އެމްއެމްޕީއާރްސީ ޚިޔާނާތުގެ ތަހުގީގު ނިންމުމަށް އިތުރު 4 މިލިއަން ރުފިޔާގެ ބަޖެޓެއް ބޭނުންވާކަމަށް އޭސީސީން ބުނެފިއެވެ.
އޭސީސީގެ ރައީސް މަރިޔަމް ޝިއުނާ ވިދާޅުވީ، ބަޖެޓުގެ ދަތިކަން ޙައްލު ކުރުމަށްޓަކައި އޭސީސީން ވެސް މަސައްކަތްތަކެއް ކޮށްފައިވާ ކަމަށެވެ. ނަމަވެސް އެންމެ އެކަށީގެންވާ ހަލުވި މިނެއްގައި ތަހުގީގުތައް ކުރިއަށް ނުގެންދެވެނީ ބަޖެޓުގެ ދަތިކަމާއި މުވައްޒަފުންގެ ދަތިކަމުގެ ސަބަބުންކަން ޝިއުނާ ފާހަގަކުރެއްވިއެވެ.
އޭސީސީގެ ތަހުގީގުތައް ލަސްވާކަން ޤަބޫލު ކުރައްވާކަން ފާހަގަކުރައްވައި ޝިއުނާ ވިދާޅުވީ، އިތުރު 4 މިލިއަން ރުފިޔާގެ ބަޖެޓެއް ދިނުމަށް ފިނޭންސް މިނިސްޓްރީގައި އެދިފައިވާ ކަމަށެވެ. އަދި މުވައްޒަފުންގެ ދަތިކަން ޙައްލު ކުރުމަށްޓަކައި އިތުރު 12 މުވައްޒަފުން ހޯދުމަށް އެދިލައްވާފައިވާނެ ކަމަށް ޝިއުނާ ވިދާޅުވިއެވެ.
ޝިއުނާ ވިދާޅުވީ، މިއަހަރުގެ ފަހުކޮޅު އިތުރު 20 މައްސަލައިގައި ދައުވާކުރަން ފޮނުވޭނެކަމަށް އުއްމީދު ކުރައްވާ ކަމަށާއި، އިތުރު 128 މައްސަލައިގެ ތަހުގީގު ނިމޭނެ ކަމަށް އުއްމީދު ކުރައްވާ ކަމަށެވެ.
އެސެޓް ރިކަވަރީއާ ގުޅޭގޮތުން ޝިއުނާ ވިދާޅުވީ، ދައުލަތަށް ލިބެންޖެހޭ ފައިސާއާބެހޭ މަސައްކަތް އެންމެ ފަހުން ކޮމިޝަނުން ކޮށްފައިވަނީ 2017 ގައި ކަމަށެވެ. އަދި ކޮމިޝަނާ ޙަވާލުވެވަޑައިގެން ފަހުން ފިނޭންސް މިނިސްޓްރީއާއި އެކި މުއައްސަސާއަށް އޭރު ސިޓީ ފޮނުވިފައިވާ މިންވަރާއި، އޭގެ މަސައްކަތްތައް ކޮށްފައިވަނީ ކިހާ މިންވަރަކަށްތޯ ބަލައި މޮނިޓަރކޮށް، އޭގެ ޑޭޓާ އެއްކުރުމުގެ މަސައްކަތް އައު ކޮމިޝަނުން ކުރަމުންދާކަން ޝިއުނާ ފާހަގަކުރެއްވިއެވެ.
ޝިއުނާ ވިދާޅުވީ އެ މަސައްކަތްތައް ނިންމައި، އެކަމާ ގުޅޭ ފައިނަލް ރިޕޯޓު މަޖިލީހަށް ވެސް ހިއްސާ ކުރައްވާނެ ކަމަށެވެ.
އޭގެ އިތުރުން، ވޭތުވެ ދިޔަ ދެ އަހަރެއްހާ ދުވަހު އޭސީސީ ރިފޯރމް ކުރުމަށް ގިނަ މަސައްކަތްތަކެއް ކުރެވިފައިވާނެކަން ޝިއުނާގެ ވާހަކައިގައި ފާހަގަކުރެއްވިއެވެ. ޝިއުނާ ވިދާޅުވީ، އެހެން އަހަރުތަކާ އަޅާބަލާއިރު އޭސީސީގެ ސްޕީޑު ވެސް އަވަސްވެފައިވާ ކަމަށެވެ.
