ކީރިތި ޤުރްއާނާ ބެހޭ ޤައުމީ މަރުކަޒުން އިންތިޒާމް ކޮށްގެން މުޅި ރާއްޖެއަށް ހުޅުވާލައިގެން ބާއްވާ މި އަހަރުގެ ޤައުމީ ޤުރްއާން މުބާރާތުގެ ޤަވާއިދާ މެދު އައްޑޫސިޓީގެ ގިނަ ބައެއްގެ ކަންބޮޑުވުން އޮތް ނަމަވެސް އެސިޓީން މިފަހަރުގެ މުބާރާތުގައި ބައިވެރިވާން ނިންމައި އޮޑިޝަން ބާއްވައިފިއެވެ.

އަތޮޅުތެރޭގެ ނިސްބަތުން ވެސް ކިޔަވާ ކުދިން އެންމެ ގިނަ އައްޑޫސިޓީން މި މުބާރާތުގައި ބައިވެރިވުމަށް އެ ސިޓީގެ 15 ސްކޫލަކުން ޖުމްލަ 450 ދަރިވަރަކު އޮޑިޝަންގައި ވާދަކޮށްފައިވާއިރު މުބާރާތުގެ ޤަވާޢިދު ތަންދޭގޮތުން މީގެ ތެރެއިން ޤައުމީ މުބާރާތަށް ހޮވާފައިވަނީ 30 ކުދިންނެވެ. އެއީ ބަލައިގެން ކިޔެވުމުގެ ގޮފިން 20 ދަރިވަރަކާއި ނުބަލާ ކިޔެވުމުގެ ގޮފިން 10 ދަރިވަރުންނެވެ.

މި މުބާރާތުގެ ޤަވާއިދުގައިވާ ގޮތުން އަތޮޅުތަކުން މުބާރާތުގައި ވާދަ ކުރެވޭނީ އެންމެ 30 ކުދިންނަށެވެ. އެހެންނަމަވެސް މި މުބާރާތުގައި ގްރޭޓަރ މާލެ ސިޓީގެ ކޮންމެ ސްކޫލަކާއި ކޮންމެ ކޮލެޖް ޔުނިވަރސިޓީއަކާއި އަދި ޤުރްއާން ކްލާސްތަކުގެ ތެރެއިން ވަކިވަކި ކޮންމެ ތަނަކުން 15 ބައިވެރިންނަށް ފުރުސަތު ހުޅުވިފައިވެއެވެ. މިތަފާތު އޮތުމުގެ ސަބަބުން އައްޑޫސިޓީގެ ގިނަ ބެލެނިވެރިންނާއި ސްކޫލްތަކުން ޝަކުވާ ހުށަހަޅާފައިވާތީ އައްޑޫސިޓީ ކައުންސިލުން ވަނީ އަންނަ އަހަރުން ފެށިގެން ސިޓީގެ އަވަށްތަކުން ވާދަކުރެވޭ ބޮޑު މުބާރާތެއް ބާއްވަން މަޝްވަރާ ކުރަމުންދާ ކަމަށް ވިދާޅުވެފައެވެ.

34 ވަނަ ޤައުމީ ޤުރްއާން މުބާރާތް އޮންނަނީ ވާޗުއަލް ކޮށެވެ. މި މުބާރާތުގައި ބައިވެރިވާން އެދޭ ފަރާތްތަކުން ޕޯޓަލްގައި ރަޖިސްޓްރީ ވާން ހުޅުވާލި އެންމެ ފަހު ތާރީޚު އަންގާރަ ދުވަހު ވަނީ ހަމަވެފައެވެ.

މި މުބާރާތުގެ ބަލައިގެން ކިޔެވުމުގެ ބައިގެ ރެކޯޑިން ދެއްކުމަށް ހަމަޖެހިފައިވަނީ 15 ނޮވެމްބަރ 2021 ން 28 ނޮވެމްބަރ 2021ގެ ނިޔަލަށެވެ. ނުބަލާ ކިޔެވުމުގެ ބައި ކުރިއަށްދާނީ 19 ޑިސެންބަރ 2021ން 25 ޑިސެންބަރ 2021 ގެ ނިޔަލަށެވެ.