލީމް ވިދާޅުވިއެވެ. ޖެނުއަރީ މަހުގެ ތެރޭގައި ހުޅުވުމަށް ނިންމާފައިވާއިރު، އެއީ ނަފްސާނީ ބަލިތަކަށް ފަރުވާ ހޯދާ މީހުން ބައިތިއްބައިގެން ފަރުވާ ދޭނެ ވޯޑެއް ކަމަށް ސަލީމް ވިދާޅުވިއެވެ.
