އަންހެނުން ޓީވީ ޑްރާމާތައް ކުޅުން ތާލިބާން ސަރުކާރުން މަނާކޮށްފި
އަންހެން ޕްރެޒެންޓަރުން ބުރުގާ އެޅުން ވަނީ މަޖުބޫރުކޮށްފައި
ޠާލިބާނުންގެ އުސޫލުތަކާއި ދެކޮޅަށް އަފްޣާންގެ އަންހެން ކަނބަލުން ކުރި މުޒާހަރާގެ ތެރެއިން
އަފްޣާނިސްތާނުގައި އަންހެނުން ޓީވީ ޑްރާމާތައް ކުޅުން އެގައުމުގައި ވެރިކަންކުރާ ޠާލިބާން ސަރުކާރުން މަނާކޮށްފިއެވެ.
ޠާލިބާނުން އެކުލަވާލި އައު ގަވާއިދުގައި ބުނީ އެގައުމުގެ އަންހެނުން ޓީވީ ޑްރާމާތަކުގައި ހަރަކާތްތެރިވެ އުޅުން މަނާކޮށްފައިވާ ކަމަށެވެ. އަދި އަންހެން ޓީވީ ޕްރެޒެންޓަރުންނާއި، ނޫސްވެރިން ބުރުގާއެޅުން މަޖުބޫރުކޮށްފައިވެއެވެ.
އެ ނިންމުމާއި ގުޅިގެން އަފްޣާނިސްތާނުގެ ނޫސްވެރިން ތަމްސީލުކުރާ ޖަމާއަތްތަކުން ވަނީ ނުރުހުން ފާޅުކޮށްފައެވެ. އޭގެ ތެރެއިން ޖަމިއްޔާއެއް ތަމްސީލުކުރާ މެމްބަރެއް ކަމަށްވާ ހުޖަތުﷲ މުޖުދީ ބުނީ ޠާލިބާނުންގެ އައު އުސޫލަކީ ހީވެސް ނުކުރާ އުސޫލެއް ކަމަށެވެ. މީގެ ކުރިން ޠާލިބާނުން އެކުލަވާލި ގަވައިދުތަކުގައިވެސް އަންހެނުންގެ ގިނަ ހައްގުތަކެއް ނިގުޅައިގަނެފައިވެއެވެ.
،މީގެ އިތުރުން ޠާލިބާނުން އެކުލަވާލި އައު ގަވާއިދުގައި ކޮމެޑީ އަދި މުނިފޫހިފިލުވުމުގެ ޝޯވތަކާއި، އެހެން ގައުމުތަކުގެ ސަގާފަތް ދައްކުވައިދޭ ފިލްމުތައް އެގައުމުގެ ޗެނަލްތަކުން ދެއްކުން ވަނީ މަނާކޮށްފައެވެ.
އަންހެނުންގެ ހައްގުތައް ގެއްލޭނެ ފަދައިން ޠާލިބާނުން ގަވާއިދުތައް އެކުލަވާލަމުންދާތީ ބައިނަލްއަގްވާމީ ޖަމިއްޔާތަކާއި ގައުމުތަކުން ޠާލިބާން ސަރުކާރަށް ފާޑުކިޔުން ވަނީ އަމާޒުވެފައެވެ.
