ފަގީރު ހާލަތުގައި ދިރިއުޅޭ ފަރާތްތަކަށް ފެނާއި ނަރުދަމާގެ ޚިދުމަތުގެ ބިލުދެއްކުމަށް 2 މިލިއަން ރުފިޔާ
މިއީ ދައުލަތުގެ ބަޖެޓުގައި އަލަށް ހިމަނާފައިވާ ކަމެއް
ރަސްދޫގައި ގާއިމްކުރާ ފެންޕްލާންޓް
ފަގީރު ހާލަތުގައި ދިރިއުޅޭ ގޭބިސީތަކުން ބޭނުންކުރާ ފެނާއި ނަރުދަމާގެ ޚިދުމަތުގެ ބިލުދެއްކުމުގައި އެހީތެރިވެދިނުމަށް 2 މިލިއަން ރުފިޔާ ބަޖެޓުގައި ހިމަނައިފިއެވެ.
އަންއަހަރަށް ލަފާކުރާ ދައުލަތުގެ ބަޖެޓުގައި ބުނެފައިވަނީ ފަގީރު ހާލަތުގައި ދިރިއުޅޭ ގޭބިސީތަކުން ބޭނުންކުރާ ފެނާއި ނަރުދަމާގެ ޚިދުމަތުގެ ބިލުދެއްކުމުގައި ދައުލަތުން އެހީތެރިވެދިނުމަށްޓަކައި ސަބްސިޑީ ދޭން ފެށުމުގެ ގޮތުން، 2022 ވަނަ އަހަރުގެ ބަޖެޓުގައި 2 މިލިއަން ރުފިޔާ ހިމަނާފައިވާ ކަމަށެވެ. ސަރުކާރުގެ ސްޓްރެޓީޖިކް އެކްޝަން ޕްލޭނުގައި ހިމެނޭ މި ޕްރޮގްރާމްގެ ސަބަބުން އެފަދަ ގޭބިސީތަކުގެ މެންބަރުންނަށް އަސާސީ ޚިދުމަތެއް ކަމުގައިވާ ފެނާއި ނަރުދަމާގެ ޚިދުމަތް ހޯދުމަށް ފައިސާ ދެއްކުމުގައި މިހާރު ދިމާވާ ދަތިތަކަށް އެކަށީގެންވާ ހައްލެއް ލިބިގެން ދާނެ ކަމަށް ބުނެފައިވެއެވެ. މިއީ ދައުލަތުގެ ބަޖެޓުގައި އަލަށް ހިމަނާފައިވާ ކަމެކެވެ.
އެހެނިހެން ފާހަގަކޮށްލެވޭ ޕްރޮގްރާމްތަކުގެ ތެރޭގައި 2022 ވަނަ އަހަރު އަތޮޅުތެރޭގައި ޖޮބް ސެންޓަރުތައް ގާއިމުކުރުމަށް ހިމަނާފައިވާ 0.2 މިލިއަން ރުފިޔާގެ ޕްރޮގްރާމް، ނުކުޅެދުންތެރިކަން ހުންނަ މީހުންނަށް ބޭނުންވާ ރިހެބިލިޓޭޝަން ޚިދުމަތް ދޭ މަރުކަޒުތަކާއި ޑޮމެސްޓިކް ވައިލެންސް ޝެލްޓަރ ހިންގުމަށް ހިމަނާފައިވާ 3.2 މިލިއަން ރުފިޔާގެ ޕްރޮގްރާމް، މަސްތުވާތަކެއްޗަށް ދެވިހިފާފައިވާ ފަރާތްތަކަށް އަމާޒުކޮށްގެން ހިންގާ ޖުމުލަ 5.3 މިލިއަން ރުފިޔާގެ ދެ ޕްރޮގްރާމްކަމުގައިވާ ކޮމިއުނިޓީ ބޭސްޑް ޑްރަގް ރިހެބިލިޓޭޝަން ޕްރޮގްރާމާއި ކޮމިއުނިޓީ ރީ-އިންޓެގްރޭޝަން ޕްރޮގްރާމް އަދި ރައްކާތެރިކަމާއެކު ކުނި ނައްތާލުމަށް އަމާޒުކޮށްގެން ހިންގުމަށް ބަޖެޓުކޮށްފައިވާ ޖުމުލަ 8.3 މިލިއަން ރުފިޔާގެ ޕްރޮގްރާމްތައް ހިމެނެއެވެ.
