މިހާރު ހުށަހަޅާފައިވާ ބަޖެޓަށް މުއައްސަސާތަކުން އެދޭ ބަޖެޓް އިތުރުކުރުމަކީ މި ދަނޑިވަޅުގައި ކުރެވޭނެ ކަމެއް ނޫން ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

ބަޖެޓު ދިރާސާކުރާ ކޮމިޓީގައި ދައުލަތުގެ ބަޖެޓާ ގުޅޭގޮތުން ކޮމިޓީގެ މެމްބަރުންގެ ސުވާލުތަކަށް ޖަވާބުދެއްވަމުން އަމީރު ވިދާޅުވީ، މިހާރު ހުށަހަޅާފައިވާ ބަޖެޓަކީ، ހުށަހެޅޭނެ އެންމެ ބޮޑު ބަޖެޓް ކަމަށެވެ. އެހެންކަމުން މުއައްސަސާތަކުން އިތުރުކުރުމަަށް އެދޭ މިންވަރު ބަޖެޓަށް އިތުރުކުރުމަކީ ދަތިކަމެއް ކަމަށާއި، ކޮވިޑްގެ މިހާލަތާއެކު، އެންމެ ބޮޑަށް ބަޖެޓް ހުށަހެޅޭނީ މިހަާރު އޮތް ވަރަށް ކަމަށް އަމީރު ވިދާޅުވިއެވެ. އަމީރު ވިދާޅުވީ، ބަޖެޓް އެކުލަވާލުމުގައި މިނިވަން މުއައްސަސާތަކާއިއެކުވެސް ފުޅާ ދާއިރާއެއްގައި މަޝްވަރާ ކުރެއްވި ކަމަށެވެ.

ދައުލަތަށް އާމްދަނީ ހޯދުމަށް ޓެކްސްގެ ގޮތުގައި ލިބޭ އާމްދަނީ އިތުރު ކުރުމަށް ބަޖެޓްގައި ހިމަނާފައިވާނެކަމަށް ވިދާޅުވިއެވެ. އެގޮތުން ޕްލާސްޓިކުން ޓެކްސް ނަގަން ފެށުން އަމީރު ފާހަގަކުރެއްވިއެވެ. މުއައްސަސާތަކުން އެދޭގޮތަށް ބަޖެޓް ބޮޑުކުރާނަމަ ބަޖެޓް 60 ބިލިއަނަށް އަރާނެ ކަަމަށް އަމީރު ވިދާޅުވިއެވެ. އެއީ މިވަގުތު ހުށަހެޅޭނެ ވަރުގެ ބަޖެޓެއް ނޫން ކަމަށް ތަކުރާރުކޮށް އަމީރު ވިދާޅުވިއެވެ.

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ކަނޑައަޅާފައިވާ ބަޖެޓަށް 7 މިލިއަން ރުފިޔާ އިތުރުކުރަން ބަޖެޓު ކޮމިޓީއަށް ހުށަހަޅަން އާންމު ކޮމިޓީން ވަނީ ފާސްކޮށްފައެވެ. މިއީ ނިއު ޕޮލިސީ އިނިޝިއޭޓިވްގެ ދަށުން ހުށަހެޅި ހަތް މިލިއަން ރުފިޔާއެވެ. މިވަގުތު މަޖިލީހުގެ އިމާރާތުގައި ލިފްޓުގެ ދަތިކަން ހުރުމާއި، ކޮމިޓީ ރޫމްތަކުގައި އިދާރީ ބޭނުމަށް ބޭނުންވާ ވަސީލަތްތައް ވެސް އެންމެ އެކަށީގެންވާވަރަށް ނެތްކަން އާއްމު ކޮމިޓީގައި މެމްބަރުން ފާހަގަކުރެއްވިއެވެ. އަދި ކޮމިޓީ އާއި މަޖިލީހުގެ ޖަލްސާތައް އެކުއެކީގައި ހިނގަމުން އަންނައިރު ކޮމިޓީތަކުގައި ތިއްބަވާ މެންބަރުންނަށް ޖަލްސާތަކުގައި ހިނގާ ކަންކަން އެނގޭނެ ގޮތެއް ނެތުމުން ޖަލްސާގައި ބައިވެރިވުމުގެ ފުރުސަތު ހަނިކަމުގައި މެމްބަރުން ވަނީ ވިދާޅުވެފައެވެ.