މާވަށުގެ ގެއަކުން ކަރަންޓު ޚިދުމަތް ކަނޑާލީ އުސޫލުތަކާ އެއްގޮތަށް: ފެނަކަ
ކަރަންޓުގެ ޚިދުމަތް ވަގުތީގޮތުން ކަނޑާލީ މިމަހުގެ 4 ގައި
ލ. މާވަށް،
ލ. މާވަށު "އާފަރު" ނަމަކަށް ކިޔާ ގޯތިން ކަރަންޓު ޚިދުމަތް ކަނޑާލީ އުސޫލުތަކާ އެއްގޮތަށް ކަމަށް ފެނަކަ ކޯޕަރޭޝަން ބުނެފިއެވެ.
ފެނަކައިން ބުނީ ކަރަންޓުގެ ޚިދުމަތް ފޯރުކޮށްދިނުމަށް ކަނޑައަޅާފައިވާ ގަވާއިދުތަކާއި އުސޫލުތަކާ ޚިލާފުވެ، ހޯދާފައިވާ ކަރަންޓުގެ ޚިދުމަތްތަކަށް ދައްކަންޖެހޭ ފައިސާ ދެއްކުމަށް ތަކުރާރުކޮށް ދެވުނު ފުރުސަތުތަކުގައި ވެސް ފައިސާ ދައްކާފައިނުވާ ކަމަށެވެ. ދެވުނު އެންމެ ފަހު ފުރުސަތު 03 އޮކްޓޯބަރ 2021 ގެ ނިޔަލަށް ހަމަވެފައިވާތީ، އާންމުކޮށް އަމަލުކުރުމަށް ކަނޑައަޅާފައިވާ އުސޫލުގެ ތެރެއިން، އަހުމަދު މޫސާގެ ނަމުގައި ރަޖިސްޓްރީ ކުރެވިފައިވާ "އާފަރު" ކިޔާ ގޯތީގައި ހުރި އިމާރާތްތަކަށް ދެވިފައިވާ ކަރަންޓުގެ ޚިދުމަތް 04 އޮކްޓޯބަރ 2021 ވަނަ ދުވަހު ވަގުތީގޮތުން ކަނޑާލާފައިވާ ކަމަށެވެ.
ފެނަކައިން ބުނީ އެކަމާ ގުޅިގެން ގޯތީގެ ވެރިފަރާތުން، އެ ކުންފުނިން ހޯދާފައިވާ ޚިދުމަތްތަކަށް ދައްކަންޖެހޭ ފައިސާ ނުދެއްކުމަށް ޝަރުއީ ކޯޓެއް މެދުވެރިކޮށް، ވަގުތީ އަމުރެއްގެ ދަށުން ދާއިމީ ފަރުވާއެއް ލިބޭނެ ގާނޫނީ ބަހަނާއެއް ހޯދުމުގެ ބޭނުމުގައި، މާވަށު މެޖިސްޓިރޭޓް ކޯޓަށް ހުށަހެޅި މައްސަލަ، 06 އޮކްޓޯބަރ 2021 ވަނަ ދުވަހު އެކޯޓުން ނިންމައި ހުކުމް ކޮށްފައިވާތީ ވަގުތީގޮތުން ޚިދުމަތް ކަނޑާލި ކަނޑާލުމާމެދު މިވަގުތަށް ގާނޫނީ ބަހުސެއް އުފެދިފައި ނުވާ ކަމަށެވެ.
މީގެ އިތުރުން ފެނައިން ބުނީ ފޯރުކޮށްދެމުންދާ ޚިދުމަތްތަކަކީ އެއްވެސް ފަރާތެއް ތަފާތުކުރުމެއްނެތި ހަމަހަމަކަމާއެކު ފޯރުކޮށްދިނުމަށް ލާޒިމްކުރާ ޚިދުމަތްތަކަކަށްވާއިރު، ޚިދުމަތް ލިބިގަތުމަށް އޮންނަ އުސޫލުތަކާ ޚިލާފުވެގެން އާންމު ފަރުދުން ދިރިއުޅޭ ގެތަކުން ވެސް ކަރަންޓުގެ ޚިދުމަތް ވަގުތީގޮތުން ކަނޑާލުމަކީ އަބަދުވެސް އަމަލުކުރަމުންދާ، ގާނޫނީ ގޮތުން ވެސް ކުންފުންޏަށް ބާރުލިބިދީފައިވާ އުސޫލު ކަމަށެވެ.
ރައްޔިތުންގެ މެދުގައި އޮންނަންޖެހޭ ހަމަހަމަކަން ގެއްލޭ ފަދަ ގޮތަކަށް، ރަސްމީ ހައިސިއްޔަތު ބޭނުން ކޮށްގެން އަމިއްލަ މަސްލަހަތު ކުރިއަށް ނެރެ، ރަށު ކައުންސިލްގެ ރައީސް މައުލޫމާތު ހިއްސާ ކޮށްފައިވާ ކަމަށް ބައެއް މީޑިއާތަކުން ރިޕޯޓް ކޮށްފައިވާތީ ކަންބޮޑުވުންފާޅުކޮށް ފެނަކައިން ބުނީ ވަކި ފަރާތަކުން ދައްކާ ވާހަކައަކާ މެދު އެ ކުންފުނީގެ ބަހެއް ހޯދުމަށްފަހު، ހަމަހަމަކަމާއެކު ކަމުގެ ދެފަރާތުން ރައްޔިތުންނަށް ސާފުވާގޮތަށް ޚަބަރު ފެތުރުމަކީ މިނިވަން ނޫސްވެރިކަމުގެ އެންމެ އަސާސީ ސިފަ ކަމަށެވެ. އަދި ޚަބަރު ފެތުރި މީޑިއާތަކުން އެއާ ޚިލާފަށް އަމަލުކޮށްފައިވުމަކީ ޒިންމާދާރުކަމެއް ނެތް ކަމެއް ކަމަށް ފެނަކައިން ބުނެފައިވެއެވެ.
ފެނަކައިން ބުނީ ފޯރުކޮށްދޭ ޚިދުމަތްތަކަކީ ޚިދުމަތް ހޯދާ ފަރާތްތަކާއެކު އެއްބަސްވެވޭ ވަކި ހަމަތަކަކާއި އުސޫލުތަކެއްގެ ތެރެއިން ދެވޭ ޚިދުމަތްތަކެއް ކަމަށާއި، އުސޫލުން ބޭރުން ނުވަތަ ނުޙައްގުން، އެއްވެސް ފަރާތަކަށް ދީފައިވާ ޚިދުމަތެއް ކަނޑާނުލާނެ ކަަމަށެވެ. އަދި ދެވޭ ޚިދުމަތްތަކަކީ ހުރިހާ ފަރާތްތަކަކަށް އެއް އުސޫލަކުން އަމަލުކުރެވިގެން ދެވޭ ޚިދުމަތްތަކަކަށް ވެފައި، އެ ޚިދުމަތްތައް ދެމެހެއްޓެނިވި ގޮތެއްގައި ފޯރުކޮށްދެވޭނީ، އެއްބަސްވެވިފައިވާ އުސޫލުތަކާ އެއްގޮތަށް ހުރިހާ ފަރާތްތަކުން ވެސް އަމަލުކޮށްގެން ކަމަށް ފެނަަކައިން ބުނެއެވެ.
އެހެންކަމުން ޚިދުމަތް ލިބިގަންނަ ހުރިހާ ފަރާތްތަކުން ވެސް، ކަނޑައަޅައި އެއްބަސްވެވިފައިވާ އުސޫލުތަކާ އެއްގޮތަށް އަމަލުކުރުމަށް ފެނަކައިން ވަނީ އިލްތިމާސްކޮށްފައެވެ.
