އިތުރު 168 މީހުން ރާއްޖެއިން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، ކޮވިޑަށް ޕޮޒިޓިވްވި 168 މީހުންގެ ތެރެއިން މާލެ ސަރަހައްދުން ފޮޒިޓިވްވެފައިވަނީ 44 މީހުންނެވެ. އަތޮޅުތަކުން 73 މީހުން ޕޮޒިޓިވްވިއިރު ހިންގަމުންދާ ރިސޯޓްތަކުން 50 މީހުން ކޮވިޑަށް ޕޮޒިޓިވްވެފައިވެއެވެ. ލިވަބޯޑުން އެކަކު ވަނީ ފޮޒިޓިވްވެފައެވެ،

މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 95،032ށް އަރާފައެވެ. މީގެތެރެއިން 92،679 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި ގުނަމުން އަންނަނީ 2،079 ކޭހެކެވެ. މީގެތެރެއިން 8 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.

ރާއްޖެއިން މިހާތަނަށް 261 މީހުން ވަނީ މިބަލީގައި ނިޔާވެފައެވެ.

ރާއްޖޭގެ ކޮވިޑްގެ ހާލަތަށް ބަލާއިރު، ދުނިޔޭގައި މިހާރު ފެތުރެމުން އަންނަ ކޮވިޑް-19ގެ އައު ވޭރިއެންޓްކަމުގައިވާ އޮމިކްރޯންގެ ހަތަރު ކޭސް ރާއްޖެއިން ވަނީ ފެނިފައެވެ.