ތާލިބާންގެ ލީޑަރުން ބައިނަލްއަގްވާމީ އެހީތެރިކަމަށް އެދިއްޖެ
19 ޑިސެމްބަރު 2021 | އާދީއްތަ 00:23އަފްޣާނިސްތާނަށް ކުރިމަތިވެފައިވާ އިގްތިސާދީ ހާލަތުގެ ސަބަބުން އެގައުމުން ހިޖުރަކުރާ މީހުންގެ އަދަދު ވަނީ އިތުރުވެފައި
ތާލިބާންގެ ހަނގުރާމަވެރިއަކު ކާބުލްގެ މަގެއްގެ މަތީގައި ފޯރިމަރަނީ
އަފްޣާނިސްތާނަށް ކުރިމަތިވަމުން އަންނަ އިގްތިސާދީ ފުންވަޅުގަނޑުން އަރައިގަތުމަށް ބައިނަލްއަގްވާމީ އެހީތެރިކަމަށް ތާލިބާންގެ އިސް ލީޑަރުން އެދިއްޖެއެވެ.
އަފްޣާނިސްތާނަށް ކުރިމަތިވެފައިވާ އިގްތިސާދީ ހާލަތުގެ ސަބަބުން އެގައުމުން ހިޖުރަކުރާ މީހުންގެ އަދަދު ވަނީ އިތުރުވެފައެވެ. ބައިނަލްއަގްވާމީ ގޮތުން ފާހަގަކުރާ ހިޖުރަކުރާ މީހުންގެ ދުވަހާ ގުޅުވައި ތާލިބާނުންވަނީ ބައިނަލްއަގްވާމީ އެހީތެރިކަމަށް އެގައުމު ބޭނުންވެފައިވާކަމަށް ބުނެފައެވެ.
ތާލިބާން ސަރުކާރުގެ ޑެޕިޔުޓީ ފޮރިން މިނިސްޓަރ ޝޭރް މުހައްމަދު އައްބާސް ވިދާޅުވީ ހަނގުރާމައިގެ ސަބަބުން ފަނާވެފައިވާ އަފްޣާނިސްތާނަށް އެހީތެރިވުމަކީ އެމެރިކާ ފަދަ އަފްޣާނިސްތާނަށް ލިބެންޖެހޭ އެތައް ބިލިއަން ޑޮލަރެއް ހިފަހައްޓައިގެން ތިބި ގައުމުތަކުން ކުރަންޖެހޭ ކަމެއްކަމަށެވެ. ފަންޑުތައް ފްރީޒްކޮށްފައި ބެހެއްޓުމުގެ ސަބަބުން އެކަމުގެ އަސަރުކުރަމުން އަންނަނީ ތާލިބާނުންނަށް ނޫންކަމަށާއި އަފްޣާނިސްތާނުގެ އާންމު ރައްޔިތުންނަށްކަމަށް ޑެޕިޔުޓީ ފޮރިން މިނިސްޓަރ ވިދާޅިވިއެވެ.
އދ އިން އަންދާޒާކުރާ ގޮތުގައި ފިނި މޫސުމާއި ދިމާކޮށް އަފްޣާނިސްތާނަށް އެހީތެރިކަން ފޯރުކޮށްނުދީފިނަމަ އެތައް ބަޔަކު ބަނޑުހައިހޫނުކަން އިހުސާސް ކުރަންޖެހޭނެއެވެ. ބައިނަލްއަގްވާމީ މުޖުތަމައުން ގެންދަނީ އެހީތެރިކަން ސީދާ ތާލިބާނުންނަށް ދިނުމާ ދެކޮޅު ހަދަމުންނެވެ. ވަކިން ޚާއްސަކޮށް ތާލިބާނުން އަންހެނުންނާމެދު ގެންގުޅޭ ސިޔާސަތުގެ ސަބަބުން އެހީތެރިވުމަށް ބައިނަލްއަގްވާމީ މުޖުތަމައުން އަންނަނީ ފަސްޖެހެމުންނެވެ.
ޑެޕިޔުޓީ ފޮރިން މިނިސްޓަރ ވިދާޅުވީ ސިޔާސީ ގޮތުންނާއި އިގްތިސާދީ ގޮތުން ކަންކަން ބަދަލުނުވާނަމަ އަދިވެސް ގިނަ ބަޔަކު ހިޖުރަކުރަމުން ގެންދާނެކަމަށެވެ.
އެމެރިކާއިން ވަނީ އަފްޣާނިސްތާނަށް ރެމިޓެންސް ކޭޝް ދޫކުރާނެ ގޮތުގެ ގައިޑް ލައިނެއް ހާމަކޮށްފައެވެ. ނަމަވެސް ފްރީޒްކޮށްފައިވާ 9 ބިލިއަން ޑޮލަރު ދޫކުރުމާމެދު އަދި ތާލިބާންގެ ލީޑަރުންނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާއި ގުޅޭގޮތުން އެމެރިކާގެ ނިންމުން ބަދަލުކޮށްފައެއްނުވެއެވެ.
ތާލިބާންގެ ފޮރިން މިނިސްޓަރ އާމިރް ޚާން ވިދާޅުވީ ބައިނަލްއަގްވާމީ އެކި ޖަމާއަތްތަކުން ދޭ އެހީތެރިކަމަށް މަރުހަބާ ކިޔާކަމަށެވެ. އަދި އެފަރާތްތަކަށް އަފްޣާނިސްތާނުގައި އެއްވެސް ހުރަހެއްނެތި މަސައްކަތްކުރެވޭނެކަމުގެ ޔަގީންކަން ދޭކަމަށްވެސް ފޮރިން މިނިސްޓަރ ވިދާޅުވިއެވެ.
