ދައުލަތުގެ ޚަރަދަށް ޒިންމާވުމުގެ ގާނޫނުގެ ބައެއް މާއްދާތައް އިސްތިސްނާކުރުމަށް ނިންމި ރިޕޯޓް މަޖިލީހަށް

ދައުލަތުގެ ޚަރަދަށް ޒިންމާވުމުގެ ގާނޫނުގެ ބައެއް މާއްދާތައް އިސްތިސްނާކުރުމަށް ނިންމި ރިޕޯޓް މަޖިލީހަށް ހުށަހަޅައިފިއެވެ.

ރާއްޖެ އަދިވެސް އޮތީ އިސްތިސްނާ ދެވޭ ހާލަތެއްގައި ކަމަށާއި، އޯވަރޑްރޯކޮށްފައިވާ މިންވަރު ކުރު މުއްދަތެއްގެ ތެރޭގައި އަނބުރާ އަދާކުރުމަށް ހިރާސްތަކެއް ހުރިކަން ކޮމިޓީންވަނީ ފާހަގަކޮށްފައެވެ. އެއާއެކު ދައުލަތުގެ ކޭޝްފްލޯ މެނޭޖް ކުރުމަށް އޮތް މުހިންމު ވަސީލަތަކީ އޯޑީ ކުރުން ކަމަށާއި އެހެންކަމުން އިސްތިސްނާގެ މުއްދަތު 31 ޑިސެމްބަރު 2023ގެ ނިޔަލަށް އިތުރު ކުރުމަށް ނިންމުމަށް މާލިއްޔަތު ކޮމިޓީއަށް ފެންނަ ކަމަށް ނިންމާފައިވެއެވެ.

މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓް މަޖިލީހަށް ހުށަހަޅުއްވަމުން ކޮޮމިޓީގެ މުގައްރިރު ކިނބިދޫ ދާއިރާގެ މެމްބަރު މުހައްމަދު ނާޝިޒް ވަނީ ކޮމިޓީގެ ނިންމުން ތަފްސީލް ކޮށްދެއްވާފައެވެ. ނާޝިޒް ވިދާޅުވީ، ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ) އާއި، (ރ)އާއި، (ބ) ގައި ބަޔާންކޮށްފައިވާ ހަމަތަކާއި އުސޫލުތަކަށް އަމަލުކުރުން ފަސްކުރުމުގެ މުއްދަތު 2023 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހާއި ހަމައަށް އިތުރުކޮށްދިނުމަށް ކޮމިޓީގެ އަޣުލަބިއްޔަތުން ނިންމާފައިވާ ކަމަށެވެ.

އަންނަ އަހަރުގެ ޑިސެންބަރު މަހުގެ 31 ވަނަ ދުވަހުގެ ނިޔަލަށް ޕަބްލިކް ބޭންކް އެކައުންޓް އޯވަޑްރޯވެފައި ހުންނަ މިންވަރު ސެކިއުރިޓައިޒްކޮށް، މޯލްޑިވްސް މަނިޓަރީ އޮތޯރިޓީން ސަރުކާރަށް އިޝޫކޮށްފައިވާ 50 އަހަރުގެ އެމޯޓައިޒިންގ ބޮންޑަކަށް ބަދަލުކުރުމަށާއި، އަދި މި ބޮންޑުގެ ކޫޕަން ރޭޓަކީ އަހަރަކަށް 2.5 (ދޭއް ޕޮއިންޓް ފަހެއް) ޕަސަންޓް ކަމުގައި ކަނޑައެޅުމަށް ނިންމާފައިވާ ކަމަށެވެ. އަދި 2202 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން 2023 ވަނަ އަހަރުގެ ޑިސެމްބަރު މަހުގެ 31ވަނަ ދުވަހާއި ހަމައަށް ޕަބްލިކް ބޭންކް އޯވަޑްރޯ ކުރެވޭނެ އެންމެ މަތީ ލިމިޓަކީ 2.5 (ދޭއް ޕޮއިންޓް ފަހެއް)ބިލިއަން ރުފިޔާ ކަމުގައި ކަނޑައެޅުމަށާއި، އަދި 2022 ވަނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެން ޕަބްލިކް ބޭންކް އެކައުންޓް އޯވަޑްރޯވެފައި ހުންނަ ކޮންމެ ދުވަހަކު، އޯވަޑްރޯވެފައިވާ ބެލަންސުން އަހަރަކަށް 0.1 (ސުމެއް ޕޮއިންޓް އެކެއް) ޕަސަންޓްގެ ރޭޓުން މޯލްޑިވްސް މަނިޓަރީ އޮތޯރިޓީން އިންޓްރެސްޓް ޗާޖުކުރާގޮތަށް ހަމަޖެއްސުމަށް ކޮމިޓީން ނިންމާފައިވާ ކަމަށް ނާޝިޒް ވިދާޅުވިއެވެ.

މި ނިންމުމަކީ ދައުލަތުގެ ޚަރަދު މެނޭޖް ކުރުމާއި ތަރައްގީގެ މަޝްރޫއުތައް ހިންގުމަށް މުހިއްމު ނިންމުމެއް ކަމަށް ފިނޭންސް މިނިސްޓަރ ވަނީ ވިދާޅުވެފައެވެ.