ކޮޕް26: ކޮންފަރެންސްގެ ކުރިން ޗައިނާގެ ވައުދުތައް ހާމަކޮށްފި، އައު ކަމެއް ނެތް

ކުރިޔަށް އޮތް ކޮޕް26 ސަމިޓާ ދިމާކޮށް މޫސުމަށް އަންނަ ބަދަލުތަކާ ގުޅިގެން ކަނޑައަޅާފައިވާ ލަނޑުދަނޑިތައް ހާސިލުކުރުމަށް ޗައިނާއިން އެކަށަ އަޅާފައިވާ ސިޔާސަތު ހާމަކޮށްފިއެވެ.

އޮކްޓޯބަރ މަހުގެ 31 ވަނަ ދުވަހު ގްލާސްގޯވ ގައި ފެށުމަށް ހަމަޖެހިފައިވާ ކޮޕް26 ސަމިޓްގެ ކުރިން ޔޫއެން ފްރޭމްވޯރކް ކޮންވެންޝަން އޮން ކްލައިމެޓް ޗޭންޖް ވެބްސައިޓްގައި ޗައިނާއިން ވަނީ އެގައުމުން ހާސިލުކުރާނެ ލަނޑުދަނޑިތަކުގެ ޑޮކިޔުމަންޓް ޝާއިއުކޮށްފައެވެ. މިއީ ކޮންމެ ގައުމަކުން ވެސް ކޮންމެ އަހަރަކު ކުރާނެ ކަންކަން ހާމަކޮށް އދ.ށް ހުށަހަޅަންޖެހޭ އެއްޗެކެވެ. ނަމަވެސް ޗައިނާއިން ހުށަހަޅާފައިވާ ޑޮކިޔުމަންޓްގައި އައު ކަމެއް ނެތެވެ.

Advertisement

އެގޮތުން ޗައިނާއިން ހުށަހެޅި ކަންކަމަށް ބަލާލާއިރު ކާބަންޑައިއޮކްސައިޑް ޖައްވަށް ދޫކުރާ މިންވަރު 2030 ވަނަ އަހަރު އައުމުގެ ކުރިން ޕީކަށް ގެނެސް 2060 ވަނަ އަހަރު ކާބަން ނިޔުޓްރަލް ގައުމަކަށްވާނެ ކަމަށް ވަނީ ބުނެފައެވެ. މިއީ މީގެކުރިން ޗައިނާގެ ރައީސް ޝީ ޖިންޕިންގ ވެވަޑައިގަންނަވާފައިވާ ވައުދެކެވެ.

ޗައިނާއަކީ މުޅި ދުނިޔެއިން ވެސް އެންމެ ގިނަ އަދަދަކަށް ޖައްވަށް ވިހަ ގޭސް ބޭރުކުރާ ގައުމެވެ. ޗައިނާއިން މިފަހަރު ހުށަހެޅި ބަޔާނުގައި ވަނީ މީގެކުރިން ހަކަތަ އުފެއްދުމުގައި ޖައްވަށް އެންމެ ގިނައިން ބޭރު ކުރާ ބާވަތްތަކުގެ ބަދަލުގައި ތިމާވެއްޓާ ރައްޓެހި ބާވަތްތައް ބޭނުންކުރާ މިންވަރު 2030 ވަނަ އަހަރު އަންނަންވާއިރަށް، ކުރިން ހާމަކުރި 20 އިންސައްތައިގެ ބަދަލުގައި 25 އިންސައްތައަށް ބޮޑުކޮށްފައެވެ. ޗައިނާއިން ވަނީ ވަޔާއި އަވިން ހަކަތަ އުފައްދާ ނިޒާމުގެ ކެޕޭސިޓީ 1200 ގިގަވޮޓަށް އިތުރުކުރާނެކަމަށް ބުނެފައެވެ.

2015 ވަނަ އަހަރު ގައުމުތަކުން އެއްބަސްވެފައިވާ ޕެރިސް އެގްރިމެންޓްގެ ދަށުން ކޮންމެ ގައުމަކުން ވެސް އެގައުމުން މޫސުމަށް އަންނަ ބަދަލުތަކާ ގުޅިގެން ހާސިލުކުރަން ކަނޑައަޅާފައިވާ ލަނޑުދަނޑިތައް ހާސިލުކުރުމަށް ގެންގުޅޭ ޕްލޭން ހުށަހަޅަންޖެހެއެވެ. މިގޮތަށް ހުށަހަޅާއިރު އަހަރުން އަހަރަށް ޕްލޭން ރަނގަޅުވާންޖެހެއެވެ.

ޗައިނާގެ މިލަނޑުދަނޑިތަކާ ގުޅިގެން ބައެއް މާހިރުން ވަނީ ނާއުންމީދުވެފައެވެ. ޗައިނާގެ ފަރާތުން މިއަށްވުރެ ބޮޑު އެއްބާރުލުމެއް ބޭނުންވާކަމަށް ވަނީ ބުނެފައެވެ. ޗައިނާގެ ސަރުކާރުން ބުނެފައިވަނީ ކޮޕް26 ގައި އެންމެ ބޮޑު އަމާޒަކަށް ވާނީ މުއްސަނދި ގައުމުތަކުން ފަގީރު ގައުމުތަކަށް މޫސުމަށް އަންނަ ބަދަލުތަކާ ގުޅިގެން ދޭން އެއްބަސްވެފައިވާ 100 ބިލިއަން ޑޮލަރާ ހަމައަށް ވާސިލުވުންކަމަށެވެ.

ޗައިނާއިން އައު ކަމެއް ހުށަހަޅާފައިނުވުމުން އެކަމުގެ ހިޔަނި ދުނިޔެއިން މޫސުމަށް އަންނަ ބަދަލުތަކާ ދެކޮޅަށް ކުރަމުންދާ މަސައްކަތަށް އެޅޭނެކަމަށް މާހިރުން އަންނަނީ ބުނަމުންނެވެ.

ޗައިނާއަށް ދިމާވެފައިވާ ކަރަންޓްގެ މައްސަލަ ހައްލުކުރުމަށް ބޯޓު ދެލި އަންދައިގެން ހަކަތަ އުފެއްދުމަށް އަންނަނީ ބާރު އަޅަމުންނެވެ. ޗައިނާ އިން އުފައްދާ ކަރަންޓުގެ 60 އިންސައްތައަކީ ބޯޓުދެލި އަންދައިގެން އުފައްދާ ކަރަންޓެވެ.