ދުނިޔޭގެ މުބާރާތުން ރާއްޖޭގެ ފެތުންތެރިންނަށް ރިކޯޑުތަކެއް

ޔުނައިޓެޑް އަރަބި އެމިރޭޓްސް (ޔޫއޭއީ) ގެ ވެރިރަށް އަބޫ ދާބީގައި ކުރިއަށްދިޔަ ދުނިޔޭގެ ފެތުމުގެ މުބާރާތް ކަމަށްވާ 15 ވަނަ ފީނާ ވޯލްޑް ސްވިމިން ޗެމްޕިއަންޝިޕުގައި ދިވެހި ފެތުންތެރިން ގައުމީ ރިކޯޑުތަކެއް ގާއިމުކޮށްފިއެވެ.

މި މަހުގެ 16 ވަނަ ދުހުން ފެށިގެން 21 ވަނަ ދުވަހުގެ ނިޔަލަށް ކުރިއަށްދިޔަ މި މުބާރާތުގައި ރާއްޖޭގެ ހަތަރު ފެތުންތެރިއަކު ވަނީ ވާދަކޮށްފައެވެ. އެ ފެތުންތެރިންނަކީ އަންހެން ދެ ފެތުންތެރިން ކަމަށްވާ އައިޝަތު ސައުސަން އާއި ހަމްނާ އަޙްމަދުގެ އިތުރުން ފިރިހެން ދެ ފެތުންތެރިން ކަމަށްވާ މުޙައްމަދު އާން ހުސައިން އަދި އިމްއާން އަލީއެވެ.

މި މުބާރާތުގައި އަންގާރަ ދުވަހު ކުރިއަށްދިޔަ އިވެންޓުތަކުގެ ތެރެއިން ސައުސަން ގައުމީ ރިކޯޑް އައުކޮށްފައިވަނީ 100 މީޓަރު ބެކްސްޓްރޯކް އަދި 200 މީޓަރު ބެކްސްޓްރޯކް އިވެންޓުންނެވެ. ބެކްސްޓްރޯކް 100 މީޓަރުގެ އިވެންޓް ސައުޝަން ފުރިހަމަކޮށްފައިވަނީ 01:14.03 މިނެޓުންނެވެ. އަދި 200 މީޓަރު ބެކްސްޓްރޯކް އިވެންޓު ފުރިހަމަކޮށްފައިވަނީ 02:43.61 މިނެޓުންނެވެ. މި ދެ ރިކޯޑު ކުރިންވެސް އޮންނަނީ ސައުސަންގެ އަތުގައެވެ. އެގޮތުން 2019 ވަނަ އަހަރު ބޭއްވި ސައުތު އޭޝިއަން ގޭމްސްގައި ވާދަކޮށް 100 މީޓަރު ބެކްސްޓްރޯކް އިވެންޓް ސައުސަން ފުރިހަމަކޮށްފައިވަނީ 01:15.76 މިނެޓުންނެވެ. އަދި 200 މީޓަރު ބެކްސްޓްރޯކް އިވެންޓް ފުރިހަމަކޮށްފައިވަނީ 02:52.37 މިނެޓުންނެވެ.

ސައުސަންގެ އިތުރުން މި ފަހަރުގެ މުބާރާތުގައި ހަމްނާވެސް ވަނީ ގައުމީ ދެ ރިކޯޑެއް އާކޮށްފައެވެ. އެގޮތުން ހަމްނާ އާކޮށްފައިވަނީ އަންހެނުންގެ ޝޯޓްކޯސް 50 މީޓަރު ބެކްސްޓްރޯކުގެ ގައުމީ ރިކޯޑާއި 100 މީޓަރު އިންޑިވިޖުއަލް މެޑްލޭގެ ގައުމީ ރިކޯޑެވެ. 50 މީޓަރު ބެކްސްޓްރޯކްގެ ގައުމީ ރެކޯޑް ހަމްނާ ހަދާފައިވަނީ 32.78 ސިކުންތުން ރޭސް ނިންމައިގެންނެވެ. އަދި 100 މީޓަރު އިންޑިވިޖުއަލް މެޑްލޭގެ ރިކޯޑު ހަމްނާ ހަދާފައިވަނީ 01:15.82 މިނެޓުން ރޭސް ނިންމައިގެންނެވެ.

މީގެ ކުރިން 50 މީޓަރު ބެކްސްޓްރޯކްގެ ގައުމީ ރިކޯޑު އޮންނަނީ ސައުސަން އަތުގައެވެ. އެގޮތުން ސައުސަން އެ ރިކޯޑު ހަދާފައިވަނީ 2019 ވަނަ އަހަރު ބޭއްވި ސައުތު އޭޝިއަން ގޭމްސްގައި 33.89 ސިކުންތުން ރޭސް ނިންމައިގެންނެވެ. އަދި 100 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރިކޯޑު މީގެ ކުރިން އާމިނަތު ރޫޔާ ހުސެއިން އަތުގައި އޮތްއިރު، އޭނާ އެ ރިކޯޑު ހަދާފައިވަނީ މީގެ 15 އަހަރު ކުރިން ބޭއްވި ފުރަތަމަ އޭޝިއަން އިންޑޯ ގޭމްސްގައި 01:19.76 މިނެޓުން ރޭސް ނިންމައިގެންނެވެ.

މީގެ އިތުރުން ދުނިޔޭގެ މުބާރާތުގައި ވާދަކުރި ފިރިހެން ފެތުންތެރިންގެ ތެރެއިިން އިމްއާން ވަނީ ގައުމީ ދެ ރިކޯޑެއް އާކޮށްފައެވެ. އެއީ ފިރިހެނުންގެ ޝޯޓްކޯސް 400 މީޓަރު ފްރީސްޓައިލްގެ ގައުމީ ރިކޯޑާއި 100 މީޓަރު ބެކްސްޓްރޯކްގެ ގައުމީ ރިކޯޑެވެ 400 މީޓަރު ފްރީސްޓައިލްގެ ގައުމީ ރިކޯޑު އިމްއާން ހަދާފައިވަނީ 04:24.45 މިނެޓުން ރޭސް ފުރިހަމަކޮށްގެންނެވެ. މި ރެކޯޑް ކުރިން އޮންނަނީ މުބާލް އައްޒާމް އިބްރާހީމް އަތުގައެވެ. އެއީ 2019 ވަނަ އަހަރު ބޭއްވުނު ސައުތު އޭޝިއަން ގޭމްސްގައި 04:40.28 މިނެޓުން ރޭސް ނިންމައިގެންނެވެ.

ދެން އިމްއާން އާކުރި 100 މީޓަރު ބެކްސްޓްރޯކްގެ ގައުމީ ރިކޯޑު އޭނާ ހަދާފައިވަނީ 01:03.02 މިނެޓުން ރޭސް ނިންމައިގެންނެވެ. މި ރެކޯޑް ކުރިންވެސް އޮންނަނީ އިމްއާނުގެ އަތުގައެވެ. އެގޮތުން އޭނާ ކުރިން މި ރިކޯޑު ހަދާފައިވަނީ 2019 ވަނަ އަހަރު ބޭއްވުނު ސައުތު އޭޝިއަން ގޭމްސްގައި 01:05.26 މިނެޓުން ރޭސް ނިންމައިގެންނެވެ.

މީގެ އިތުރުން މި މުބާރާތުގައި 50 މީޓަރު ފްރީސްޓައިލް އިވެންޓުގެ ގައުމީ ރިކޯޑު އާން ވަނީ އާކޮށްފައެވެ. 2016 ވަނަ އަހަރު ބޭއްވި 13 ވަނަ ފީނާ ވޯލްޑް ޗެމްޕިއަންޝިޕްސްގައި 25.73 ސިކުންތުން އިވެންޓް ފުރިހަމަކޮށްގެން ނިޝްވާން އިބްރާހީމް ހަދާފައިވާ ރިކޯޑު އާން އާކޮށްފައިވަނީ 25.00 ސިކުންތުން ރޭސް ފުރިހަމަކޮށްގެންނެވެ.

މީގެ އިތުރުން ދުނިޔޭގެ މުބާރާތުގައި ދިވެހި ފެތުންތެރިން ވަނީ ދެ ރިލޭއެއްގެ ގައުމީ ރިކޯޑުވެސް އާކޮށްފައެވެ. އެގޮތުން ދިވެހި ފެތުންތެރިން ވަނީ ހަތަރެއް ގުނަ 50 މީޓަރު މިކްސްޑް މެޑްލޭ ރިލޭ އިވެންޓް 02:05.97 މިނެޓުން އަދި ހަތަރެއް ގުނަ 50 މީޓަރު މިކްސްޑް ފްރީސްޓައިލް ރިލޭ އިވެންޓް 01:50.76 މިނެޓުން ފުރިހަމަކޮށް، މި ދެ އިވެންޓުގެ ގައުމީ ރިކޯޑު އާކޮށްފައެވެ.

މި ފަހަރުގެ ދުނިޔޭގެ ފެތުމުގެ މުބާރާތުގައި ރާއްޖޭގެ ހަތަރު ފެތުންތެރިއަކު ވާދަކުރިއިރު، މިދިޔަ އޮގަސްޓް މަހު ޖަޕާނުގެ ވެރިރަށް ޓޯކިޔޯގައި ބޭއްވި އޮލިމްޕިކް ގޭމްސްގައި ދެ ފެތުންތެރިއަކު ވަނީ ރާއްޖެ ތަމްސީލުކޮށްފައެވެ.