ވަކި ހާލަތެއްގައި ސީޓްބެލްޓް އެޅުން މަޖުބޫރުކޮށްފި

ވަކި ހާލަތްތަކެއްގައި ހަތަރު ފުރޮޅުލީ އުނޅަދުތައް ދުއްވާއިރު، ސީޓްބެލްޓް އެޅުން މަޖުބޫރުކޮށްފިއެވެ.

ޓްރާންސްޕޯޓް މިނިސްޓްރީން ނެރުނު އިއުލާނެއްގައި ބުނީ އަންނަ އަހަރުން ފެށިގެން 30 ކިލޯމީޓަރަށްވުރެ ބާރަށް ދުއްވާ މަގުތަކުގައި ހަތަރު ފުރޮޅުލީ އުނޅަދުތައް ދުއްވާއިރު، ޑްރައިވަރުގެ އިތުރުން އުނޅަދުގެ ކުރީ ސީޓުގައި އިންނަ މީހާ ވެސް ސީޓްބެލްޓް އަޅަން ޖެހޭނެ ކަމަށެވެ.

މި ގަވާއިދަށް އަމަލުކުރަން ފަށާނީ އަންނަ އަހަރުގެ ޖެނުއަރީ މަހުގެ އެއް ވަނަ ދުވަހުން ފެށިގެން ކަމަށް ވެސް މިނިސްޓްރީން ވަނީ ބުނެފައެވެ.

މިނިސްޓްރީން މިގޮތަށް ނިންމާފައިވާއިރު، ދާދިފަހުން އުޅަނދު ބޭނުން ކުރެވޭނެ މުއްދަތު ކަނޑައަޅައި ގަވާއިދަށް އަމަލުކުރަން ވަނީ ފަށާފައެވެ. މި ގަވާއިދަށް އަމަލުކުރަން ފެށުމާއެކު، އެ ރަށެއްގައި ނުވަތަ ސިޓީއެއްގައި ބޭނުން ކުރެވޭނެ ވެހިކަލްގެ އަދަދު ކަނޑައެޅުމަށްފަހު އެނިންމުމަށް އަމަލު ކުރުމަށް ހަމަސް ދުވަހުގެ މުހުލަތެއް ދޭން ޖެހެއެވެ.

މި ގަވާއިދުގައި ވަނީ، ދިވެހިރާއްޖޭގެ ރަށްރަށާއި ސިޓީތަކާއި އެ ނޫންވެސް ސަރަހައްދުތަކުގައި ބޭނުންކުރެވޭނެ އުޅަނދުތަކުގެ އަދަދާއި، އެ އުޅަނދު ބޭނުންކުރެވޭނެ މުއްދަތު ކަނޑައަޅައި، އެ ފަރާތްތަކުން އަމަލުކުރަންޖެހޭ އަސާސީ މިންގަނޑުތަކާއި އެ މިންގަނޑުތަކާ އެއްގޮތަށް އުޅަނދުތަކުގެ އަދަދު ކަނޑައެޅުމަށްފަހުގައި އެކަން ތަންފީޒު ކުރުމުގައި އަމަލުކުރަންޖެހޭ އާންމު އުސޫލުތައް ބަޔާންކޮށްފައެވެ.

އެގޮތުން ސިނާއީ މަސައްކަތްތަކަށް ދޫކޮށްފައިވާ ސަރަހައްދެއްގައިނަމަ، ގަވާއިދު ހިންގާނީ ޓްރާންސްޕޯޓް މިނިސްޓްރީންނެވެ. އަދި ވަކިވަކި ރަށްރަށާއި ސިޓީތަކުގައި މި ގަވާއިދު ހިންގާނީ އެ ރަށެއްގެ ރަށު ކައުންސިލުން ނުވަތަ ސިޓީ ކައުންސިލަކުންނެވެ. އެހެންކަމުން މީހުން ދިރިއުޅޭ ރަށްރަށާއި ސިޓީތަކުގައި ނުވަތަ އެ ރަށްރަށާއި ސިޓީތަކުން ވަކި ސަރަހައްދެއްގައި ބޭނުންކުރުމަށް އުޅަނދުތަކުގެ އަދަދު ކަނޑައަޅާނީ، އެ ރަށެއްގެ ނުވަތަ ސިޓީއެއްގެ ކައުންސިލުންނެވެ.

އުޅަނދުތަކުގެ އަދަދު ކަނޑައެޅުމުގައި އެސެސްމެންޓް ހަދަންޖެހޭއިރު، ސިޓީއެއްގެ އާބާދީއާއި ޖާގައާއި ޕާކިންއަށް އޮތް ޖާގައާއި އަދި އަދަދަށް ގެންނަ ބަދަލަކުން ވިޔަފާރިއަށް ކުރާނެ އަސަރު ފަދަ ކަންކަމަށް ބަލަން ޖެހެއެވެ.

މާލެ ސިޓީގައި އުޅަނދުތަކުގެ އަދަދު ކަނޑައެޅުމާއި، އުޅަނދުގެ އުމުރު ކަނޑައެޅުމަށް މަސައްކަތްކުރަމުން އަންނަ ކަމަށް ސިޓީ ކައުންސިލުން ބުނެފައި ވެއެވެ. އެހެންނަމަވެސް އެއީ ވަރަށް އުނދަގޫ ބުރަބޮޑު މަސައްކަތެއްކަން ވެސް ކައުންސިލުން ފާހަގަކޮށްފައިވެއެވެ.