އަޕްގްރޭޑް ކުރުމަށްފަހު ސިސްޓަމަށް މައްސަލަ ދިމާވޭ، ހައްލުކުރުމަށް ކެނޑިނޭޅި ދަނީ މަސައްކަތް ކުރަމުން
29 ނޮވެމްބަރު 2021 | ހޯމަ 07:35އަޕްގްރޭޑްގެ މަސައްކަތަށް ފަހު ދޭތެރެ ދޭތެރެއިން ސިސްޓަމްތައް މެދުކެނޑުމުގެ މައްސަލަ އެބަ ދިމާވޭ
ބޭންކް އޮފް މޯލްޑިވްސްގެ އިންޓަރނެޓް ބޭންކިންގ އެޕްލިކޭޝަން | ބީއެމްއެލް
އަޕްގްރޭޑް ކުރުމަށްފަހު ސިސްޓަމަށް މައްސަލަ ދިމާވާ ކަމަށް ބޭންކް އޮފް މޯލްޑިވްސް އިން ބުނެފިއެވެ.
އެ ބޭންކުން ބުނީ ބޭންކުގެ އޮޕަރޭޝަން ރަނގަޅު ކުރުމަށާއި ސިސްޓަމްތަކުގެ ސެކިއުރިޓީ އާއި ޓެކްނޮލޮޖީ ސްޓޭންޑަޑް ދެމެހެއްޓުމަށްޓަކައި، ބޭންކް އޮފް މޯލްޑިވްސްއިން ސިސްޓަމް އަޕްގްރޭޑް ކުރުމުގެ މަސައްކަތްތައް ކުރެވޭ ކަމަށެވެ.
އެގޮތުން، 21 ނޮވެމްބަރު 2021 ގައި ބޭންކުގެ ކޯ ބޭންކިންގ ސިސްޓަމްގެ އަޕްގްރޭޑްގެ ބޮޑު މަސައްކަތެއް ނިންމާލާފައިވާ ކަމަށެވެ. ކޯ ބޭންކިންގ ސިސްޓަމްގެ އަޕްގްރޭޑް މަސައްކަތަކީ އުނދަގޫ އަދި އެހާމެ ބޮޑު މަސައްކަތަކަށް ވުމާއެކު އެކަމުގެ ސަބަބުން ހިދުމަތްތައް މެދުކެނޑިގެން ދިޔުމަކީ ދުނިޔޭގެ ކޮންމެ ބޭންކަކަށްވެސް ކުރިމަތިވެދާނެ ކަމެކެވެ.
ބޭންކަށް އަންދާޒާ ކުރެވުނީ އަޕްގްރޭޑްގެ ސަބަބުން ސިސްޓަމްތައް މެދުކެނޑިގެންދާނީ ކުޑަ މިންވަރަކަށް ކަމުގައިވީނަމަވެސް ސިސްޓަމަށް ދިމާވެދާނެ ކަމަކަށް ތައްޔާރުވެ ބޭންކުންވަނީ ކުރިޔާލާ ކަސްޓަމަރުންނަށް އަންގާފައި ކަމަށް ބީއެމްއެލުން ބުންޏެވެ. ނަމަވެސް އަޕްގްރޭޑްގެ މަސައްކަތަށް ފަހު ދޭތެރެ ދޭތެރެއިން ސިސްޓަމްތައް މެދުކެނޑުމުގެ މައްސަލަ ދިމާވަމުންދާ ކަމަށާއި ބޭންކުން މިދަނީ މައްސަލަ ހައްލުކުރުމަށް ކެނޑިނޭޅި މަސައްކަތް ކުރަމުން ކަމަށް އެ ބޭންކުން ވަނީ ބުނެފައެވެ.
ބީއެމްއެލްގެ އިންޓަރނެޓް ބޭންކިންގ ހިދުމަތާއި އޭޓީއެމް މެދުވެރިކޮށް ފައިސާ ޖަމާކުރުމާއި ނެގުމަކީ ވަރަށް ގިނަ އާންމުން ރައްޔިތުން ބޭނުން އަންނަ ޚިދުމަތަކަށްވާއިރު ބީއެމްއެލްގެ ސިސްޓަމަށް ދިމާވި މައްސަލައާ ގުޅިގެން ރައްޔިތުން ވަނީ ކަންބޮޑުުވުން ފާޅުކޮށްފައެވެ. އަދި މި މައްސަލަ ހައްލު ނުވެ ދިގުލައިގެންދާތީ އެކަމުގެ ޝަކުވާ ވެސް އަންނަނީ ކުރަމުންނެވެ.
