އަންހެނުންގެ ހައްގުތަކާއި ގުޅޭގޮތުން އަފްޣާނިސްތާނުގައި މިހާރު ވެރިކަން ކުރަމުން އަންނަ ތާލިބާން ސަރުކާރުން ނެރުނު އަމުރުގައި އަންހެނުންނަށް ކައިވެނިކުރުމަށް މަޖުބޫރުކޮށް އެއީ މުދަލެއްގެ ގޮތުގައި ނުބެލެވޭނެކަމަށް ބުނެފިއެވެ.
މިއަމުރުގައި އިތުރަށް ބުނެފައިވަނީ ކައިވެނިކުރުމުގައި އަންހެން މީހާގެ ރުހުންވެސް ބޭނުންވާނެކަމަށެވެ. ނަމަވެސް އަންހެނުން ތައުލީމު ހާސިލުކުރުމާއި ގެއިން ބޭރުގައި މަސައްކަތްކުރުމާއި ގުޅޭގޮތުން މި އަމުރުގައި އެއްވެސް ވާހަކައެއް ހިމަނާފައެއްނުވެއެވެ.
އޮގަސްޓް މަހުގެ 15 ވަނަ ދުވަހުން ފެށިގެން އަފްޣާނިސްތާނުގައި ވެރިކަން ކުރަމުން އަންނަ ތާލިބާނުންނަށް ބައިނަލްއަގްވާމީ މުޖުތަމައު އެންމެ ބޮޑަށް ޕްރެޝަރ ކުރާ މައްސަލައަކީވެސް އަންހެނުންގެ ހައްގުތަކުގެ މައްސަލައެވެ. އެކަމާއި ގުޅިގެން ފްރީޒްކޮށްފައިވާ އަފްޣާނިސްތާނުގެ އެތައް ފަންޑުތަކެއް ދޫކޮށްލުމަށްވެސް ބައިނަލްއަގްވާމީ މުޖުތަމައުން އަންނަނީ ދެކޮޅު ހަދަމުންނެވެ.
މިއަމުރު އިއްވަވަމުން ތާލިބާނުގެ ސްޕޯކްސްމަން ޒަބީހުއްﷲ މުޖާހިދު ވިދާޅުވީ އަންހެން މީހާއަކީ މުދަލެއް ނޫންކަމަށާއި އޭނާއަކީ އިންސާނެއްކަމަށެވެ. އަދި އެއްވެސް މީހަކަށް އަންހެނަކު މުދަލެއްގެ ގޮތުގައި ނުވިއްކޭނެކަމަށްވެސް ވަނީ ވިދާޅުވެފައެވެ.
މިއާއެކު މުދަލަށް ކައިވެނި ކުރުވުމުގެ ކަންކަން ނިމުމަކަށް އަންނާނެކަމަށް ބެލެވެއެވެ. އަފްޣާނިސްތާނުގެ ގިނަ އަންހެނުންނަށް ކައިވެނިކުރަން މަޖުބޫރުކުރާއިރު ފިރި މަރުވެފައި ތިބޭ އަނބިންނަށް މަރުވި ފިރިމީހާގެ މުދަލުން އެއްވެސް އެއްޗެއް ނުލިބެއެވެ. ނަމަވެސް ތާލިބާން ސަރުކާރުން ނެރުނު އަމުރުގައި ވަނީ ފިރި މަރުވެފައި ތިބޭ އަނބިންނަށް އެމީހުންގެ ފިރިންގެ މުދަލުން ހިއްސާ އޮންނާނެކަމަށެވެ.
އަދި ކޯޓުތަކުން މިކަންކަމަށް ކުރިޔަށް އޮތްތަނުގައި ބަލަންޖެހޭނެކަމަށާއި އިންފޮރމޭޝަން މިނިސްޓްރީން މިހައްގުތަކުގެ ވާހަކަ ދައްކާ މީހުން މިކަމަށް ހޭލުންތެރިކުރުވަން ޖެހޭނެކަމަށްވެސް މިއަމުރުގައި ބުނެފައިވެއެވެ.
ނަމަވެސް އަދިވެސް އަންހެނުންނަށް ތައުލީމު ހާސިލުކުރުމުގެ ފަހި ފުރުސަތެއް ފަހިކޮށްދީފައިނުވާއިރު ގެއިން ބޭރުގައި އަންހެނުންނަށް މަސައްކަތްކުރުމުގެ ފަހި ފުރުސަތެއް ތާލިބާން ސަރުކާރުން ގާއިމުކޮށްފައެއްނުވެއެވެ.
1996 ވަނަ އަހަރުން 2001 ވަނަ އަހަރާ ހަމައަށް ތާލިބާނުން އަފްޣާނިސްތާނުގައި ވެރިކަންކުރި ދުވަސްވަރު މަހުރަމަކާ ނުލާ އަންހެނުންނަށް ގެއިން ބޭރަށް ނިކުމެ އުޅުން ވަނީ މަނާކޮށްފައެވެ. އަދި ތައުލީމު ހާސިލްކުރުމަށް ދެވޭނީ އެއްކޮށް ނިވާވެ ތިބެގެންނެވެ.
ތާލިބާނުން ބުނެފައިވަނީ މިހާރު ބައެއް ޕްރޮވިންސްތަކުގައި އަންހެނުންނަށް ހައި ސްކޫލަށް ދެވޭނެކަމަށެވެ. ނަމަވެސް އަންހެނުންގެ ހައްގުތަކަށް މަސައްކަތްކުރާ ގްރޫޕްތަކުން މިވާހަކަތައް ގަބޫލުކުރުމާމެދު އަންނަނީ ދެކޮޅު ހަދަމުންނެވެ.
