ދަނޑުވެރިކަން ފުޅާކުރުމަށް އޮތް އެންމެ ބޮޑު ގޮންޖެހުމަކީ ބޭނުންވާ ވަރަށް ބިން ލިބެން ނެތުން - ޑރ ހުސައިން
ލިބެން އޮތް ބިންކޮޅު އެންމެ ފައިދާ ހުރި ގޮތަކަށް ބޭނުންކުރަން ވިސްނަން ޖެހޭ
ޑރ.ހުސައިން ރަޝީދު ހަސަން - މިނިސްޓަރ އޮފ ފިޝަރީޒް މެރިން ރިސޯސަސް އެންޑް އެގްރިކަލްޗަރ
ދަނޑުވެރިކަން ފުޅާކުރުމަށް އޮތް އެންމެ ބޮޑު ގޮންޖެހުމަކީ، ބޭނުންވާ ވަރަށް ބިން ލިބެން ނެތުން ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ.ހުސައިން ރަޝީދު ހަސަން ވިދާޅުވެއްޖެއެވެ.
ދަނޑުވެރިންގެ ދުވަސް ފާހަގަކުރުމަށް ތ.ކަނޑޫދޫގައި ބޭއްވި ޚާއްސަ ޖަލްސާގއި ވާހަކަފުޅު ދައްކަވަމުން މިނިސްޓަރ ވިދާޅުވީ، މިހާރު ކުރާ ގޮތަށް ދަނޑުވެރިކަން ކުރާ ނަމަ ބިން ނެތުމުގެ ޝަކުވާ އަކީ ސީރިއަށް ޝަކުވާ އަކަށް ވެގެންދާނެ ކަމަށެވެ. އަދި ކައުންސިލްތަކުން ބިން ދޫކުރުމުގައި ޚާއްސަ ސަމާލުކަމެއް ދޭން ޖެހޭކަން ފާހަގަކުރައްވަމުން މިނިސްޓަރ ވިދާޅުވީ، ދޫކުރާ ބިންތައް އެކަށީގެންވާ މުއްދަތަކަށް ދޫކުރުން މުހިއްމު ކަމަށެވެ.
ދަނޑުވެރިން ބޭނުންވާ ވަރަށް ބިން ނުލިބުމަކީ އެކަށީގެންވާ ކަމެއް ކަމަށާއި، ލިބެން އޮތް ބިންކޮޅު އެންމެ ފައިދާ ހުރި ގޮތަކަށް ބޭނުންކުރަން ވިސްނަން ޖެހޭ ކަމަށް ވިދާޅުވިއެވެ. މިހާރު ކުދި ބިންކޮޅުގައި ވާރޓިކަލް ފާރމްގެ ގޮތުގައި ދަނޑު ހެއްދުން އިތުރު ކުރަން ޖެހޭ ކަމަށާއި، ފެން އިސްރާފު ނުކުރެވޭ ގޮތެއް ހޯދަން ޖެހޭ ކަަމަށް ވެސް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ، ރާއްޖޭގެ މާހައުލަށް އެކަށީގެންވާ ނިޒާމްތައް ގާއިމު ކުރުމަށް އިސްކަން ދޭން ޖެހޭ ކަމަށެވެ. އަދި ރާއްޖޭގެ ދަނޑުވެރިކަން ފުޅާ ކުރުމަށް ބޭނުންވާ ވަނީ ހުނަރުވެރި ދިވެހި ދަނޑުވެރިން ކަމަށާއި، ދަނޑުވެރިކަން ކުރުމަށް ރާއްޖެއިން ބޭރުން މީހުން ގެނައުން ހުއްޓުވަން ޖެހޭ ކަމަށެވެ. ދަނޑުވެރިކަމުން ލިބެންޖެހޭ ހަގީގީ ފައިދާ ދިވެހިންނަށް ލިބޭނީ އޭރުންކަން މިނިސްޓަރ ފާހަގަކުރެއްވިއެވެ.
ދިވެހި ދަނޑުވެރިންނަށް ބޭނުންވާ ތަމްރީނު ފޯރުކޮށްދޭން ޖެހޭ ކަމަށާއި، ޒަމާނީ ޓެކްނޮލޮޖީ ބޭނުން ކޮށްގެން ތަމްރީނު ދޭން ޖެހޭ ކަމަށް ވިދާޅުވިއެވެ. ތައުލީމީ ނިޒާމުގެތެރެއަށް ދަނޑުވެރިކަން ވެއްދުން މުހިއްމު ކަމުގައި ވިދާޅުވިއެވެ. އުފައްދާ ބާވަތުގެ ފެންވަރު ރަނގަޅު ކުރުމަށް ތަމްރީނު ޕްރޮގްރާމް ހިންގަމުންދާ ކަމަށާއި، 317 ދަނޑުވެރިން 2019ވަނަ އަހަރު ތަމްރީނު ދީފައިވާކަމަށް ވެސް ވިދާޅުވިއެވެ.
ލުއި ލޯނު ލިބެން ނެތުމުގެ ކަންބޮޑުވުން ދަނޑުވެރިންގެ އެބައޮތް ކަމަށާއި، އުސޫލްތައް ބަދަލުކޮށް ފަސޭހައިން ލޯނު ލިބޭނެ ގޮތް ވަރަށް އަވަހަށް ހަދާނެ ކަމަށް މިނިސްޓަރ ވިދާޅުވިއެވެ. އޭރުން ދަނޑުވެރިކަމަށް އަލަށް ވަންނަން ބޭނުންވާ މީހުންނަށް ލޯނު ނަގައިގެން އެ ދާއިރާއަށް ވަނުމުގެ ފުރުސަތު ފަހިވެގެންދާނެ ކަމަށް މިނިސްޓަރ ވިދާޅުވިއެވެ.
ފަޅު ރަށްތައް ދަނޑުވެރިކަމަށް ދޫކުރުމުގެ މަސައްކަތުގެ ތެރެއިން މި މަހު 5 ރަށެއް ދަނޑުވެރިކަމަށް އިއުލާން ކުރައްވާނެ ކަމަށް ވިދާޅުވިއެވެ.
ދަނޑުވެރިކަމުގެ މުހިއްމު ބާވަތްތަކުގެ ޑިއުޓީވެސް ސަރުކާރުން މިހާރުވަނީ މާފް ކޮށްދީފައެވެ. ދަނޑުވެރިން ހައްދާ ތަކެއްތި ވިއްކޭނެ އިންތިޒާމް ސަރުކާރުން ވަނީ ހަމަޖައްސާދީފައެވެ. އެހެންކަމުން ނުވިއްކޭނެ ކަމުގެ ބިރުވެރިކަން މިހާރު ދަނޑުވެރިންނަށް ނޯންނާނެ ކަމުގެ ޔަގީންކަން މިނިސްޓަރ ދެއްވިއެވެ.
