ރައީސް ނަޝީދަށް އިންޒާރު ދިން މީހާއަށް ދައުވާ ކުރަން ކްރިމިނަލް ކޯޓަށް ހުށަހަޅައިފި

މީސްމީޑިއާ މެދުވެރިކޮށް, ކުރީގެ ރައީސް އަދި ރައްޔިތުންގެ މަޖިލީހުގެ ރައީސަށް އިންޒާރު ދިން މީހާއަށް ދައުވާ ކުރަން ކްރިމިނަލް ކޯޓަށް ހުށަހަޅައިފިއެވެ

ހ. ލައިޓްނައިޓް އިސްމާޢީލް ޔާފިސް އޮގަސްޓް މަހުގެ 23 ވަނަ ދުވަހު ހައްޔަރުކުރީ, ރައީސް ނަޝީދު ރާއްޖެ ވަޑައިގެންފިނަމަ "ބަދުރު ދުވަހު އަބޫ ޖަހުލަށް ހަދާލި ގޮތް ހަދާނެ" ކަމަށް ބުނެ އިންޒާރުދީ ފޭސްބުކްގައި ޕޯސްޓެއް ކުރުމުންނެވެ. އަދި މެއި 6ގައި ރައީސް ނަޝީދަށް ދިން ހަމަލާއަށް ވުރެ ވަރުގަދަ ހަމަލާއެއް ދޭނެ ކަަމުގެ އިންޒާރު ވެސް ދީފައިވެއެވެ. އޭނާ ހައްޔަރުކުރީ ރ. މީދޫންނެވެ. އޭނާ ހައްޔަރުކޮށް ބަންދާ މެދު ގޮތެއް ނިންމަން ސެޕްޓެމްބަރު މަހުގެ 22 ވަނަ ދުވަހު ކޯޓަށް ހާޒިރު ކުރުމުން އެ ދުވަހުގެ ބަންދުގެ މަޖިލީހުގައި ވެސް އޭނާ ވަނީ ރައީސް ނަޝީދަށް މަރުގެ އިންޒާރު ދީފައެވެ.

Advertisement

ކޯޓުގައި ރައީސް ނަޝީދަށް މަރުގެ އިންޒާރު ދިން މައްސަލައިގައި ކޯޓުގެ ހުރުމަތް ކެނޑިކަމުގެ ކުށުގައި 15 ދުވަސް, އަދި އޭނާގެ ބަންދަށް ވެސް 15 ދުވަސް ކޯޓުން ޖެހިއެވެ.

ބުރާސްފަތި ދުވަހު ޕީޖީ އޮފީހުން ބުނީ ހ. ލައިޓްނައިޓް އިސްމާޢީލް ޔާފިސް، ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓް ޖަމާއަތަށް ބައިއަތު ހިފިކަން އަންގައިދޭ ލިޔުމެއް ސޯޝަލް މީޑިއާގައި ޝާއިއުކޮށް، 2020 ވަނަ އަހަރުން ފެށިގެން އިސްމާޢީލް ޔާފިސް ބޭނުންކުރާ ސޯޝަލް މީޑިއާގެ އެކި ޕްލެޓްފޯރމްތަކުގައި ރައްޔިތުންގެ މަޖިލީހުގެ ރައީސް ރައީސް މުޙައްމަދު ނަޝީދަށް އިންޒާރުދީ އެކި ޕޯސްޓްތައް ކޮށްފައިވާ މައްސަލައިގައި ދައުވާކުރުމަށް, ބުރާސްފަތި ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.

އޭނާގެ މައްޗަށް އުފުލާފައިވާ ދައުވާތަކުގެ ތެރޭގައި; ޓެރަރިޒަމް މަނާކުރުމުގެ ޤާނޫނުގެ 8 ވަނަ މާއްދާގެ (ހ)އާ ޙަވާލާދީ، އެ މާއްދާގެ (ރ)ގެ ދަށުން، ޓެރަރިޒަމްގެ ޢަމަލެއް ކުރުމަށް ހިތްވަރު ދިނުން (އަދަބު: 10 އަހަރާއި 15 އަހަރާ ދެމެދު) ޓެރަރިޒަމް މަނާކުރުމުގެ ޤާނޫނުގެ 13 ވަނަ މާއްދާގެ (ހ)އާ ޙަވާލާދީ، އެމާއްދާގެ (ނ)ގެ ދަށުން، ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުން ނުވަތަ ބިރުދެއްކުމުގެ ކުށުގެ ދަޢުވާ (އަދަބު: 4 އަހަރާއި 6 އަހަރާ ދެމެދު) ޓެރަރިޒަމް މަނާކުރުމުގެ ޤާނޫނުގެ 16-1ގެ (ހ)ގެ 1 ވަނަ ނަންބަރާއި 2 ވަނަ ނަންބަރާ ޙަވާލާދީ، އެ މާއްދާގެ (ށ)ގެ ދަށުން، ޓެރަރިސްޓް ޖަމާޢަތަކަށް ތާއީދުކުރުން (އަދަބު: 3 އަހަރާއި 5 އަހަރާ ދެމެދު) އެވެ.