ހެޔޮއެދޭ ފަރާތަކުން ށ. ފީވަކުގައި ބިނާކުރާ މިސްކިތުގެ ބިންގާ އަޅައިފި
މިއީ 154 މީހުން ޖާގައިގެ މިސްކިތެއް
ބިންގާ އެޅުމުގެ ރަސްމިއްޔާތުގެ ތެރެއިން
ހެޔޮއެދޭ ފަރާތަކުން ށ. ފީވަކުގައި ބިނާކުރަން ނިންމާފައިވާ (މަސްޖިދު ޢަލީ ޔޫސުފް) މިސްކިތުގެ ބިންގާ މިއަދު އަޅައިފިއެވެ.
މިސްކިތުގެ ބިންގާ އަޅާފައިވަނީ މިއަދު ހަވީރު ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ފީވަކުގެ ގިނަ އަދަދެއްގެ ރައްޔިތުން ބައިވެރިވެފައިވެއެވެ. ރަސްމިއްޔާތުގެ ތެރެއިން، ހެޔޮއެދޭ ފަރާތްތަކަކުން ވަނީ މިސްކިތް ބިނާކުރުމުގައި ހަރަކާތްތެރިވާ ޓީމަށާއި ރަސްމިއްޔާތަށް ވަޑައިގެންނެވި ފަރާތްތަކަށް ޚާއްސަ ސައިފޮދެއްވެސް އަރުވާފައެވެ.
ދެ ޖިންސްގެ މީހުންނަށް ވެސް ނަމާދު ކުރެވޭ ގޮތަށް އިމާރާތްކުރާ މި މިސްކިތަކީ 154 މީހުން ޖާގައިގެ މިސްކިތެކެވެ. ފީވަކު ކައުންސިލުން ހާމަކުރި ގޮތުގައި، މިސްކިތް އިމާރާތް ކުރުމަށް ހަމަޖެހިފައިވަނީ (ވަށާފާރު ހިމަނައިގެން) 10000 އަކަފޫޓުގެ ބިމެއްގައި ކަމަށާއި، މި މިސްކިތަކީ މުންނާރާއި، ގުދަނާއި، އިސްކުރުބަރި އަދި ފާޚާނާބަރިވެސް ހިމެނިގެން އިމާރާތް ކުރެވިގެންދާ މިސްކިތެއް ކަމަށެވެ. އަދި ނަމާދުކުރާބައިގެ ބޮޑުމިނުގައި 1296.2 އަކަފޫޓު ހުންނާނެ ކަމަށްވެސް ކައުންސިލުން ވަނީ ހާމަކޮށްފައެވެ.
މި މިސްކިތަކީ, ޤިބްލަ ފާހަގަކޮށްދޭ ދުވަހުން ފެށިގެން 250 ދުވަހުގެ ތެރޭގައި ނިންމައިދޭން ހަމަޖެހިފައިވާ މިސްކިތެކެވެ. މި މަހުގެ 11 ވަނަ ދުވަހު މި މިސްކިތުގެ ޤިބްލަ ހޯދުމުގެ މަސައްކަތް އިސްލާމިކް މިނިސްޓްރީގެ ޓީމަކުން ވަނީ ކުރިޔަށް ގެންގޮސްފައެވެ.
