ފަތުރުވެރިކަން އާންމު ޙާލަތަށް ރުޖޫއަވީކަމަށް ބެލެވޭނީ ސެކްޓަރގެ މުވައްޒަފުންގެ ޙާލަތު ވެސް ރަނގަޅުވެގެންކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމު ވިދާޅުވެއްޖެއެވެ.

ހޮނިހިރު ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، ރާއްޖެއަށް ފަތުރުވެރިން އަންނަ އަދަދުތަކަށް ބަލާއިރު ކުރިން ހުރި އަދަދުތަކަށް މިހާރު ރުޖޫއަވެވިއްޖެ ކަމަށެވެ. އެހެންނަމަވެސް، އެހިސާބުން އެއީ ފަތުރުވެރިކަން ކުރިން ހުރި ޙާލަތަށް ރުޖޫއަވީކަމުގައި ބެލެވެން ނެތްކަމަށް މިނިސްޓަރ ވިދާޅުވިއެވެ.

ސެކްޓަރގެ މުވައްޒަފުންގެ ވަޒީފާ ގެއްލިފައިވާ މީހުންނާއި، ވަޒީފާގެ ޙާލަތު ރަނގަޅު ނުވާ މުވައްޒަފުން ތިބިކަން ފާހަގަކުރައްވައި މިނިސްޓަރ ވިދާޅުވީ، ފަތުރުވެރިކަން އިހުގެ ޙާލަތަށް ރުޖޫއަވީކަމަށް ބެލެވޭނީ މުވައްޒަފުންގެ ޙާލަތު ވެސް މުޅިން ރަނގަޅުވުމުން ކަމަށެވެ. އަދި އެހިސާބަށް ނުދާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ، ވަރަށް ގިނަ ރިސޯޓުތަކުން މިހާރު ވަޒީފާތައް އަލުން އިޔާދަކޮށް ކުރީގެ ޙާލަތަށް ބަދަލުވަމުންދާ ކަމަށެވެ. އަދި ފަތުރުވެރިކަމުގެ ރަން އަހަރެއް ފާހަގަކުރުމަށް ތައްޔާރުވަމުންދާއިރު، ކޮވިޑުގެ ސަބަބުން ލޮޅުން އައިސްފައިވާ ދާއިރާތަކުން ވެސް އެކަމުން އަރައިގަނެވެން ޖެހޭކަން މިނިސްޓަރ ފާހަގަކުރެއްވިއެވެ.

މިނިސްޓަރ އިތުރަށް ވިދާޅުވީ ކުރިއަށް އޮތް އަހަރުގައި ފަތުރުވެރިކަމުގެ ދާއިރާއިން މީހުން ބިނާ ކުރުމާއި ތަމްރީނު ކުރުމަށް ވެސް ގިނަ ކަންކަން ރޭވިފައިވާ ކަމަށެވެ. މިނިސްޓަރ ވަނީ ރިސޯޓު ސެކްޓަރު ވެސް ހިމެނޭ ގޮތަށް އެކި ދާއިރާތަކުގެ މުވައްޒަފުން ކޮވިޑުގެ މި ޙާލަތުގައި ވަމުންދާ ޤުރުބާނީ ފާހަގަކުރައްވައި އެކަމަށް ތައުރީފުކުރައްވާފައެވެ. އަދި 2021 ވަނަ އަހަރަކީ ފަތުރުވެރިކަމުގެ ކާމިޔާބު އަހަރެއްގެ ގޮތުގައި ފާހަގަ ކުރަމުންދާއިރު، އެކަމުގައި މި ހުރިހާ ދާއިރާއެއްގެ ބައިވެރިވުން ވެސް އޮތްކަން ފާހަގަ ކުރައްވައި މިނިސްޓަރ ވަނީ ޝުކުރު އަދާ ކުރައްވާފައެވެ.