މި ފަސް އަހަރު ނިމޭއިރު، އާއްމުކޮށް މި ކިޔާ ޕީއެސްއައިޕީ ޕްރޮޖެކްޓުން ނެއްޓިގެންދާނެ ކަމަށް ދާންދޫ ދާއިރާގެ މެމްބަރު ޔަގޫބް އަބްދުﷲ ވިދާޅުވެއްޖެއެވެ.
ޔައުގޫބް މިހެން ވިދާޅުވީ، އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސް ކުރައްވަމުންނެވެ. ޔައުގޫބް ވިދާޅުވީ، ފެނާއި ނަރުދަމާއަކީ އެމްޑީޕީން އުފަންކުރި ވައުދެއް ކަމަށާއި، އެއީ އަސާސީ ހައްގެއް ކަމަށެވެ. އެއްވެސް ރަށެއްގައި ތަފާތުކުރުމެއްނެތި، އެ ވައުދު މި ސަރުކާރުގެ ފަސް އަހަރު ނިމޭއިރު ފުއްދާނެ ކަމަށެވެ. މީގެ ކުރިން ރިޔާސީ ކެމްޕެއިންގައި އިވެނީ ބަނދަރާއި ސްކޫލްތަކުގެ ވާހަކަތައް ކަމަށެވެ. މި ފަސް އަހަރު ނިމޭއިރު ފެނާއި ނަރުދަމާގެ ވާހަކަ އިންތިޚާބާ ދިމާކޮށް ރައްޔިތުން ނުދައްކާނެ ކަމަށް ޔައުގޫބް ވިދާޅުވިއެވެ.
އެހެންކަމުން ދެން އަންނަ ދައުރަކަށްދާއިރު، ރައްޔިތުން ބޭނުންވާނެ ކަންކަން މިހާރު ރައްޔިތުން ވިސްނަން ޖެހޭ ކަމަށެވެ. އާއްމުކޮށް މި ކިޔާ ޕީއެސްއައިޕީ ޕްރޮޖެކްޓުން މި ފަސް އަހަރުގެ ތެރޭގައި ނެއްޓިގެންދާނެ ކަމަށް ޔައުގޫބް ވިދާޅުވިއެވެ.
ކުރީ ސަރުކާރުން ފަސް އަހަރުގެ ތެރޭގައި 6.8 ބލިއަން ޕީއެސްއައިޕީއަށް ޚަރަދުކުރިއިރު، މި ސަރުކާރުން މިހާތަނަށް 28 ބިލިއަން ރުފިޔާގެ ޕްރޮޖެކްޓްތައް ހިންގާފައިވާކަމަށް ޔައުގޫބް ވިދާޅުވިއެވެ. އެހެންކަމުން ރައްޔިތުން މިއަދު ވިސްނާލަންވީ ރައްޔިތުންނަށްޓަކައި މަސައްކަތް ކުރަނީ ކޮން ބައެއްތޯ ކަމަށެވެ. ކުރީ ސަރުކާރުން ވެސް ހިންގި މަޝްރޫއުތަކާމެދު އެއްވެސް މައްސަލައެއް ނެތް ކަމަށާއި، މައްސަލައަކީ، ޕްރޮޖެކްޓްތަކުން ވައްކަން ކުރުން ކަމަށެވެ. އެގޮތުން ކުރީ ސަރުކާރުން ހިންގާފައިވާ ބޮޑެތި މަޝްރޫތައް ޔައުގޫބް ފާހަގަކުރެއްވިއެވެ. ވިދާޅުވީ، ބްރިޖް މަޝްރޫއާއި، ދަރުމަވަންތަ ހޮސްޕިޓަލާއި، ހިޔާ މަޝްރޫޢުއިން ވެސް ވައްކަން ކޮށްފައިވާ ކަމަށެވެ.
މިހާރު މިއޮތް ބަޖެޓަކީ ދައުލަތުގެ ޚަރަދުތައް ދައުލަތަށް ލިބޭ އާމްދަނީން ކޮށް ނިންމާލެވޭނެ ބަޖެޓެއް ކަމަށެވެ. ކޮންމެ ދައުލަތަކުން ދަރަނި ނެގިޔަސް އެއީ މައްސަލައެއް ނޫން ކަމަށާއި، ދަރަނި މައްސަލައަކަށްވަނީ އެ މެނޭޖްކުރަން އޮންނަ ޕްލޭންތަކުގެ ސަބަބުން ކަމަށެވެ. ދަރަނި ނަގާނީ އެ ދެއްކޭ ބަޔަކު ކަމަށާއި، 2022 ވަނަ އަހަރުގެ ބަޖެޓުން ދަރަނި މެނޭޖް ނުކުރެވޭނެ ތަނެއް ނެތް ކަމަށް ޔަގޫބް ވިދާޅުވިއެވެ.
